រាជធានីភ្នំពេញ ៖ ក្រសួងមហាផ្ទៃបានប្រតិកម្មចំពោះការផ្សាយរបស់វិទ្យុអាស៊ីសេរីដែលបានផ្សាយថា សម្តេច ក្រឡាហោម ស ខេង បញ្ជាឲ្យចាប់ខ្លួនអ្នកអមដំណើរលោក សម រង្ស៊ី…
រាជធានីភ្នំពេញ ៖ ក្រសួងមហាផ្ទៃបានប្រតិកម្មចំពោះការផ្សាយរបស់វិទ្យុអាស៊ីសេរីដែលបានផ្សាយថា សម្តេច ក្រឡាហោម ស ខេង បញ្ជាឲ្យចាប់ខ្លួនអ្នកអមដំណើរលោក សម រង្ស៊ី ចូលស្រុកវិញទោះបីជនពិការក៏ដោយ ។ យោងតាមសេចក្តីបំភ្លឺរបស់អ្នកនាំពាក្យក្រសួងមហាផ្ទៃចេញផ្សាយ នៅថ្ងៃទី០២ នេះ លើកឡើងថា ក្នុងការផ្សាយព័ត៌មានជាវីដេអូរបស់វិទ្យុអាស៊ីសេរី នៅថ្ងៃទី២៩ ខែវិច្ឆិកា ឆ្នាំ២០១៩ បានចោទប្រកាន់មិនត្រឹមត្រូវមកលើសម្តេចក្រឡាហោម ស ខេង រដ្ឋមន្ត្រីក្រសួងមហាផ្ទៃថា បានបញ្ជាឲ្យចាប់ខ្លួនរាល់មុខសញ្ញាដែលចូលរួមដំណើរទទួលដំណើរលោក សម រង្ស៊ី ដោយ មិនយល់មុខ ជាជនពិការ អ្នកស្រែចំការ ឬអ្នកដែលគ្រាន់តែបញ្ចេញមតិ នៅលើបណ្តាញ សង្គម Facebook …។
អ្នកនាំពាក្យក្រសួងមហាផ្ទៃសម្តែងការសោកស្តាយចំពោះពាក្យខ្វះការពិត និងគ្មានគុណធម៌សោះ ហើយចាត់ទុកថា ការផ្សព្វផ្សាយរបស់វិទ្យុអាស៊ីសេរីបែបបនេះអាចនាំឲ្យសាធារណៈជនមានការយល់ច្រឡំលើការដឹកនាំរបស់សម្តេច ក្រឡាហោម និងក្រសួងមហាផ្ទៃថា បានធ្វើការដោយឥតក្រែងរអែង និងមិនគោរពច្បាប់ទម្លាប់ជាធរមានក៏ដូចជា មានន័យថា កម្ពុជាមិនមែនជាប្រទេសប្រកាន់នីតិរដ្ឋ ។
អ្នកនាំពាក្យក្រសួងមហាផ្ទៃ សូមគូសបញ្ជាក់ថា៖«សម្តេចក្រឡាហោម ស ខេង ក្នុងឋានៈជាឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃនៃរាជរដ្ឋាភិបាលកម្ពុជាកើតចេញពីការបោះឆ្នោតតាមបែបប្រជាធិបតេយ្យតែងតែគោរពជាដរាបតាមរដ្ឋធម្មនុញ្ញកម្ពុជា ហើយក្នុងឋានៈនេះ សម្តេចតែងតែផ្តោតការយកចិត្តទុកដាក់ ជាពិសេសលើមាត្រា៤១ នៃរដ្ឋធម្មនុញ្ញដែលចែងថា ប្រជាពលរដ្ឋខ្មែរមានសេរីភាពខាងការបញ្ចេញមតិរបស់ខ្លួន សេរីភាពខាងសារព័ត៌មានសេរីភាពខាងការបោះពុម្ពផ្សាយ សេរីភាពខាងការប្រជុំ ។ ជនណាក៏ដោយមិនអាចឆ្លៀតជ្រើសសិទ្ធិនេះ ដោយរំលោភនាំឲ្យប៉ះពាល់ដល់កិត្តិយសរបស់អ្នកដទៃដល់ទំនៀមទម្លាប់ល្អរបស់សង្គមដល់សណ្តាប់ធ្នាប់សាធារណៈ និងដល់សន្តិសុខជាតិបានឡើយ» ។
អ្នកនាំពាក្យបានបញ្ជាក់ថា៖« ក្នុងនាមជាអ្នកទទួលខុសត្រូវលើស្ថាប័នបម្រើឲ្យការងារថែរក្សាសន្តិសុខ សណ្តាប់ធ្នាប់សាធារណៈ និងសុវត្ថិភាពសង្គម សម្តេចតែងតែណែនាំដល់មន្ត្រីក្រោមឱវាទ និងកងកម្លាំងពាក់ព័ន្ធទាំងអស់ត្រូវធ្វើសកម្មភាពឲ្យបានត្រឹមត្រូវតាមផ្លូវច្បាប់ និងត្រូវជៀសវាងដាច់ខាតនូវការប្រើប្រាស់អំពីហិង្សា» ។
ប្រភពបន្តថា ការផ្សាយខុសផ្សេងៗទៀត ដែលមិនគួរឲ្យជឿនោះ គឺវិទ្យុនេះបាននិយាយថា កងរាជអាវុធហត្ថស្ថិតក្រោមការគ្រប់គ្រងរបស់ក្រសួងមហាផ្ទៃ ។ នេះជាការចុះផ្សាយខុសស្រឡះ ហើយហាក់មានចេតនាមិនល្អមកលើសម្តេចក្រឡាហោម ។ ម្យ៉ាងទៀត សូម្បីតែភូមិកំណើត ក៏វិទ្យុនេះមិនស្រាវជ្រាវឲ្យច្បាស់សិនសឹមផ្សាយនោះទេ ។ តាមពិតភូមិកំណើតរបស់សម្តេចក្រឡាហោម គឺឈ្មោះភូមិអណ្តូងស្អាត (អណ្តូងបុរាណដែលមានទឹកថ្លាស្អាត) ពុំមានឈ្មោះភូមិអណ្តូងស្នាក ស្ថិតក្នុងឃុំក្របៅ ស្រុកកំចាយមារ ខេត្តព្រៃវែងនោះទេ ។
អ្នកនាំពាក្យក្រសួងមហាផ្ទៃនៅតែទទួចអំពាវនាវឲ្យវិទ្យុអាស៊ីសេរីត្រូវផ្សព្វផ្សាយព័ត៌មានពិត ប្រកបដោយ វិជ្ជាជីវៈថ្លៃថ្នូរ មានការទទួលខុសត្រូវខ្ពស់ព្រមទាំងធ្វើឲ្យសារធារណជនបានទទួលនូវព័ត៌មានពិត និងត្រឹមត្រូវ ដែលមានផលប្រយោជន៍ដល់សង្គមជាតិកម្ពុជា ៕
ចែករំលែកព័តមាននេះ