រាជធានីភ្នំពេញ ៖ ក្រសួងធនធាទឹក និងឧតុនិយមបានឲ្យដឹងថា ចាប់ពីថ្ងៃទី១០ ដល់ថ្ងៃទី១៦ ខែធ្នូ ប្រទេសកម្ពុជានឹងបន្តទទួលភាពត្រជាក់ចាប់ពី១៧ដល់១៩អង្សាសេ។
នេះបើយោងតាមសេចក្តីជូនដំណឹងរបស់ក្រសួងធនធានទឹកបានឲ្យដឹងនៅថ្ងៃទី៩ ខែធ្នូ ឆ្នាំ២០១៩ ស្ដីពីស្ថានភាពធាតុអាកាស ចាប់ពីថ្ងៃទី១០ ដល់ថ្ងៃទី១៦ ខែធ្នូ ឆ្នាំ២០១៩ លើកឡើងថា តាមរយៈការតាមស្ថានភាពធាតុអាកាសជាប់បន្ត សង្កេតឃើញថា ចាប់ពីថ្ងៃទី១០ ខែធ្នូ ឆ្នាំ២០១៩ ឥទ្ធិពលជ្រលងសម្ពាធខ្ពស់ដែលបានគ្រប់ដណ្តប់លើកម្ពុជានោះ នឹងចុះ ថមថយដោយរំកិលឡើងលើទៅជាលំដាប់ ។
ក្រសួងធនធានទឹក និងឧតុនិយម បានបន្តថា ស្ថានភាពបែបនេះ ធ្វើឲ្យធាតុអាកាសនៅកម្ពុជា ចាប់ពីថ្ងៃទី១០ -១៣ ខែធ្នូ ឆ្នាំ២០១៩ នៅខេត្តឧត្តរមានជ័យ ព្រះវិហារ ស្ទឹងត្រែង រតនគិរី មណ្ឌលគិរី និងខេត្តប៉ៃលិន សីតុណ្ហភាពអប្បបរមា មានពី ១៧-១៩ °C និងសីតុណ្ហភាពបអតិបរមា មានពី ២៤-២៦ °C ។
នៅខេត្តបន្ទាយមានជ័យ សៀមរាប បាត់ដំបង កំពង់ធំ ពោធិ៍សាត់ ក្រចេះ និងខេត្តកោះកុងសីតុណ្ហភាពអប្បបរមាមានពី ១៩ -២១ °C និងសីតុណ្ហភាពអតិបរមាមានពី ២៥-២៧ °C។
នៅខេត្តកំពង់ស្ពឺ កំពង់ឆ្នាំង កណ្តាល ព្រៃវែង ស្វាយរៀង កំពង់ចាម ត្បូងឃ្មុំ និងរាជធានីភ្នំពេញ សីតុណ្ហភាពអប្បបរមា មានពី ២០-២២°C សីតុណ្ហភាពអតិបរមា មានពី ២៧-២៩ °C។
នៅខេត្តតាកែវ កែប កំពត និងខេត្តព្រះសីហនុ សីតុណ្ហភាពអប្បបរមា មានពី ២២ -២៤ °C និងសីតុណ្ហភាពអតិបរមា មានពី ២៨-៣០ °C។
ក្រសួងធនធានទឹក និងឧតុនិយម ក៏បានឲ្យដឹងទៀតថា ចាប់ពីថ្ងៃទី ១៤-១៦ ខែធ្នូ ឆ្នាំ ២០១៩ នៅបណ្តាខេត្តជាប់ក្បែរតំបន់ជួរភ្នំដងរែក និងខ្ពង់រាប សីតុណ្ហភាពអប្បបរមា – មានពី ២១-២៣ °C និងសីតុណ្ហភាពអតិបរមា មានពី ២៨ -៣១ °C។ បណ្តាខេត្តនៅតំបន់វាលទំនាបកណ្តាល និងតំបន់មាត់សមុទ្រ សីតុណ្ហភាព អប្បបរមា មានពី ២២-២៥°C និងសីតុណ្ហភាពអតិបរមា មានពី ២៩-៣២°C។
ដោយផ្អែកការតាមដានអាកាសធាតុនេះ ក្រសួងធនធានទឹក និងឧតុនិយម សូមបងប្អូនប្រជាពលរដ្ឋ ជាពិសេស វីរៈកងទ័ពដែលឈរជើងនៅតាមបន្ទាត់ព្រំដែនក្នុងភូមិសាស្ត្រតំបន់ជួរភ្នំដងរែក និងខ្ពង់រាបឦសាន សូមបន្តប្រុងប្រយ័ត្នបង្ការ និងថែរក្សាសុខភាព ពីធាតុអាកាស ដែលអាចនៅត្រជាក់នេះ ចាប់ពីថ្ងៃទី ១០-១៣ ខែធ្នូ ឆ្នាំ២០១៩៕ (កែសម្រួលដោយ ៖ បុប្ផា)
ចែករំលែកព័តមាននេះ