ខេត្តបាត់ដំបង ៖ យោងតាមសេចក្ដីរាយការណ៍បានឲ្យដឹងថា ក្មេងប្រុសម្នាក់បានបាត់បង់ជីវិត នៅក្នុងឧប្បតិហេតុគ្រោះថ្នាក់ចរាចរណ៍នៅលើផ្ទៃទឹកទន្លេសាប រវាងកាណូតស្មាច់និងកាណូតស្មាច់បានបុកគ្នា កាលពីវេលាម៉ោង១០និង៤៥នាទីព្រឹកថ្ងៃទី១៣ ធ្នូ នៅចំណុចពាមអូរព្រែកទាល់ ស្ថិតក្នុងភូមិព្រែកទាល់ ឃុំកោះជីវាំង ស្រុកឯកភ្នំ។
នៅក្នុងករណីគ្រោះថ្នាក់ចរាចរណ៍លើផ្ទៃទឹកដ៏កម្រនេះ គេមិនទាន់បញ្ជាក់ពីមូលហេតុនៅឡើយទេ។ ប៉ុន្តែបើតាមប្រភពព័ត៌មានបានឲ្យដឹងថា ឧប្បតិហេតុនេះ បង្កឡើងដោយកាណូតស្មាច់ ដែលបើកបរដោយឈ្មោះ រ៉ម សំបូរ ភេទប្រុស អាយុ២៩ឆ្នាំ ជាប្រជាការពារភូមិ រស់នៅភូមិ-ឃុំកើតហេតុ ។ ប្រជាការពាររូបនេះ បានបើកកាណូតដែលគេសង្ស័យថា មានដឹកកម្លាំងនគរបាលប៉ុស្ដិ៍កោះជីវាំងផង បានបុកកាណូតស្មាច់របស់ក្មេងប្រុសម្នាក់ឈ្មោះ នី ដា អាយុ១៤ឆ្នាំ មុខរបរជាសិស្ស រស់នៅភូមិ-ឃុំកើតហេតុខាងលើបណ្ដាលឱ្យលិចតែម្តង ។
បើតាមប្រភពដដែលបានបញ្ជាក់ថា កាណូតបង្កគ្រោះថ្នាក់នោះ ជាកាណូតរបស់មេប៉ុស្តិ៍កោះជីវាំង តែប្រជាការពារឈ្មោះរ៉ម សំបូរ ជាអ្នកបើក ។ ប៉ុន្តែគេមិនបានបញ្ជាក់ប្រាប់ការបើកបរយ៉ាងដែលនាំឲ្យមានគ្រោះថ្នាក់នេះទេ។
កោះសន្តិភាពក៏មិនអាចសុំការបំភ្លឺពីលោកមេប៉ុស្ដិ៍កោះជីវាំងបានភ្លាមៗទេ ជុំវិញករណីនេះ។ ប៉ុន្តែក្រោយកើតហេតុ មន្ត្រីចរាចរណ៍ជើងទឹកប្រចាំតំបន់នោះ បានចុះទៅកាន់កន្លែងកើតហេតុដើម្បីចាត់ការតាមនីតិវិធីហើយ ៕
ចែករំលែកព័តមាននេះ