វា​មាន​រយៈពេល ១០ ឆ្នាំ​ហើយ​ចាប់តាំងពី​រថយន្ត Rolls-Royce Ghost ត្រូវ​បាន​ផលិត​ឡើងជា​ម៉ូ​ដែល​ទាប​ជាងគេ​ក្នុង​ត្រកូល Rolls-Royce​។ ចាប់តាំងពី​ពេល​នោះ​មក​វា​បាន​ក្លាយជា​យាន​មួយ​ដែល​លក់ដាច់​បំផុត​របស់​ក្រុមហ៊ុន ខណៈ​ពេល​ដែល​វា​ក៏​ទាក់ទាញ​អតិថិជន​ក្មេង​ៗ​ឱ្យ​និយម​រថយន្ត​ប្រណិត​ដែរ​។ ជា​ការ​ពិត​ណាស់ វា​គឺជា​ផលិតផល​សំខាន់​សម្រាប់ Rolls-Royce​។

ឆ្នាំ​ក្រោយ​រូបរាង​របស់ Rolls-Royce Ghost បច្ចុប្បន្ន នឹង​ត្រូវ​ជំនួស​វិញ​ដោយ​រូបរាង​ថ្មី ដែល​បាន​ទាក់ទាញ​ចិត្ត​របស់​អ្នក​ស្រឡាញ់​រថយន្ត និង អ្នក​យក​ព័ត៌មាន រហូត​ទាល់តែ​បែកធ្លាយ​រូប​រថយន្ត​តាម​រយៈ​ការ​លួច​ថត​។ រថយន្ត​ដែល​គេ​ថត​បាន​នោះ គឺជា​រថយន្ត​ផលិត​សាកល្បង​។

បើ​ប្រៀបធៀប​ទៅ​នឹង​ការ​មើលឃើញ​ពី​មុន​របស់​យើង រថយន្ត Rolls-Royce ជំនាន់​ថ្មី​នេះ ដែល​ត្រូវ​បាន​គេ​លួច​ថត​បាន លេច​រាង​មក​ច្បាស់​ជាង​មុន បើ​ទោះបីជា​មាន​ស្កុ​តបិត​បាំង​យ៉ាង​ក្រាស់​ប៉ុនណា​ក៏​ដោយ​។ ការ​ផលិត​អំ​ពូ​ល LED នៅ​ផ្នែក​ខាង​មុខ​និង​ខាងក្រោយ ក៏​ត្រូវ​បាន​បំពាក់​ផង​ដែរ ដែល​មើលទៅ​មាន​រាងស្តើង​ជាង​ម៉ូ​ឌែ​ល​ជំនាន់​ចុង​ក្រោយ ហើយ​ប្រហោង​ចូល​ខ្យល់​ខាង​មុខ ក៏​មាន​ទំហំ​ធំ​ជាង​មុន​ដែរ​។ ការ​រចនា​នេះ​ធ្វើ​ឡើងជា​ទ្រង់ទ្រាយ​ធំ តែ​គេ​នៅ​តែ​អាច​មើល​ស្គាល់​ថា​ជា​រថយន្ត Rolls-Royce Ghost​។

តែ​គេ​មិន​មាន​រូបថត​ថ្មី​នៃ​ផ្ទៃ​ខាងក្នុង ដែល​ត្រូវ​ចែករំលែក​នោះ​ទេ​។ តែបើ​តាម​រូបថត​បាន​ពី​មុន​ៗ យើង​បានឃើញ​ថា​ផ្នែក​ខាងក្នុង​របស់​វាស្រ​ដៀង​ទៅ​នឹង​រថយន្ត Rolls-Royce Phantom និង Rolls-Royce Cullinan​។ ជា​លទ្ធផល Ghost នឹង​មាន​បច្ចេកវិទ្យា​ជឿនលឿន​ជាង​មុន​នៅ​ផ្នែក​ខាង រួម​ទាំង​ការ​បង្ហាញ​កម្មវិធី​បញ្ជា​ឌី​ជី​ថ​ល​ពេញលេញ និង​អេ​ក្រង់​ធំ​ទូលាយ​សម្រាប់​ប្រព័ន្ធ Infotainment ។

សម្រាប់​រថយន្ត Ghost ជំនាន់​ថ្មី​នេះ នឹង​ផលិត​ដោយ​គ្រោងឆ្អឹង​អាលុយមីញ៉ូម​ប្រភេទ​ស្រាល​ជាង​ជំនាន់​បច្ចុប្បន្ន​។ ម៉ាស៊ីន​ដែល​នឹង​បំពាក់​លើ​រថយន្ត​នេះ អាច​ដូច​គ្នា​ទៅ​នឹង​ម៉ាស៊ីន​របស់​ជំនាន់​បច្ចុប្បន្ន 6.6-liter V12 ឬ​ក៏​អាច​ប្រភេទ 6.75-liter Twin-Turbo V12 ដែល​មាននៅ​លើ Phantom បច្ចុប្បន្ន​។

នៅ​ក្នុង​រថយន្ត Ghost បច្ចុប្បន្ន គេ​ប្រើប្រាស់​ម៉ាស៊ីន V12 ដែល​អាច​ផលិត​កម្លាំង​បាន ៥៦៣​សេះ​។ ចំពោះ​រថយន្ត​នឹង​ចេញ​ពេល​ខាង​មុខ​នេះ​វិញ គឺ​អាច​បង្កើន​កម្លាំង រួម​ជាមួយនឹង​ប្រព័ន្ធ All-Wheel Drive​។ របាយការណ៍​ក៏​បាន​លើក​ឡើង​ថា វា​នឹង​ប្រើប្រាស់​ប្រព័ន្ធ​អគ្គិសនី ៤៨​វ៉ុល​ដើម្បី​អនុញ្ញាត​ឱ្យ​ប្រព័ន្ធ​ការពារ​ការ​ក្រឡាប់ និង ប្រព័ន្ធ​ចង្កូត​កង់​ទាំង​៤ កាន់តែ​មាន​ភាព​ប្រសើរ​ឡើង​ទាំង​ពេល​បើក​យឺត​និង​បើក​លឿន​៕