រាជធានីភ្នំពេញ ៖ អ្នកជំនាញបាននិយាយថា ប្រជាជនកម្ពុជាបានមើលរំលងមុខរបរតូចមួយដែលត្រូវការដើមទុន ដើម្បីធ្វើការដាំដុះ ប៉ុន្តែស្រួលរកទីផ្សារ ។ នោះ គឺការដាំស្លឹកគ្រៃលក់ ។
អ្នកស្រី តុង ចាន់ឃាង នាយកមជ្ឈមណ្ឌលសិក្សា និងអភិវឌ្ឍន៍កសិកម្មកម្ពុជាហៅកាត់ថា អង្គការសេដាក់ (CEDAC) បានឲ្យដឹងថា បន្លៃស្លឹកគ្រៃនេះបានមានទីផ្សារខ្ពស់ ហើយត្រូវបានអាជីវករនាំយកពីទីក្រុងភ្នំពេញទៅលក់នៅតាមផ្សារបណ្តាខេត្តចំនួនទៅវិញ ។ ស្លឹកគ្រៃដែលមានលក់នៅទីផ្សារភ្នំពេញមួយចំនួនត្រូវបានគេនាំយកពីប្រទេសជិតខាង និងមួយចំនួនទៀតរបស់កសិករនៅជិតភ្នំពេញបានដាំ ។
ពោល គឺប្រជាកសិករដែលនៅក្បែរប្រភពទឹកដូចជា នៅខាងកោះដាច់ ខ្សាច់កណ្តាល ។ល។ អ្នកស្រីក៏បានឲ្យដឹងថា តាមសិក្សាបន្លែស្លឹកគ្រៃដែលនាំយកពីភ្នំពេញទៅលក់នៅបណ្តាផ្សារនីមួយៗមានចំនួន១០០ ឬ២០០ គីឡូក្រាមទៅតាមផ្សារតូចធំ ។ អ្នកស្រីបញ្ជាក់ថា ៖«អីញ្ចឹងទីផ្សារមានតម្រូវការបន្លៃស្លឹកគ្រៃ អីញ្ចឹងបានយើងនាំកសិករដាំ ដើម្បីយកទៅលក់នៅតាមទីផ្សារនោះ ។ ប៉ុន្តែបន្លៃស្លឹកគ្រៃនេះតម្រូវការឲ្យមានការរៀបចំសម្អាតបានត្រឹមត្រូវមុននឹងយកមកលក់ទីផ្សា» ។
អ្នកស្រីក៏បានឲ្យដឹងថា ស្លឹកគ្រៃចាប់ពីដាំរហូតដល់៦ ឬ៧ខែ ទើបទទួលផល ដោយបច្ចុប្បន្ននេះក្នុង១គីឡូតម្លៃលក់បោះដុំបានចំនួន១ពាន់រៀល ។ ដូច្នេះបើត្រូវដឹកទៅកាន់ទីផ្សារភ្នំពេញ ត្រូវមានចំនួនច្រើនទៅលក់ទើបទទួលបានប្រាក់ច្រើន ។ ជាមួយគ្នានោះដែរ អ្នកស្រីក៏បានលើកកង្វល់ថា កសិករក៏មានការពិបាកក្នុងការយកបន្លែស្លឹកគ្រៃទៅលក់ទៅទីផ្សារ ដោយសារទីផ្សារនៅឆ្ងាយពីកន្លែងដាំ ព្រោះថា បើដឹកយកទៅលក់នឹងត្រូវការសាហ៊ុយច្រើន ហើយយកផលិតផលតិចនោះមិនចំណេញទេ ។ ប៉ុន្តែបើកសិករមានទីតាំងដាំនៅជិតផ្សារ គឺល្អព្រោះថា ទីផ្សារជិតតម្លៃខ្ពស់នោះកសិករ និងចំណេញ ។
អ្នកស្រីបន្ថែមថា បន្លែស្លឹកគ្រៃមិនសូវទាមទារការថែមទាំងដូចដំណាំផ្សេងនោះទេ ។ ហើយ ប្រជាកសិករមួយចំនួនបានចាប់អារម្មណ៍ដាំបន្លែស្លឹកគ្រៃនេះ តែប្រជាកសិករមួយភាគធំមានការពិបាកដោយសារខ្វះទឹក ដើម្បីស្រោច ។ ស្លឹកត្រូវការទឹក ដូច្នេះបើមិនមានទឹកស្រោច ពិសេសនោះនៅខែប្រាំងគ្មានទឹកស្រោចទេវានឹងត្រូវខូចអស់ ។
អ្នកស្រីក៏បានឲ្យដឹងថា ខាងអង្គការសេដាក់បានធ្វើការបណ្តុះបណ្តាលដល់ប្រជាកសិករ ស្ថិតក្នុងការសាកល្បងតែប៉ុណ្ណោះ ក្នុងនោះមានទាំងបច្ចេកទេសដាំដុះ ដើម្បីនាំចូលទីផ្សារទទួលបានតម្លៃខ្ពស់ផងដែរព្រោះថា ទីផ្សារស្លឹកគ្រៃក៏មានការប្រកួតប្រជែងផងដែរ ។ អ្នកស្រីបញ្ជាក់ថា «ប្រសិនបើយើងដាំមិនតាមស្តង់ដាទីផ្សារទេនឹងពិបាកទទួលការយកទិញ ព្រោះត្រូវប្រកួតប្រជែងនឹងស្លឹកគ្រៃនាំចូលពីប្រទេសជិតខាងដែលមានដើមសវែងល្អ ។
បញ្ហាបច្ចេកទេសដាំស្លឹកគ្រៃនេះដែរក៏ទាមទារឲ្យយើងពង្រឹងបច្ចេកទេសដាំដុះ ដើម្បីទទួលបានគុណភាពល្អ ។ លើសពីនេះត្រូវចេះរៀបវេចខ្ចប់យកទៅលក់ក្នុងទីផ្សារ» ៕ កែសម្រួលដោយ ៖ សុឃាក់
ចែករំលែកព័តមាននេះ