ខេត្តកំពត ៖ ក្រោយពីលោកស្នងការដ្ឋាននគរបាលខេត្តកំពត បានចេញបទបញ្ជាឲ្យបុរស ដែលបង្ហោះរូបភាព កំពុងឈរបាញ់នោម ជាមួយរូបសេះសមុទ្រ ចូលខ្លួនរួចមក រសៀលថ្ងៃទី២៥ ខែមេសា…
ខេត្តកំពត ៖ ក្រោយពីលោកស្នងការដ្ឋាននគរបាលខេត្តកំពត បានចេញបទបញ្ជាឲ្យបុរស ដែលបង្ហោះរូបភាព កំពុងឈរបាញ់នោម ជាមួយរូបសេះសមុទ្រ ចូលខ្លួនរួចមក រសៀលថ្ងៃទី២៥ ខែមេសា ឆ្នាំ២០២៤នេះ លោក ម៉ៅ ធនិន អភិបាលខេត្តកំពត បានអនុញ្ញាតឲ្យលោក ស៊ុំ សារុន (ហៅសាន់តា) SantaKH ឈ្មោះប្រើប្រាស់ក្នុងហ្វេសប៊ុក ចូលជួប ដើម្បីធ្វើការសុំទោស នូវកំហុសឆ្គង ដែលបានថតរូប ដោយគ្មានសីលធម៌ ជាមួយរូបសំណាកសេះសមុទ្រ ក្នុងក្រុងកំពត ថ្មីៗនេះ ។
លោកអភិបាលខេត្ត បានធ្វើការអប់រំណែនាំ ក្នុងនាមជាបង ដើម្បីឲ្យលោក ត្រូវធ្វើជាយុវជនល្អក្នុងសង្គម ហើយផ្សព្វផ្សាយអ្វី ដែលល្អឲ្យបានច្រើន ហើយធ្វើការផ្សព្វផ្សាយសុំទោសធ្វើបែបណាក៏ដោយឲ្យបងប្អូនប្រជាពលរដ្ឋគាត់ឈប់ខឹង និងលើកលែងទោសឲ្យ ហើយឈប់ប្រព្រឹត្តអ្វីដែលខុសបន្តទៀត ។
សូមជម្រាបដែរថា យោងតាមផេកផ្លូវការរបស់ស្នកការដ្ឋាននគបាលខេត្តកំពត បានសរសេយ៉ាងដូច្នេះថា «មុខមាត់ស្អាតបាទ តែគ្មានសីលធម៌ក្នុងខ្លួន លោកឯងគិតថា ការថតបែបនេះជាការត្រឹមត្រូវដែរឬទេ! នេះជាទង្វើរគ្មានសីលធម៌ នឹងជាគំរូអាក្រក់ ហើយគឺនេះជាការម៉ាក់ងាយមកលើការខិតខំប្រឹងប្រែងរបស់ថ្នាក់ដឹកនាំខេត្តខ្ញុំ សូមលោកលុបរូបនេះចេញជាបន្ទាន់»។
ម្ចាស់ហ្វេសប៊ុកដែលបង្ហោះរូបភាពមានឈ្មោះថា «SanTakh» ។ រូបភាពនេះ ត្រូវអ្នកលេងបណ្តាញសង្គមជាច្រើន បានស៊ែចែកចាយគ្នាបន្តបន្ទាប់ ដោយបានរិះគន់ នូវទង្វើ ដែលមិនគប្បី ពោលគឺមានភាពម៉ាក់ងាយដល់ថ្នាក់ដឹកនាំ ដែលខិតខំកសាងរូបសេះសមុទ្រ ដើម្បីទាក់ទាញភ្ញៀវទេសចរ ទៅលេងឲ្យបានច្រើនផងដែរ ។
យ៉ាងណាក្តី ក្រោយពីមានប្រតិកម្មចំពោះរូបភាពនេះ ម្ចាស់ហ្វេសប៊ុកបានចេញមុខសុំទោសជាសាធារណៈ និងទទួលកំហុសរបស់ខ្លួន។ ដោយម្ចាស់ហ្វេសប៊ុករូបនេះ បានសរសេរយ៉ាងដូច្នេះថា៖ «ជាដំបូង សូមគោរពដល់ថ្នាក់ដឹកនាំ និងសូមគោរពបងប្អូនខ្មែរយើងទូទាំងប្រទេស ។ ខ្ញុំបាទ ស៊ុំ សារុន (ហៅសាន់តា) សូមចេញមុខដឹង នូវកំហុសឆ្គង ដែលបានថតរូបមិនគប្បីជាមួយរូបសំណាកសេះសមុទ្រ ដោយអចេតនា ខ្ញុំពិតជាសុំទោសបងប្អូនជនរួមជាតិ សុំទោស ដែលខ្ញុំថតរូបខ្វះការគិត បង្ហាញកាយវិការមិនល្អ មកពីខ្ញុំ ពុំសូវមានចំណេះដឹង គិតមិនបានវែងឆ្ងាយ» ។
លោកបន្តថា ទាក់ទងនឹងរូបភាពបែកធ្លាយ គឺជារូបភាពខ្ញុំ ថតកម្សាន្ត Copy Style តាមបងប្អូន និងបានយកមកដាក់ Story លេងនៅម៉ោង១២យប់ តែ៣នាទី ក៏លុបវិញភ្លាមៗ ព្រោះគិតថា រូបមានសកម្មភាពមិនសមរម្យ សម្រាប់ការថតរូបនេះ គឺពិតជាគ្មានគោលបំណងមើលងាយរូបសំណាកសេះសមុទ្រ របស់ប្រទេសខ្ញុំឡើយ ។
លោកបញ្ជាក់ថា «កំហុសមួយនេះ ខ្ញុំនឹងចងចាំអស់មួយជីវិត មិនឲ្យមានលើកក្រោយ និងសង្ឃឹមថា បងប្អូនជនរួមជាតិរបស់ខ្ញុំអត់អោនឲ្យមនុស្សគ្មានការអប់រំដូចខ្ញុំបាទ» ៕
ចែករំលែកព័តមាននេះ