រាជធានីភ្នំពេញ ៖ នៅទីបំផុតកំពូលតារាចម្រៀងស្រីល្បីឈ្មោះ មាស សុខសោភា បានចុះកុងត្រាជាមួយផលិតកម្ម រាម (Ream Production Co.,LTD)…
រាជធានីភ្នំពេញ ៖ នៅទីបំផុតកំពូលតារាចម្រៀងស្រីល្បីឈ្មោះ មាស សុខសោភា បានចុះកុងត្រាជាមួយផលិតកម្ម រាម (Ream Production Co.,LTD) ដែលជាទ្រនំថ្មីរបស់នាងនៅក្នុងពិធីសម្ពោធ ផលិតកម្មជាផ្លូវការជាមួយនិងការស្វាគមន៍តារាចម្រៀងសំឡេងផ្អែម មាស សុខសោភា កាលពីរាត្រីថ្ងៃទី ១៩ ខែកុម្ភៈ ឆ្នាំ ២០២១ ដោយមានការចូលរួមពីភ្ញៀវកិត្តិយស តារាចម្រៀង និងសម្តែងជាច្រើនរូប ។
នៅក្នុងថ្ងៃសម្ពោធផលិតកម្ម «រាម» និងចុះកិច្ចសន្យាជាផ្លូវការនេះតារាចម្រៀងល្បីឈ្មោះ មាស សុខសោភា បានប្រាប់អ្នកសារព័ត៌មានថា ៖ «ក្នុងការសម្រេចចិត្តចូលក្នុងផលិតកម្ម រាម អាចនិយាយបានថា ជានិស្ស័យ ជាពេលវេលាដែលឱ្យពួកយើងបានជួបគ្នា រួមសហការជាមួយគ្នា និងដោយសារពួកយើងមានបេះដូង គោលដៅ គោលបំណងតែមួយ ។ បើទោះបីផលិតកម្ម រាម មិនទាន់មានប្រជាប្រិយភាពក៏ដោយ ក៏ប៉ុន្តែអាចនិយាយថា មានគោលដៅដូចខ្ញុំដែលជាអ្នកសិល្បៈរៀមច្បងត្រូវការអ្នកដែលជួយគាំទ្រ ការលើកទឹកចិត្ត និងផ្លូវចិត្តរបស់ខ្ញុំ និងការងារសិល្បៈដែលខ្ញុំចង់ធ្វើ» ។
ដោយបង្ហាញអារម្មណ៍របស់ពិតកញ្ញា មាស សុខសោភា បន្តថា អាចនិយាយបានថា វាជារឿងចៃដន្យដែលពួកយើងទាំងពីរមិនបានស្គាល់គ្នាសោះ (កញ្ញា មាស សុខសោភា និងលោកស្រី នួន ស៊ុន្ទរី) ស្គាល់គាត់តែតាម Facebook ដែលខ្ញុំឃើញគាត់ធ្វើកិច្ចការសង្គម ដល់ថ្ងៃមួយគាត់ក៏អញ្ជើញខ្ញុំមកនិយាយគ្នាដើម្បីពិភាក្សា ហើយនាងខ្ញុំក៏គិតថា ជួបគ្នាលេងតែប៉ុណ្ណោះ នៅពេលដែលបានជួបគាត់ ការសំណេះសំណាលរបស់យើងដូចជាមនុស្សដែលបានស្គាល់គ្នាយូរ ឆ្នាំមកហើយចិត្តថ្លើមរបស់គាត់គឺស្រឡាញ់សិល្បៈដោយមិនទាមទារការតបស្នងពីសិល្បៈវិញនោះទេ គឺវាដូចគោលដៅរបស់ខ្ញុំដែរ ដែលខ្ញុំជាមនុស្សស្រឡាញ់សិល្បៈ និងការងារសិល្បៈ ។ ដូចនេះនៅពេលខ្ញុំបានជួបជាមួយផលិតករ ផលិតកម្មដែលមានទុនសម្រាប់លើកកម្ពស់លើ វិស័យសិល្បៈ និងវប្បធម៌ខ្មែររបស់យើង ភ្លាមៗខ្ញុំបានគិតថា ខ្ញុំមិនត្រូវបោះបង់ចោលឱកាសមាសរបស់ខ្ញុំក្នុងការសហការជាមួយផលិតកម្ម រាម នោះទេ ។ ហើយខ្ញុំមានអារម្មណ៍ថា មានសន្តិភាព មានសុវត្ថិភាព នៅពេលដែលខ្ញុំបានជួបគាត់តាំងតែពីដំបូងមកម្ល៉េះ ។
