ADផ្ទាំងផ្សព្វផ្សាយពាណិជ្ជកម្ម

Picture

ផ្ទុះ​អធិករណ៍​ប្រឆាំង​ការ​តែងតាំង​ចៅ​អធិ​ការ​

4 ឆ្នាំ មុន

ខេត្តព្រៃវែង ៖ គណៈកម្មការ​អាចារ្យវត្ត ព្រមទាំង​ប្រជា​ពុទ្ធបរិស័ទ​ចំណុះ​ជើងវត្ត​ពន្លៃ ប្រមាណ​ជិត​៤០០​នាក់ នាំ​គ្នា​ធ្វើការ​ប្រឆាំង​តវា​៉​ការ​ប្រកាស​តំណែង​ចៅអធិការ​វត្ត​ពន្លៃ ដោយ​ប្រជាពុទ្ធបរិស័ទ​ចោទប្រកាន់​ថា ភិក្ខុ សាំង គឹ​ម​ឃុន…

ខេត្តព្រៃវែង ៖ គណៈកម្មការ​អាចារ្យវត្ត ព្រមទាំង​ប្រជា​ពុទ្ធបរិស័ទ​ចំណុះ​ជើងវត្ត​ពន្លៃ ប្រមាណ​ជិត​៤០០​នាក់ នាំ​គ្នា​ធ្វើការ​ប្រឆាំង​តវា​៉​ការ​ប្រកាស​តំណែង​ចៅអធិការ​វត្ត​ពន្លៃ ដោយ​ប្រជាពុទ្ធបរិស័ទ​ចោទប្រកាន់​ថា ភិក្ខុ សាំង គឹ​ម​ឃុន អតីត​ចៅអធិការ​វត្ត​ពន្លៃ​នេះ បាន​ចាកចេញ​ចោល​វត្ត​តាំងពី​ថ្ងៃ​ចូល​ព្រះ​វស្សា​ម្ល៉េះ ។ ព្រម​ទាំង​នាំ​សង្ឃ​ចេញពី​វត្ត​៥​អង្គ​ទៅ​គង់នៅ​ក្រៅ​ខេត្ត ដោយ​ទុក​វត្ត​ចោល​ជាង​១១​ខែ និង​បាន​នាំ​យក​ទាំង​បរិក្ខារ របស់​វត្ត​ទៅ​អស់​គ្មាន​សល់​ទៀត​ផង ។

ទើប​ពេល​នេះ​គណៈកម្មការ​អាចារ្យវត្ត​និង​ប្រជា​ពុទ្ធបរិស័ទ​មិន​ព្រម​ទទួលយក​ភិក្ខុ សាំង គឹ​ម​ឃុន ធ្វើ​ជា​ចៅអធិការ​វត្ត​ជា​ថ្មី​ទៀត​ឡើយ ខណៈ​ព្រះ​អនុគណ​ស្រុក​មេ​សាង ព្រមទាំង​ព្រះ​វិន័យធរ លោក ឈុំ ឈា អភិបាលរង​ស្រុក​មេ​សាង លោក តេត សារី ប្រធាន​ការិយាល័យ​ធម្មការ​ស្រុក និង​មន្ត្រី​សង្ឃ​បាន​មក​ប្រកាស​តែងតាំង​ព្រះ​តេជគុណ សាំង គឹ​ម​ឃុន ជា​ព្រះ​ចៅអធិការ​វត្ត​ពន្លៃ​ឡើង​វិញ ទើប​ផ្ទុះ​អធិករណ៍​រហូត​ដល់​កើត​ហិង្សា​យ៉ាង​ច្រងេងច្រងាង​ពេញ​វត្ត ។

ពុទ្ធបរិស័ទ​ចូល​ឆក់​យក​សេចក្តីសម្រេច​តែងតាំង​របស់​ព្រះ​មេគណ​ខេត្ត​មក​ហែក​ចោល​និង​ដណ្តើម​ត្រា​យក​ទៅ​ចាក់ចោល ព្រមទាំង​មាន​ប្រទាញប្រទង់​ស្បង់​ចីវរ​ព្រះសង្ឃ​ទៀត​ផង ដេញ​មិន​ឱ្យ​គង់​នៅទេ ។ ការ​ផ្ទុះ​អធិករណ៍​នៅ​វត្ត​ពន្លៃ​នេះ បាន​កើតឡើង​កាលពី​វេលា​ម៉ោង​៩​និង​១០​នាទី​ព្រឹក ថ្ងៃ​ទី​៤ ធ្នូ នៅ​វត្ត​ពន្លៃ ឃុំ​អង្គរ​ទ្រេត ស្រុក​មេ​សាង ខេត្តព្រៃវែង ។ លោក វ៉ា​ន់ យឿ​ន ប្រធាន​គណៈកម្មការ​អាចារ្យវត្ត​ពន្លៃ​បាន​ឲ្យ​ដឹង​ថា មូលហេតុ​នាំ​ឲ្យ​មាន​អធិករណ៍​នេះ​កើតឡើង​ដោយសារ​ព្រះ​តេជគុណ សាំង គឺ​ម​ឃុន អតីត​ចៅអធិការ​វត្ត​ពន្លៃ​បាន​ចុះ​ចោល​វត្ត ព្រមទាំង​នាំ​ព្រះសង្ឃ​៥​អង្គ ចេញពី​វត្ត​កាលពី​ថ្ងៃ​ទី​១៧ មិថុនា ២០១៨ វេលា​ម៉ោង​៨​ព្រឹក​មុន​ថ្ងៃ​ចូល​ព្រះ​វស្សា​១​ថ្ងៃ ។

