រាជធានីភ្នំពេញ ៖ ជនសង្ស័យចំនួន២នាក់ប្រដាប់ដោយអាវុធខ្លី១ដើមបានជិះម៉ូតូ១គ្រឿងដេញតាមពីក្រោយស្ត្រីម្នាក់ដែលកំពុងជិះម៉ូតូមួយគ្រឿងម្នាក់ឯងត្រឡប់មកពីយកបាយឲ្យម្ដាយ បន្ទាប់មកក្រុមជនសង្ស័យធ្វើសកម្មភាពភ្ជង់ប្លន់យកម៉ូតូមួយគ្រឿងបានសម្រេច ហើយនាំគ្នាជិះម៉ូតូនោះគេចខ្លួនបាត់ដោយសុវត្ថិភាព។
ហេតុការណ៍ខាងលើនេះបានកើតឡើងកាលពីវេលាម៉ោង៧ព្រឹកថ្ងៃទី២៧ ខែវិច្ឆិកា ឆ្នាំ២០១៩ ត្រង់ចំណុចម្តុំទីតាំងលក់ទឹកត្នោតជូរ តាមផ្លូវលំ ស្ថិតក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ រាជធានីភ្នំពេញ។
ស្ត្រីរងគ្រោះខាងលើឈ្មោះឡាយ ពៅ អាយុ៣៨ឆ្នាំ មុខរបរលក់កាហ្វ ស្នាក់នៅក្នុងភូមិឃុំកើតហេតុខាងលើ ។ ចំណែកម៉ូតូមួយគ្រឿងដែលក្រុមជនសង្ស័យយកទៅបាត់ម៉ាកហុងដាស្គូពី ពណ៌ក្រហម ពាក់ស្លាកលេខ ភ្នំពេញ ១HI-៥៤៦៤ ដែលទើបនឹងទិញបាន១អាទិត្យ ហើយក៏ទើបតែកឹបស្លាកលេខកាលពីថ្ងៃទី២៦ ខែវិច្ឆិកា ។ រីឯជនសង្ស័យទាំង២នាក់ខាងលើមិនស្គាល់អត្តសញ្ញាណនោះទេ ប្រដាប់ដោយអាវុធខ្លីមិនស្គាល់ម៉ាក១ដើម និងជិះម៉ូតូ១គ្រឿងមិនស្គាល់ម៉ាកផងដែរ។
តាមប្រភពពីស្ត្រីរងគ្រោះខាងលើបានប្រាប់ឲ្យដឹងថា មុនពេលកើតហេតុ គាត់បានជិះម៉ូតូមួយគ្រឿងម៉ាកហុងដាស្គូពីដើម្បីយកបាយម្ហូបទៅជូនម្តាយនៅម្តុំជិតបន្ទាយកងរាជអាវុធហត្ថកងរថពាសដែក ក្នុងភូមិទួលពង្រ ។
តាមប្រភពដដែលបានបន្តឱ្យដឹងថា លុះពេលត្រឡប់មកវិញ ខណៈគាត់កំពុងតែជិះម៉ូតូធ្វើដំណើរម្នាក់ឯង ស្រាប់តែមានជនសង្ស័យ២នាក់ជិះម៉ូតូ១គ្រឿងតាមពីក្រោយគាត់រហូតដល់ចំណុចកើតហេតុខាងលើដែលជាកន្លែងស្ងាត់ ក្រុមជនសង្ស័យបានកៀរឲ្យឈប់ បន្ទាប់មកជនសង្ស័យម្នាក់ដែលជិះខាងក្រោយបានលោតចុះ រួចដកកាំភ្លើងខ្លីពុំស្គាល់ម៉ាកពីចង្កេះភ្ជង់គម្រាមបាញ់ និងស្រែកឲ្យគាត់ចុះចេញពីម៉ូតូ ។ ខណៈនោះធ្វើឱ្យគាត់មានការភិតភ័យខ្លាំងណាស់ក៏បានចុះពីលើម៉ូតូរត់ចេញ ព្រោះខ្លាចជនសង្ស័យបាញ់ ហើយជនសង្ស័យក៏បានជិះម៉ូតូរបស់គាត់គេចខ្លួនទៅបាត់ដោយសុវត្ថិភាព។
ក្រោយពេលកើតហេតុ ក៏មានប្រជាពលរដ្ឋជាអ្នកដំណើរតាមផ្លូវបានទៅដល់ និងជួយរាយការណ៍ជូននគរបាលឲ្យចុះមកពិនិត្យកន្លែងកើតហេតុ រួចជួយដឹកស្ត្រីរងគ្រោះទៅកាន់ប៉ុស្តិ៍នគរបាលចោមចៅ១ ព្រមទាំងដាក់ពាក្យបណ្តឹងដើម្បីធ្វើការស្រាវជ្រាវស្វែងរកមុខសញ្ញាក្រុមជនសង្ស័យយកមកចាត់ការតាមច្បាប់ ៕ (កែសម្រួលដោយ ៖ ធីតា)
ចែករំលែកព័តមាននេះ