រាជធានីភ្នំពេញ ៖ អ្នកមានបំណងចង់ចិញ្ចឹមកន្ធាយក៏ដូចជាឲ្យមានគុណភាពល្អ អ្នកត្រូវសិក្សាអំពីចំណេះ ដឹងជាមូលដ្ឋានសំខាន់ គឺបច្ចេកទេសជ្រើសរើសពូជ វិធីថែទាំ ធ្វើអាងចិញ្ចឹមកន្ធាយឲ្យបានសមស្រប ។ សត្វកន្ធាយ នាពេលបច្ចុប្បន្នកំពុងពេញនិយមសម្រាប់យកទៅធ្វើអាហារក្នុងកម្មវិធីជប់លៀងផ្សេងៗផងដែរ ។
លោក ហេង ម៉ាទីណេ ម្ចាស់កសិដ្ឋានចិញ្ចឹមកន្ធាយវិហារសួគ៌ដ៏ធំ នៅភូមិស្វាយមាស ឃុំវិហារសួគ៌ ស្រុកខ្សាច់កណ្តាល ខេត្តកណ្តាលបានរៀបរាប់ពីធ្វើអាងចិញ្ចឹម ។
លោករៀបរាប់ថា អាងចិញ្ចឹមកន្ធាយចាំបាច់មានផ្ទៃក្រឡាជាង១០ម៉ែត្រការ៉េ ធ្វើអំពីឥដ្ឋនិងក្រាលសុីម៉ង់ត៍ កម្រិតទឹកមានជម្រៅ០,៦ទៅ១ម៉ែត្រ ត្រូវមានលូបញ្ចេញទឹក មាត់បើកដោយសំណាញ់ដែក ដើម្បីរក្សាកម្រិតទឹកឲ្យស្ថិតនៅក្នុងកម្រិតខ្ពស់បំផុត ហើយមានលូបង្ហូរទឹកនៅបាតអាង ។ ជុំវិញអាងគប្បីទុកចន្លោះដីទំនេ មានម្លប់ត្រជាក់ ហើយធ្វើស្ពានសម្រាប់កន្ធាយវារពីអាងទៅដីគោក ។
របៀបលែងពូជ
មុនពេលលែងពូជត្រូវសំអាតអាង ត្រូវជ្រើសរើសកូនពូជណាដែលមាំមួន រូបរាងស្អាតល្អ មិនមានរបួសឬរលាត់សាច់ជាដើម ។ កូនពូជដែលល្អបំផុតគឺមានទម្ងន់ពី១០០ក្រាមក្នុងមួយក្បាលឡើងទៅ គប្បីលែងកូនពូជទំហំប៉ុនៗគ្នា ហើយលែងក្នុងកំឡុងពេលចាប់ពីខែកុម្ភៈដល់ខែមិនា ។ ដង់សុីតេចិញ្ចឹមកូនពូជមានទម្ងន់ពី៥០ទៅ១០០ក្រាម ត្រូវលេងពី១០ទៅ១៥ក្បាលក្នុងមួយម៉ែត្រការ៉េ កូនពូជទម្ងន់ប្រមាណ២០០ក្រាមត្រូវលែងតែ៤ទៅ៧ក្បាលក្នុងមួយម៉ែត្រការ៉េ ។
ការផ្តល់ចំណី
ស្នូកដាក់ចំណីត្រូវដាក់នៅនឹងកន្លែងមួយ ឲ្យស្ថិតនៅលើទឹក២០សង្ទីម៉ែត្រ មុនពេលឲ្យកន្ធាយសុី ត្រូវសម្អាតឲ្យបានស្អាត ។ ចំណីត្រូវល្មមរង្វះមាត់របស់កន្ធាយជាសំខាន់ ។ ចំណីកន្ធាយមានដូចជា ជន្លេន ខ្ចង ខ្ចៅជាដើម ។ បរិមាណចំណីដែលផ្គត់ផ្គង់រាល់ថ្ងៃឲ្យកន្ធាយ គឺប្រមាណពី៥ទៅ៨ភាគរយនៃទម្ងន់កន្ធាយដែលមាននៅក្នុងអាង ។
របៀបនៃការថែទាំ
ត្រូវរក្សាភាពស្ងប់ស្ងាត់ ការបង្ហូទឹកនិងបង់សំណាញ់ចាប់កុំបង្កភាពភ័យរន្ធត់ដល់កន្ធាយ ។ ទឹកអាងត្រូវស្អាតជានិច្ចមិនត្រូវទុកឲ្យស្អុយក្រខ្វក់ទេ ។ បើចិញ្ចឹមនៅរដូវរងា ត្រូវមានវិធានការទប់ទល់និងភាពត្រជាក់ដល់សត្វកន្ធាយ ។ ឯការចំណាយទុនវាអាស្រ័យទៅលើអ្នកចិញ្ចឹមតែប៉ុណ្ណោះ ។ បើចិញ្ចឹមកន្ធាយតិចអស់តិច បើចិញ្ចឹមរាប់មុឺនក្បាលអស់ទុនច្រើន ។ បើចិញ្ចឹមកន្ធាយមួយមុឺនក្បាល កូនវាមួយក្បាលតម្លៃ៦ទៅ៧កាក់ដុល្លារ ពេលណាលោកអាចភ្ញាស់កូនកន្ធាយបានហើយ មិនចាំបាច់ទិញពីគេទៀតទេ ហើយកសិដ្ឋានរបស់គាត់ក៏បានផ្តល់កូនកន្ធាយ តាមបណ្តាខេត្តនានាដែលមានអ្នកចង់ចិញ្ចឹមកន្ធាយនេះព្រមទាំងបង្រៀនវីធីចិញ្ចឹមផងដែរ ។
