ខេត្តសៀមរាប ៖ ថ្លែងមតិស្វាគមន៍ចំពោះវត្តមានរបស់ក្រុមអ្នកស្ម័គ្រចិត្តផ្តល់ឈាមប្រមាណ ជាង១០០នាក់ នាព្រឹកថ្ងៃទី២១ ខែធ្នូ នាចុងសប្តាហ៍កន្លងមកនេះ នៅមជ្ឈមណ្ឌលផ្តល់ឈាមដែលមានទីតាំងនៅក្នុងមន្ទីរពេទ្យបង្អែកខេត្តសៀមរាប ។ លោកវេជ្ជបណ្ឌិត…
ខេត្តសៀមរាប ៖ ថ្លែងមតិស្វាគមន៍ចំពោះវត្តមានរបស់ក្រុមអ្នកស្ម័គ្រចិត្តផ្តល់ឈាមប្រមាណ ជាង១០០នាក់ នាព្រឹកថ្ងៃទី២១ ខែធ្នូ នាចុងសប្តាហ៍កន្លងមកនេះ នៅមជ្ឈមណ្ឌលផ្តល់ឈាមដែលមានទីតាំងនៅក្នុងមន្ទីរពេទ្យបង្អែកខេត្តសៀមរាប ។
លោកវេជ្ជបណ្ឌិត ក្រុស សារ៉ាត់ ប្រធានមន្ទីរសុខាភិបាលខេត្តបានឱ្យដឹងថា ឆ្នាំ២០១៩នេះ សកម្មភាពការងាររបស់មជ្ឈមណ្ឌលផ្តល់ឈាមមានការកើនឡើងរហូតដល់ទៅ៤ដង បើធៀបទៅនឹងឆ្នាំ២០១៥ ដែលជាឆ្នាំមុនបង្កើតមជ្ឈមណ្ឌលផ្តល់ឈាមនេះឡើង ។ លោកប្រធានមន្ទីរបានបញ្ជាក់ឱ្យដឹងថា ធនាគារឈាមរបស់មន្ទីរពេទ្យបង្អែកខេត្តសៀមរាប ពុំមានដាច់ស្តុកទៀតទេ រាល់ករណីនៃការប្រើប្រាស់ឈាមរបស់មន្ទីរពេទ្យពុំមានការលក់ដូរនោះឡើយ !ហើយឆ្នាំ២០១៩នេះ ការប្រមូលឈាមបានចំនួនជាង៤ ពាន់ប្លោក ច្រើនជាងឆ្នាំ២០១៨ ដែលប្រមូលបានត្រឹមតែជាង ៣ពាន់ប្លោកប៉ុណ្ណោះ ។
លោកប្រធានមន្ទីរសុខាភិបាលខេត្តសៀមរាប មានប្រសាសន៍ថា ពិតជាចាំបាច់ណាស់ សម្រាប់ពាក្យថា អរគុណដ៏ជ្រាលជ្រៅបំផុត និងការស្ងើចសរសើរ ចំពោះសប្បុរសជនទាំងអស់ ដែលបានចំណាយទាំងពេលវេលា និងទឹកចិត្តបរិច្ចាគឈាមដែលជាចលនាមនុស្សធម៌ មានតម្លៃមិនអាចកាត់ថ្លៃបាន ។
ក្នុងនោះដែរលោក កៅ គីវុធ នាយកសាខា ហត្ថាកសិករ ប្រចាំខេត្តសៀមរាប លើកឡើងថា នេះគឺជាការចូលរួមមួយក្នុងសកម្មភាពសង្គមរបស់ហត្ថកសិករ ក្រោមប្រធានបទ ផ្តល់ឈាម ដើម្បីជួយ សង្គ្រោះជីវិតមនុស្ស និងផ្តល់សេចក្តីស្រឡាញ់ ។ មានប្រាក់មិនអាចទិញជីវិតមនុស្សបានទេ តែឈាមអាចជួយសង្គ្រោះជីវិតមនុស្សបាន ហើយការផ្តល់ឈាមគ្មានកត្តាណាមួយដែលត្រូវព្រួយបារម្ភនោះឡើយ តែឈាមដែលមិនអាចផ្តល់បាន ឬឈាមដែលគ្រូពេទ្យបដិសេធមិនទទួលយកនោះទេ ដែលជាកត្តាត្រូវព្រួយបារម្ភនោះ ៕
ចែករំលែកព័តមាននេះ