ខេត្តកំពង់ឆ្នាំង ៖ និស្សិតមួយក្រុមដែលបញ្ចប់ការសិក្សាផ្នែកកសិកម្មបែបទំនើបនៅប្រទេសអ៊ីស្រាអែល បានរួមគ្នាបង្កើតកសិដ្ឋានមួយកន្លែងឈ្មោះកសិដ្ឋាន (អេដេនហៃត្រូបូនិច) ក្នុងគោលបំណងផ្គត់ផ្គង់ទីផ្សារ ដែលត្រូវការបន្លែគ្មានសារធាតុគីមី និងចង់ឲ្យប្រជាពលរដ្ឋបោះបង់ការទទួលទានបន្លែមានសារធាតុគីមី មកទទួលទានបន្លែ ដើម្បីសុខភាពជំនួសវិញ…
ខេត្តកំពង់ឆ្នាំង ៖ និស្សិតមួយក្រុមដែលបញ្ចប់ការសិក្សាផ្នែកកសិកម្មបែបទំនើបនៅប្រទេសអ៊ីស្រាអែល បានរួមគ្នាបង្កើតកសិដ្ឋានមួយកន្លែងឈ្មោះកសិដ្ឋាន (អេដេនហៃត្រូបូនិច) ក្នុងគោលបំណងផ្គត់ផ្គង់ទីផ្សារ ដែលត្រូវការបន្លែគ្មានសារធាតុគីមី និងចង់ឲ្យប្រជាពលរដ្ឋបោះបង់ការទទួលទានបន្លែមានសារធាតុគីមី មកទទួលទានបន្លែ ដើម្បីសុខភាពជំនួសវិញ ។ ម្យ៉ាងវិញទៀតបងប្អូនដែលមានធនធានល្មម ឬគ្មានធនធានសោះចង់រៀនពីបច្ចេកទេសបែបនេះពួកគាត់ជាក្រុមនិសិត្សនឹងជួយបង្រៀនបានដោយឥតគិតថ្លៃ ។
លោក ចាប វិបុល ជាម្ចាស់កសិដ្ឋានខាងលើបានឲ្យដឹងថា ពួកគាត់បានទទួលការសិក្សារយៈពេល២ឆ្នាំនៅប្រទេសអ៊ីស្រាអែល ផ្នែកកសិកម្មបែបទំនើបក្នុងនោះមានទាំងការដាំបន្លែលើទឹក ការចិញ្ចឹមសត្វ និងអ្វីផ្សេងទៀតដែលទាក់ទងដល់កសិកម្ម ។ ពេលនេះបានរួមគ្នាបង្កើតកសិដ្ឋានមួយកន្លែងមានឈ្មោះថា (អ៊ីដែនហៃត្រូបូនិក) ។ កសិដ្ឋានដាំបន្លែលើទឹកខ្នាតតូចមួយនេះបានចាប់ផ្ដើមនៅខែកញ្ញា មកដល់ពេលនេះមានរយៈពេលប្រមាណ៣ខែហើយទទួលបានលទ្ធផលល្អប្រសើរមានអតិថិជនគាំទ្រយ៉ាងច្រើន ។ ប៉ុន្តែលោកបដិសេធការកុំម្មង់ទិញចំនួនច្រើនពីក្រុមហ៊ុនមួយចំនួនដែលមកកុំម្ម៉ង់ទិញពីកសិដ្ឋានគាត់ ព្រោះតែការផលិតរបស់គាត់មិនទាន់បំពេញសេចក្តីតម្រូវការទីផ្សារធំនៅឡើយ ។
ចំពោះបច្ចេកទេសនៃការដាំបន្លែលើទឹកក្នុងកសិដ្ឋានរបស់ពួកគាត់ គឺនាំចូលនូវឧបករណ៍ពីបរទេសដូចជា ទុយោសម្រាប់ដាក់ដាំបន្លែ គឺបាននាំចូលនូវផលិតផលថ្មីចុងក្រោយដែលអាចសន្សំសំចៃទឹក និងមានគុណភាពដល់ឬសបន្លែបានល្អ ។ ផ្នែកដំបូល និងជញ្ជាំង កសិដ្ឋាន គឺប្រក់ដោយស្បៃ (យូវី) ការពារកំដៅផង និងការសត្វល្អិតបំផ្លាញផង ។ ចំណែកនៅផ្ទៃបាតខាងក្រោម គឺចាក់សាបការពារសត្វល្មូន និងសត្វបំផ្លាញផ្សេងៗជាងនេះទៅទៀតនៅផ្នែកខាងលើរងបន្លែក៏មានទុយោបាញ់ទឹកដោយស្វ័យប្រវត្តិ ដើម្បីរក្សាកម្តៅមួយដែលយើងចង់បាន ។
លោក ចាប វិបុល បានបន្តទៀតថា ចំពោះប្រជាពលរដ្ឋដែលមានធនធាន និងមានបំណងចង់បើក កសិដ្ឋានដូចពួកគាត់ ឬខ្លះមានធនធានតិចតួច និងខ្លះទៀតគ្មានទាល់តែសោះក៏អាចមកទទួលការបណ្ដុះបណ្ដាលពីពួកគាត់បានដែរ ដើម្បីយកទៅធ្វើជាកសិកម្មខ្នាតតូច ឬដាំតាមផ្ទះសម្រាប់ទទួលទានជាលក្ខណៈគ្រួសារ ដើម្បីសុខភាពសុខភាពក៏បានដែរ ។ ជាចុងក្រោយលោកសូមអំពាវនាវដល់ប្រជាពលរដ្ឋទាំងអស់សូមងាកមកទទួលទានបន្លែដែលគ្មានសារធាតុគីមី ដើម្បីសុខភាពរស់នៅប្រចាំថ្ងៃ ។
សូមបញ្ជាក់ដែរថា កសិដ្ឋាន ដាំបន្លែលើទឹកខាងលើ ស្ថិតនៅភូមិត្រពាំងចឹក្សា សង្កាត់កំពង់ឆ្នាំង ក្រុងកំពង់ឆ្នាំង ត្រូវបានទទួលស្គាល់ដោយមន្ទីរកសិកម្មរុក្ខាប្រមាញ់ និងនេសាទខេត្តថា ជាកិសដ្ឋាន ដាំបន្លែគ្មានសារធាតុគីមី ហើយបានផ្ដល់ឱកាសឲ្យចូលរួមជាមួយសហគមន៍លក់បន្លែជារៀងរាល់៣ថ្ងៃក្នុងមួយសប្ដាហ៍ នៅផ្សារសហគមន៍កសិកម្ម គ្មានសារធាតុគីមី ក្នុងផ្សារភូមិទួលក្រឡាញ់សង្កាត់កំពង់ឆ្នាំង ដែលមានលក់នៅថ្ងៃសុក្រ សៅរ៍ និងថ្ងៃអាទិត្យ ៕ កែសម្រួលដោយ ៖ សុឃាក់
ចែករំលែកព័តមាននេះ