ស្រុកព្រៃនប់ ៖ បើតាមសេចក្តីរាយការណ៍បឋមបានឱ្យដឹងថា ខណៈពេលនេះប្រជាពលរដ្ឋរាប់សិបនាក់បានកំពុងនាំគ្នាដងយកប្រេងដែលហូរតាមប្រឡាយ ស្របតាមផ្លូវជាតិលេខ៣ ជិតទីប្រជុំជនវាលរេញ ស្ថិតក្នុងភូមិបឹងវែង ឃុំវាលរេញ ។
បើតាមសមត្ថកិច្ចបានបញ្ជាក់ថា ប្រេងទាំងនេះមានប្រភពមកពីធ្លាយរថយន្តស៊ីទែនដឹកប្រេង ដែលចេញពីស្ថានីយប្រេងមួយកន្លែងនៅជាប់នឹងសួនច្បារររង្វង់មូលវាលរេញ ចម្ងាយប្រមាណជាង៣០០ម៉ែត្រ ។
សមត្ថកិច្ចបានបន្ថែមថា បើតាមម្ចាស់ស្ថានីយបានប្រាប់ថា ប្រេងនេះជាប្រេងម៉ាស៊ូតចំនួនប្រមាណជា៣០០០លីត្រ ដែលធ្លាយចេញពីស៊ីទែននៅក្នុងស្ថានីយ មូលហេតុដោយសារតែខុសលក្ខណៈបច្ចេកទេសនៅស្ថានីយប្រេង ទើបបណ្តាលឱ្យប្រេងម៉ាស៊ូតហូរចេញពីស្ថាននីយតាមប្រឡាយនេះតែម្តង ។
សេចក្តីរាយការណ៍បន្តទៀតថា ពាក់ព័ន្ធនឹងករណីខាងលើនេះ ទាំងម្ចាស់ស្ថានីយ និងសមត្ថកិច្ច មិនមានការហាមប្រាមមិនឱ្យប្រជាពលរដ្ឋនាំគ្នាដងប្រេងនោះឡើយ ហើយបើគិតរហូតមកដល់បច្ចុប្បន្ន ត្រឹមម៉ោងជាង១រសៀល ថ្ងៃទី២៩ ខែធ្នូនេះ ប្រជាពលរដ្ឋកំពុងតែនាំគ្នាដងយកប្រេងដែលហូរតាមប្រឡាយនោះនៅឡើយទេ ។ (កែសម្រួលដោយ ៖ បុប្ផា)
ចែករំលែកព័តមាននេះ