ព្រះ​តេជគុណ​បាន​នាំ​ព្រះសង្ឃ​ទាំង​៥​អង្គ​ទៅ​គង់នៅ​ខេត្ត​ឧត្ត​មាន​ជ័យ ធ្វើ​ឲ្យ​វត្ត​ពន្លៃ​គ្មាន​ព្រះសង្ឃ​គង់នៅ​សម្រាប់​ប្រជា​ពុទ្ធបរិស័ទ​ធ្វើបុណ្យ​ទាន​ឡើយ ហើយ​បាន​នាំ​យក​បរិក្ខារ​និង​បច្ច័យ​សម្រាប់​កសាង​វត្ត​ទៅ​បាត់ ដោយ​មាន​បំណង​ឲ្យ​វត្ត​ពន្លៃ​បរាជិក ទើប​គណៈកម្មការ​គ្រូអាចារ្យ​វត្ត​បាន​ទៅ​និមន្ត​ព្រះសង្ឃ​ព្រះ​នាម ឆូ​យ ដែល​មានស្រុក​កំណើត​នៅ​ក្នុងភូមិ​ពន្លៃ ក្រុង​ប៉ោយ​បែ​ត ខេត្តបន្ទាយមានជ័យ​មក​គង់នៅ​ចាំ​ព្រះ​វស្សា​វត្ត​ពន្លៃ​បន្ត ។

ក្រោយមក​នៅ​ថ្ងៃ​ទី​១០ សីហា ២០១៨ បាន​និមន្ត​ព្រះ​អនុគណ​ព្រះ​នាម​បិណ្ឌ​តោ ហ៊ិ​ន សុខុម និង​ព្រះ​គ្រូ​អនុ​វិន័យធរ និង​លោក​អនុប្រធាន​ការិយាល័យ​ធម្មការ​និង​សាសនា​ស្រុក បាន​ចាត់តាំង​ព្រះ​តេជគុណ ឆូវ គង់​នៅ​ជា​ព្រះ​ចៅអធិការ​វត្ត​ស្តីទី ដើម្បី​គ្រប់គ្រង​វត្ត​បន្ត ។ ចំណែក​ព្រះ​តេជគុណ សាំង គឹ​ម​ឃុន បាន​និមន្ត​ចេញពី​វត្ត​រយពេល​១១​ខែ​គឺ​ពី​ខែមិថុនា ២០១៨ លុះ​មក​ដល់​ថ្ងៃ​ទី​១៨ ឧសភា ២០១៩ ទើប​និមន្ត​ត្រឡប់​មក​វិញ ហើយ​ពេល​ត្រឡប់​មក​វិញ​ក៏​មិន​បាន​ប្រាប់​គណៈកម្មការ​អាចារ្យវត្ត​ដែរ ។ ដូច្នេះ​ប្រជា​ពុទ្ធបរិស័ទ​ចំណុះ​ជើងវត្ត​ពន្លៃ​ចំនួន​៤០០​គ្រួសារ មិន​អាច​ទទួល​ព្រះ​តេជគុណ អង្គ​នេះ​ធ្វើ​ជា​ចៅអធិការ​វត្ត​ពន្លៃ​តទៅ​ទៀត​ទេ ។

ទាក់ទិន​ករណី​នេះ​ដែរ លោក តេត សារី ប្រធាន​កា​រិ​យាយ​ល័យ​ធម្មការ​និង​សាសនា​ស្រុក​មេ​សាង បាន​មាន​ប្រសាសន៍​ថា ព្រះ​តេជគុណ សាំង គឹ​ម​ឃុន ពិតជា​បាន​ចេញពី​វត្ត​ពន្លៃ​ទៅ​គង់នៅ​ខេត្ត​ឧត្ត​មាន​ជ័យ ពិត​ប្រាកដ​មែន​ដោយ​បាន​សុំ​ព្រះ​អនុគណ​ទៅ​រៀន ក៏​ប៉ុន្តែ​ព្រះសង្ឃ​៥​អង្គ​ទៀត បាន​និមន្ត​ទៅ​តាម​ទើប​វត្ត​គ្មាន​ព្រះសង្ឃ​គង់នៅ​ចាំ​ព្រះ​វស្សា​ក្នុង​វត្ត ។ ទាក់ទិន​ករណី​នេះ​ដែរ​ព្រះ​អនុគណ​ស្រុក​មេ​សាង​បាន​មាន​ថេរ​ដីកា​ថា វិន័យ​សង្ឃ​គឺ​ព្រះសង្ឃ​អង្គ​ណា​មាន​ព្រះ​ជន្ម​ចាស់វស្សា​ជាង គឺ​ធ្វើ​ជា​គ្រូ​ចៅអធិការ តែ​បរិ​ស​ទ័​មិន​យល់ព្រម​ទើប​ផ្ទុះ​អធិករណ៍ ខណៈ​លោក ឈុំ ឈា អភិបាលរង​ស្រុក​មេ​សាង​លួច​ប្រគល់​ត្រា​ទៅ​ឲ្យ​ព្រះ​តេជគុណ សាំង គឹ​ម​ឃុន ទើប​ផ្ទុះ​ហិង្សា​តែ​ម្តង ៕

អត្ថបទសរសេរ ដោយ