រាជធានីភ្នំពេញ ៖ សម័យកាលមុនការទូទាត់ចំណាយសម្រាប់ប្រតិបត្តិការអាជីវកម្មមិនថា តិច ឬច្រើន គឺគេទូទាត់ជាលុយសុទ្ធតែសម័យកាលកាន់តែវិវឌ្ឍន៍ បច្ចេកវិទ្យាក៏កាន់តែទំនើប ការទូទាត់ចំណាយសម្រាប់ប្រតិបត្តិការអាជីវកម្មត្រូវបានផ្លាស់ប្តូរពីការប្រើប្រាស់លុយសុទ្ធមកជាការប្រើប្រាស់សេវាធនាគារជំនួសវិញដើម្បីសុវត្ថិភាព លឿន មានទំនុកចិត្ត…
រាជធានីភ្នំពេញ ៖ សម័យកាលមុនការទូទាត់ចំណាយសម្រាប់ប្រតិបត្តិការអាជីវកម្មមិនថា តិច ឬច្រើន គឺគេទូទាត់ជាលុយសុទ្ធតែសម័យកាលកាន់តែវិវឌ្ឍន៍ បច្ចេកវិទ្យាក៏កាន់តែទំនើប ការទូទាត់ចំណាយសម្រាប់ប្រតិបត្តិការអាជីវកម្មត្រូវបានផ្លាស់ប្តូរពីការប្រើប្រាស់លុយសុទ្ធមកជាការប្រើប្រាស់សេវាធនាគារជំនួសវិញដើម្បីសុវត្ថិភាព លឿន មានទំនុកចិត្ត និងភាពងាយស្រួល ។ ជាមួយគ្នានេះដែរធនាគារតែងតែផ្តល់ជូននូវជម្រើសក្នុងការបើកគណនីមានច្រើនប្រភេទសម្រាប់ឱ្យអតិថិជនជ្រើសរើសថែមទៀតផង ជាក់ស្តែងក្នុងនោះ ធនាគារ អេស៊ីលីដា ភីអិលស៊ី បានផ្តល់ជូនអតិថិជននូវគណនីមួយប្រភេទដែលមានឈ្មោះថា គណនីចរន្តផ្លើស (Current Account Plus) ។
គណនីចរន្តផ្លើសនេះ គឺជាគណនីចរន្តមួយប្រភេទដែលធនាគារនេះផ្ដល់អត្រាការប្រាក់ដល់អតិថិជនដែលបានរក្សាប្រាក់បញ្ញើក្នុងគណនីតាមចំនួនដែលបានកំណត់ ហើយគណនីនេះអនុញ្ញាតឱ្យអតិថិជនអាចដាក់ ឬដកប្រាក់បានតាមតម្រូវការ និងគ្រប់ពេលវេលា ។
លោកស្រី សុខ សោភា នាយិកាប្រតិបត្តិទីផ្សារ ធនាគារ អេស៊ីលីដា ភីអិលស៊ី បានឱ្យដឹងថា ពីមុនការប្រើប្រាស់គណនីចរន្ត (Current Account) គឺអតិថិជនមិនទទួលបានការប្រាក់នោះទេ ហើយអាចប្រើប្រាស់ពេលណាក៏បានតាមរយៈការប្រើមូលប្បទានបត្រ (សែក) ទៅឱ្យដៃគូរបស់គាត់ ។ ឥឡូវនេះជាមួយនឹងគណនីចរន្តផ្លើស (Current Account Plus) អតិថិជននៅតែធ្វើបានដូចមុនដដែលដោយមិនមានការប្រែប្រួលនោះទេ ហើយថែមទាំងទទួលបានការប្រាក់បន្ថែមទៀត ដែលពីមុនគណនីចរន្តមិនមានការប្រាក់នោះទេ តែឥឡូវនេះជាមួយគណនីចរន្តផ្លើស គឺគាត់ទទួលបានការប្រាក់ ដូច្នេះគាត់ប្រើប្រាស់សាច់លុយរបស់ខ្លួនរឹតតែមានប្រសិទ្ធភាព ហើយកាន់តែមានអត្ថប្រយោជន៍បន្ថែមទៀត ហើយមិនចាំបាច់ខ្វល់ថា ត្រូវផ្ទេរលុយពីគណនីចរន្តទៅគណនីបញ្ញើសន្សំ (Saving Account) ដើម្បីទទួលបានការប្រាក់នោះទេ ព្រោះគណនីចរន្តផ្លើស និងគណនីបញ្ញើសន្សំ (Saving Account) គឺបានការប្រាក់ដូចគ្នា ។
អតិថិជនអាចស្នើសុំបើកគណនីជាប្រាក់រៀល ប្រាក់ដុល្លារអាមេរិក និងប្រាក់បាតថៃ ហើយត្រូវស្នើសុំជាវមូលប្បទានបត្រដើម្បីប្រើប្រាស់តាមគោលការណ៍ ។ អតិថិជនអាចដាក់ប្រាក់បញ្ញើក្នុងគណនីតាមចំនួនកំណត់ដែលអាចទទួលបានអត្រាការប្រាក់ ឬតាមលទ្ធភាពជាក់ស្តែង ។ ចំពោះមធ្យោបាយក្នុងការដាក់ប្រាក់រួមមាន ៖ ការដាក់សាច់ប្រាក់ ឬមូលប្បទានបត្រនៅតាមបញ្ជរ ម៉ាស៊ីន CRM ឬផ្ទេរប្រាក់ចូលតាមរយៈសេវាធនាគារអេឡិចត្រូនិក ឬឌីជីថល ឬសេវាបញ្ជាអចិន្ត្រៃយ៍ថេរ (Standing Order) ជាដើម ៕
ចែករំលែកព័តមាននេះ