ខេត្តព្រៃវែង ៖ លាមកគោ ឬក្របី វាត្រឹមតែជាកាកសំណល់មួយប្រភេទដែលគេអាចយកទៅធ្វើជាជីធម្មជាតិសម្រាប់ដាក់ក្នុងស្រែចំការ ឬដាំដំណាំផ្សេងៗប៉ុណ្ណោះ ប៉ុន្តែសម្រាប់ប្រជាពលរដ្ឋនៅស្រុកពាមជរ និងស្រុកព្រះស្តេច ខេត្តព្រៃវែងវិញ គឺពួកគាត់អាចទាញយកប្រាក់ចំណូលបានមួយកំរិតទៀតពីលាមកសត្វទាំងនេះ…
ខេត្តព្រៃវែង ៖ លាមកគោ ឬក្របី វាត្រឹមតែជាកាកសំណល់មួយប្រភេទដែលគេអាចយកទៅធ្វើជាជីធម្មជាតិសម្រាប់ដាក់ក្នុងស្រែចំការ ឬដាំដំណាំផ្សេងៗប៉ុណ្ណោះ ប៉ុន្តែសម្រាប់ប្រជាពលរដ្ឋនៅស្រុកពាមជរ និងស្រុកព្រះស្តេច ខេត្តព្រៃវែងវិញ គឺពួកគាត់អាចទាញយកប្រាក់ចំណូលបានមួយកំរិតទៀតពីលាមកសត្វទាំងនេះ តាមរយៈការលក់លាមកសត្វគោក្របីទៅឱ្យឈ្មួញដែលមកប្រមូលទិញដល់ផ្ទះតែម្តង។
ប្រជាពលរដ្ឋនៅឃុំអង្គររាជ្យ ស្រុកព្រះស្តេច បានឱ្យដឹងថា នៅក្នុងភូមិ-ឃុំរបស់ពួកគាត់ គឺមានឈ្មួញមកដើរប្រមូលទិញលាមកគោក្របីដល់ផ្ទះ និងដល់វាស្រែតែម្តង ដោយលាមកគោក្របីក្នុង១បាវ ឬ១ទៃ អាចលក់បានតម្លៃ៣ពាន់រៀល ហើយមានប៉ុន្មានក៏គេទិញយកអស់ដែរ។ ដូច្នេះហើយ បច្ចុប្បន្ននេះ ពួកគាត់មានការងារថ្មីមួយទៀត បន្ថែមលើការងារធ្វើស្រែចំការ គឺដើរប្រមូលកើបលាមកគោក្របី ទុកលក់ឱ្យឈ្មួញ។
បើតាមស្ត្រីម្នាក់ដែលជាឈ្មួញកណ្តាល ចាំទទួលទិញលាមកគោក្របីនៅលើកំណាត់ផ្លូវជាតិលេខ៣១០ ត្រង់ចំណុចការ៉ាស់សាំងតេលា ក្នុងភូមិឩកញ៉ាឯម ឃុំអង្គររាជ្យ ស្រុកព្រះស្តេច បានឱ្យដឹងថា គាត់ប្រមូលទិញលាមកគោនៅស្រុកព្រះស្តេចនេះ ច្រើនខែមកហើយ ដោយទិញក្នុងតម្លៃ៣ពាន់រៀល ហើយមានប៉ុន្មានគាត់ទិញទាំងអស់។
បងស្រីបន្តថា ជាមធ្យមក្នុង១ថ្ងៃ គាត់ប្រមូលទិញលាមកគោក្របីបានប្រមាណជា៣២០០ទៅ៣៥០០បាវ ហើយគាត់ដឹកយកទៅលក់ចេញវិញ នៅឯខេត្តរតនគីរី និងមណ្ឌលគីរី ដែលក្នុង១បាវគាត់លក់ចេញបានពី៥ពាន់ទៅ៦ពាន់រៀល ចំណែកអ្នកដែលមកទិញលាមកគោក្របីពីគាត់ គឺប្រជាពលរដ្ឋ និងបណ្តាក្រុមហ៊ុនមួយចំនួន ដែលធ្វើចំការម្រេច។
ជាមួយគ្នានេះដែរ បងស្រីបានបញ្ជាក់ថា មុខរបរប្រមូលទិញលាមកគោនេះ គឺអាចចំណេញបានច្រើនដែរក្នុង១ជើងៗ ប៉ុន្តែ១រយៈនេះប្រាក់ចំណេញបានធ្លាក់ចុះវិញ ដោយសារតែសមត្ថកិច្ចនៅតាមដងផ្លូវច្រើនពេក ដោយចាប់រាប់ពីខេត្តព្រៃវែង រហូតដល់ខេត្តមណ្ឌលគីរី និងរតនៈគីរី រថយន្តដឹកលាមកគោ១គ្រឿង ត្រូវបង់លុយអោយសមត្ថកិច្ចនៅតាមផ្លូវចាប់ពី១លានទៅ១លាន៥សែនរៀលឯណោះ ហើយបើថ្ងៃណាមិនសូវមានសមត្ថកិច្ចនៅតាមផ្លូវទេ ក៏បង់អស់៧០ទៅ៨០ម៉ឺនរៀលដែរ។
បើទោះបីជា ការលក់លាមកគោក្របី អាចផ្តល់ជាប្រាក់ចំណូលបានខ្លះៗសម្រាប់បងប្អូនប្រជាពលរដ្ឋក្តី ប៉ុន្តែក៏មានមតិជាច្រើន បានលើកឡើងពីក្តីបារម្ភចំពោះការបាត់បង់លាមកសត្វទាំងនេះ និងជំនួសមកវិញដោយថ្នាំជីកសិកម្មផ្សេងៗ ដែលបងប្អូនប្រជាពលរដ្ឋបានទិញយកមកប្រើប្រាស់លើការងារស្រែចំការ ដែលការប្រើប្រាស់ជីកសិកម្មច្រើន វាបានធ្វើឱ្យគុណភាពដីកាន់តែធ្លាក់ចុះ ការចំណាយកាន់តែច្រើន និងបង្កផលប៉ះពាល់ទៅដល់សុខភាពទាំងអ្នកធ្វើ និងអ្នកទទួលផងដែរ៕ (កែសម្រួលដោយ ៖ បុប្ផា)
ចែករំលែកព័តមាននេះ