បើយើងសិក្សាឱ្យស៊ីជម្រៅនឹងមើលឃើញថា ព្រះពុទ្ធសាសនាគឺជាផែនដីដ៏ជាក់លាក់មួយសម្រាប់នាំសត្វលោកដែលដើរតាមឲ្យទៅដល់គោលដៅយ៉ាងគួរឱ្យពេញចិត្ត គួរជាទីរីករាយ ឬថាជាមធ្យោបាយដ៏សមស្របសម្រាប់ដោះស្រាយនូវរាល់បញ្ហាជីវិតរបស់មនុស្សគ្រប់វ័យ គ្រប់ប្រភេទមិនថាអតីតៈ បច្ចុប្បន្ន ឬអនាគត គឺព្រះពុទ្ធសាសនាបានផ្តល់សេចក្តីសុខ ឬហៅថាជាទីឋានប្រជុំនៃសេចក្តីសុខមិនរើសសម័យកាលឡើយ ។
កាលបើបុគ្គលប្រតិបត្តិតាមពុទ្ធឱវាទក្នុងវេលាណា ក៏ឱ្យផលក្នុងវេលានោះមិនបាច់រង់ចាំជាតិមុខឬជាតិក្រោយឡើយ ប្រៀបបីដូចជាទឹកស្រះថ្លាដ៏ត្រជាក់ ឲ្យតែយើងដងយកមកចាក់លើកាយខណៈណា ក៏ផ្ដល់ឲ្យនូវភាពត្រជាក់ខណៈនោះភ្លាម ។
ជារួមមកព្រះធម៌ ឬព្រះពុទ្ធសាសនាក៏អាចជួយដោះស្រាយនូវបញ្ហាជីវិតសត្វលោកដើម្បីកាត់បន្ថយការតានតឹងក្នុងអារម្មណ៍បាន ព្រះធម៌គឺជាគោលនៃជីវិត កាលបើបុគ្គលណាប្រាសចាកធម៌ ជីវិតបុគ្គលនោះក៏នឹងដល់នូវក្តីវិបល្លាស វិកលចរិត ប្រាសចាកគុណប្រយោជន៍ជាក់ជាមិនខាន ។ ដោយសាន សារិន
ចែករំលែកព័តមាននេះ