បើមិនសប្បាយចិត្តនៅកន្លែងធ្វើការ អ្នកគួរធ្វើដូចម្តេច

ថ្ងៃទី ០៨ ខែ វិច្ឆិកា ឆ្នាំ ២០១៩
ម៉ោង ១៥:៤៩
ណៃ ដាលីន

មនុស្សម្នាក់ៗតែងតែមានថ្ងៃដែលមានតែសំណាងអាក្រក់តាំងពីព្រឹករហូតដល់យប់ចូលដំណេក។ ជាទូទៅ មនុស្សតែងតែព្យាយាមឆ្លងផុតថ្ងៃនោះ និងសង្ឃឹមថា ថ្ងៃស្អែកជាថ្ងៃល្អជាងមុន។ ប៉ុន្តែវាមិនតែងតែដូច្នេះទេ ហើយកម្លាំងរបស់អ្នកនឹងកាន់តែចុះខ្សោយបន្តិចម្តងៗពីមួយថ្ងៃទៅមួយថ្ងៃ និងមួយសប្តាហ៍ទៅមួយសប្តាហ៍ រហូតអ្នកចាប់ផ្តើមមានអារម្មណ៍ថា អ្នកមិនសប្បាយចិត្តនឹងការងាររបស់ខ្លួន។

សម្រាប់មនុស្សដែលជោគជ័យ ពួកគេមិនអង្គុយចាំរហូតដល់អារម្មណ៍នេះបាត់បង់ដោយខ្លួនឯងទេ។ ផ្ទុយមកវិញ ពួកគេធ្វើសកម្មភាពដើម្បីផ្លាស់ប្តូរវា។ អ្នកក៏អាចធ្វើបានដែរដោយសាកល្បងវិធានខាងក្រោមនេះ៖

១. តាមដាន ៖ ពេលដែលអ្នកមានអារម្មណ៍ថា មិនសប្បាយចិត្ត ឬមិនពេញចិត្តនឹងការងារ អ្នកភាគច្រើនព្យាយាមមើលរំលងវា និងគិតថា វាមិនមែនជារឿងធ្ងន់ធ្ងរដែលគួរគិត។ ប៉ុន្តែការពិតជាក់ស្តែង ការមានអារម្មណ៍បែបនេះ នៅកន្លែងការងារ អាចបង្កផលប៉ះពាល់ជាច្រើនដល់អ្នក។

ដោយហេតុដូច្នេះទើបអ្នកគួរតែរៀនតាមដានអារម្មណ៍របស់ខ្លួន។ រាល់ពេលដែលអ្នកមានអារម្មណ៍ដូចខាងលើ អ្នកគួរសួរខ្លួនឯងដើម្បីដឹងពីមូលហេតុដែលបង្កឲ្យខ្លួនមានអារម្មណ៍ទាំងនេះ។

២. វិភាគ ៖ មនុស្សជាច្រើនចូលចិត្តទម្លាក់កំហុសទៅលើមនុស្សដទៃ ឬកត្តាដទៃដែលមិនទាក់ទិននឹងខ្លួន។ ប៉ុន្តែប្រសិនបើបញ្ហាត្រូវបានបង្កឡើងព្រោះតែបញ្ហាជំនឿចិត្ត ឬបញ្ហាផ្លូវចិត្តនោះ អ្នកត្រូវតែដោះស្រាយវា ជាមុនសិនទើបអាចផ្លាស់ប្តូរស្ថានការបាន។

៣. ជឿជាក់លើខ្លួនឯង ៖ ប្រសិនបើការវិភាគរបស់អ្នករកឃើញថាការងារ មិត្តរួមការងារ ឬស្ថាប័នការងាររបស់អ្នកមិនសាកសម នឹងអ្នកនោះអ្នកគួរមានជំនឿចិត្តក្នុងការដើរចេញ។ បើបញ្ហាមិនទាក់ទងទៅនឹងតម្លៃ និងតួនាទីរបស់អ្នកទេនោះ វាប្រហែលជាដល់ពេលក្នុងការរកឱកាសដទៃទៀតហើយ។

តែប្រសិនបើអ្នកនៅតែស្រលាញ់កន្លែងការងារនេះ តែគិតថា អ្នកត្រូវតែសកម្មជាងមុនក្នុង ការបង្កើតឱកាស សម្រាប់ខ្លួននោះ ចូរអានចំណុចបន្ទាប់។

៤. បង្កើតផែនការ ៖ មិនថា អ្នកសម្រេចចិត្តស្វែងរកឱកាសការងារថ្មី ឬកំពុងតែពិចារណាលើការធ្វើការរបស់ខ្លួនសាជាថ្មីទេ អ្នកត្រូវតែចេញសកម្មភាព។ ប៉ុន្តែជាដំបូងគឺអ្នកត្រូវមានផែនការច្បាស់លាស់មុននឹងចាប់ផ្តើមអនុវត្តវា។

អ្វីដែលអ្នកត្រូវចងចាំ គឺអ្នកមានថាមពលច្រើនជាងអ្នកដឹង ហើយពិភពអាជីវកម្ម គឺទទួលទម្លាប់ ប្តូរការងារ ពីកន្លែងមួយទៅកន្លែងមួយដែរ ខណៈដែលក្រុមហ៊ុនដែលជោគជ័យចង់ឲ្យបុគ្គលិកខ្លួនមានភាពសកម្ម។ ប្រែសម្រួលដោយ ៖ ណៃ ដាលីន (កែសម្រួលដោយ ៖ បុប្ផា)