ដោយឡែកលោកស្រី នួន ស៊ុន្ទរី ដែលជាអគ្គនាយិកាផលិតកម្មរាម បានឱ្យដឹងថា ៖ «ជាការពិត ផលិតកម្ម រាម មិនមែនដើម្បីអាជីវកម្មនោះទេ ពីព្រោះខ្ញុំបានដាក់ដើមទុនច្រើនណាស់ មិនទាន់បានចំណេញមកវិញនោះទេ ។ ហើយផលិតកម្មបានដាក់ទុនលើសម្ភារៈទំនើបៗ និងស្ទូឌីយោធំណាស់ មិនត្រឹមតែប៉ុណ្ណោះយើងក៏មានកន្លែងសម្រាប់បណ្តុះបណ្តាលអ្នកដែលស្រឡាញ់ខាងសិល្បៈផងដែរ ។ យើងក៏បានបណ្តាក់ទុនដើម្បីបង្កើតរឿងខ្នាតធំ ព្រោះយើងចង់នាំភាពយន្ត របស់យើងចេញទៅក្រៅប្រទេស ហើយយើងបានធ្វើរួចរាល់ហើយ នៅតែរង់ចាំថ្ងៃចេញនោះទេ ។ រីឯបទចម្រៀងដែលយើងបានផលិតរួចហើយរបស់បងស្រី មាស សុខសោភា គឺជាបទដែលមានគុណភាព ដូចនេះការបង្កើតផលិតកម្មនេះឡើង គឺយើងលើកស្ទួយសិល្បៈ ជាក់ស្តែង គឺយើងផ្តោតលើសិល្បៈបុរាណជាធំ អុីចឹងយើងមានច្រើនចំណុចដែលលើកស្ទួយ យើងចាយទុន ជាច្រើនដោយក្តីស្រឡាញ់» ។ លោកស្រី នួន ស៊ុន្ទរី បានបញ្ជាក់ថា ការផលិតចម្រៀង គឺសំដៅលើគុណភាព មិនយកបរិមាណនោះទេ ដោយការផលិតអាចប្រើរយៈពេលយូរបន្តិច ដូចនេះនៅពេលដែលយើងមានបទចម្រៀងដែលពីរោះ ល្អ បទភ្លេងដែលល្អ បូករួមជាមួយតារាចម្រៀងដែលមានបទពិសោធន៍ និងមានប្រជាប្រិយភាពស្រាប់ ។
នៅក្នុងពិធីដ៏អធិកអធមនេៈផងដែរ តារាចម្រៀងសំឡេងផ្អែម មាស សុខសោភា ក៏ត្រូវបានម្ចាស់ផលិតកម្ម រាម បំពាក់មកុដជូនដែលមកុដនោះមានឈ្មោះថា «តារាចម្រៀងស្រីសំឡេងធម្មជាតិ» ធ្វើឱ្យនាងមានក្តីរំភើបយ៉ាងខ្លាំង ។ ជាមួយគ្នានេះគេក៏បានឃើញតារាចម្រៀងប្រុសល្បីឈ្មោះលោក ដួង វីរៈសិទ្ធ បង្ហាញខ្លួន ហើយក៏ជាតារាចម្រៀងប្រុសនៅក្នុងផលិតកម្ម រាម នេះផងដែរ ។ ចំពោះបទចម្រៀងដំបូងរបស់កញ្ញា មាស សុខសោភា នៅក្នុងផលិតកម្ម រាម មានចំណងជើងថា «ត្រឡប់» ដែលត្រូវបានផលិតឡើងយ៉ាងសម្រិតសម្រាំងបំផុត ហើយក៏បានបញ្ចេញជាផ្លូវការនៅក្នុងថ្ងៃសម្ពោធនោះផងដែរ ។
គួរបញ្ជាក់ផងដែរថា ផលិតកម្ម រាម គឺផ្តោតសំខាន់លើគុណភាពជាចំបង ប្រយោជន៍រួម ការងារជាក្រុម ដំណោះស្រាយជាធំ និងលើកកម្ពស់ជនជាតិកម្ពុជាជាអតិភាព ។ ហើយ រាម ជាផលិតកម្មបែបកម្សាន្តដែលនឹងនាំវិស័យនេះទៅកាន់ទីផ្សារពិភពលោក ។ រាម ដឹកនាំវិស័យផលិតកម្មដោយប្រើនូវបច្ចេកវិជ្ជាទំនើបទាន់សម័យចុងក្រោយរបស់ពិភពលោកមកផលិតភាពយន្តខ្នាតតូច ធំ វីដេអូឯកសារ ចម្រៀង ស្ប៉តពាណិជ្ជកម្ម និងកម្មវិធីផ្សេងៗប្រកបដោយគុណភាពស្តង់ដារ ។ រាម ជាផលិតកម្មដែលមានសេវាកម្មពេញលេញ ពីដើមដល់ចប់សម្រាប់បំពេញតម្រូវការរបស់អាជីវករ និងម្ចាស់ផលិតផលទាំងអស់បាន ៕ ដោយសហការ
ចែករំលែកព័តមាននេះ