រាជធានីភ្នំពេញ ៖ បើតាមសេចក្តីរាយការណ៍បឋមបានឱ្យដឹងថា ចោរជើងចាស់ម្នាក់ក្នុងចំណោមបក្សពួកគ្នា៣នាក់ ត្រូវសមត្ថកិច្ចចាប់ខ្លួនបាន បន្ទាប់ពីនាំគ្នាជិះម៉ូតូកង់បីដើរធ្វើសកម្មភាពលួចកាច់.កម៉ូតូបានសម្រេច តែយកមិនបាន ព្រោះតែប៉ះចំម្ចាស់ជានិស្សិតវ័យក្មេងបានផ្តាច់ខ្សែប៊ុយហ្ស៊ីបង្ហូរសាំងចេញអស់ ហើយឃើញក្រុមជនសង្ស័យអូសបណ្តើរចេញ ក៏ស្រែកឆោឡោផ្អើលប្រជាពលរដ្ឋដេញព័ទ្ធចាប់បានម្នាក់ និងរត់គេចបាត់២នាក់ កាលពីម៉ោង៣និង៣០នាទីទៀបភ្លឺចូលថ្ងៃទី២២ ខែធ្នូ ឆ្នាំ២០១៩ នៅចំណុចផ្ទះជួល តាមផ្លូវ៣៧១ ភូមិអូបែកក្អម សង្កាត់អូបែកក្អម ខណ្ឌសែនសុខ ។
សេចក្តីរាយការណ៍បន្តថា ជនសង្ស័យចាប់ខ្លួនបានខាងលើ ឈ្មោះ ប៉ុន ទិត្យ ភេទប្រុស អាយុ២១ឆ្នាំ មុខរបរដើរលួច ស្នាក់នៅផ្ទះជួល ស្ថិតក្នុងភូមិទួលពង្រ សង្កាត់ចោមចៅ១ ខណ្ឌពោធិ៍សែនជ័យ ។ ចំណែកម៉ូតូដែលជនសង្ស័យលួច ម៉ាកលេត ពណ៌ស ពាក់ស្លាកលេខ ភ្នំពេញ 1FC-5467 មានម្ចាស់ជាជនរងគ្រោះ ឈ្មោះ អ៊ួន សាវរក្សា ភេទប្រុស អាយុ១៩ឆ្នាំ មុខរបរជានិស្សិត ស្នាក់នៅភូមិពោងពាយ សង្កាត់ទួលសង្កែ ខណ្ឌឬស្សីកែវ ។
តាមសម្តីជនរងគ្រោះបានឲ្យដឹងថា មុនកើតហេតុ ខ្លួនបានជិះម៉ូតូមកផ្ទះជួលមិត្តភក្តិ ដោយចតម៉ូតូចាក់សោទុកខាងក្រោម តែបានផ្តាច់ខ្សែប៊ុយហ្សីបង្ហូរសាំងច្រកដបទុកយកតាមខ្លួន រួកក៏ឡើងទៅលេងនៅជាន់ទី៣ ស្រាប់តែនៅម៉ោងកើតហេតុខាងលើ ជនសង្ស័យ ៣នាក់ជិះម៉ូតូកង់បីមកកាច់សោ.កម៉ូតូបានហើយ បញ្ឆេះមិនឆេះ ធាក់បណ្តើរអូសចេញ ។
ជនរងគ្រោះបន្តទៀតថា ពេលជនរងគ្រោះក៏ឮសម្លេង ដោយមានសង្ស័យក៏ចេញមកមើល ស្រាប់តែឃើញជនសង្ស័យកំពុងតែបណ្តើរអូសម៉ូតូជនរងគ្រោះចេញ ក៏ស្រែកផ្អើលឆោឡោតែម្តង ស្របពេលនោះប្រជាពលរដ្ឋក្បែរខាងបាននាំគ្នាជួយព័ទ្ធចាប់បានជនសង្ស័យម្នាក់ ចំណែកជនសង្ស័យ២នាក់ទៀត បានរត់គេចខ្លួនបាត់ស្រមោលតែម្តង ។
ក្រោយពីចាប់ជនសង្ស័យបានម្នាក់ សមត្ថកិច្ចបាននាំយកទៅសាកសួរ និងកសាងសំណុំរឿងនៅផ្នែកជំនាញខណ្ឌសែនសុខតែម្តង ៕ (កែសម្រួលដោយ ៖ បុប្ផា)
ចែករំលែកព័តមាននេះ