លោកថា សត្វកន្ធាយមួយក្បាលក្នុងមួយឆ្នាំវាសុីចំណីអស់ប្រហែលមួយដុល្លារតែប៉ុណ្ណោះ ហើយការចិញ្ចឹមវាមិនអាចធំស្មើគ្នានោះទេ ខ្លះមានទម្ងន់មួយគីឡូក្រាម ខ្លះទៀតមានទម្ងន់៦ទៅ៧ខាំ ។ ការចិញ្ចឹមកន្ធាយឲ្យបានជោគជ័យនោះ យើងត្រូវមានវិធីសាស្ត្រក្នុងពេលចិញ្ចឹម គឺវិធីព្យាបាលនិងការពារ បានន័យថា យើងដាក់ថ្នាំការពារជម្ងឺឆ្លងក្នុងរយៈពេលបីខែម្តង ព្រោះកន្ធាយវាអាចខាំគ្នារបួសនិងបញ្ហាទឹកនេះឯង ។
លោក ហេង ម៉ាទីណេ ក៏បានបញ្ជាក់ថា លោកបានបើកកសិដ្ឋានចិញ្ចឹមកន្ធាយអស់រយៈពេលជិត២០ឆ្នាំមកហើយ ហើយបច្ចេកទេសការថែទាំ មិនមានជាក្តីកង្វល់សម្រាប់រូបលោកទៀតឡើយ ។ ក្តីកង្វល់សម្រាប់លោកពេលនេះ គឺទីផ្សារលក់តែប៉ុណ្ណោះ ។
លោកថា ពេលមុនមិនសូវមានអ្នកណាដឹងទេការហូបកន្ធាយ ប៉ុន្តែឥឡូវស្ទើរតែទាំងអស់គ្នាគេនិយមហូបកន្ធាយ ពេលចូលហាងម្តងៗតែងតែសួររកកន្ធាយនេះឯង ។ នាពេលបច្ចុប្បន្នកសិដ្ឋានរបស់លោកត្រូវដឹកទៅឲ្យម៉ូយក្នុងមួយថ្ងៃពី២០០ទៅ២៥០គីឡូក្រាម ហើយតម្លៃក្នុងមួយគីឡូក្រាម១០ដុល្លារ ។ កសិដ្ឋានចិញ្ចឹមកន្ធាយនេះកើតមានជាបន្តបន្ទាប់ ព្រោះការចិញ្ចឹមមានដល់ទៅរាប់មុឺនក្បាលឯណោះ ។
លោក មាន សុខជា អ្នកចិញ្ចឹមកន្ធាយនៅស្វាយអន្ទរបាននិយាយឲ្យដឹងថា ដោយសារឃើញមិត្តភក្តិគេចិញ្ចឹមកាក់កប លោកក៏សិក្សាបច្ចេកទេសចិញ្ចឹមដែរ ។ លោកថាជាដំបូង លោកបានទិញកូនកន្ធាយចំនួន១៥.០០០ក្បាលពីអាជីវករនៅស្រុកពញាឮ យកមកប្រលែងក្នុងស្រះដែលទំហំទទឹង២៥ម៉ែត្រ បណ្តោយ៣៥ម៉ែត្រនិងមានជម្រៅ២ម៉ែត្រកន្លះ ក្នុងស្រះមួយអាចដាក់កូនកន្ធាយ៥ពាន់ក្បាល ហើយនៅជុំវិញស្រះត្រូវបាំងសង្កសីដើម្បីកុំឲ្យកូនកន្ធាយវារចេញ ។ រីឯទឹកដាក់យ៉ាងតិចពី១ម៉ែត្រឬ២ម៉ែត្រកន្លះពីបាតស្រះ ។
ត្រូវរកកំប្លោកដាក់លើផ្ទៃទឹកផង ដើម្បីឲ្យទឹកថ្លាត្រជាក់ កូនកន្ធាយហែលតោងលេងបាន ។ កូនកន្ធាយ
មួយក្បាលមានតម្លៃជិត៤ពាន់រៀល គេត្រូវតែយកចិត្តទុកដាក់មើលថែ ។ ក្នុងរយៈពេលបីខែដំបូង ព្រោះវាទើបតែរៀនសុីចំណីនិងទើបបន្សាំងនៅស្រះថ្មី ។ រយៈពេលបីខែនេះកូនកន្ធាយសុីតែសាច់ត្រីដែលគេវះយកឆ្អឹងចេញមួយមុខគត់ ។ ប៉ុន្តែក្រោយពីនោះគេអាចលាយសាច់ត្រីជាមួយនិងកន្ទក់បុកជាមួយត្រកួនដើម្បីឲ្យវាសុីបានរហូតដល់ធំ ។
លោកថា រយៈពេល១២ខែនៃការចិញ្ចឹមនេះ ត្រូវផ្លាស់ទឹកឲ្យបានទៀងទាត់ក្នុងរយៈពេលមួយខែឬពីរខែម្តង ដើម្បីកុំឲ្យទឹកស្អុយនិងមានជាតិពុលដែលអាចធ្វើឲ្យកូនកន្ធាយមានជំងឺដំបៅខ្នងពិបាកនិងព្យាបាល ។ ត្រូវរៀបចំលម្អមាត់ស្រះ ដោយដាំបន្លែនិងស្លឹកគ្រៃក្នុងរបាំងស័ង្កសីផ្នែកខាងក្នុងនៃស្រះទឹក ដើម្បីឲ្យកន្ធាយ ឡើងទៅពងកូនឬកំដៅថ្ងៃ ។ ត្រូវផ្តល់ចំណីឲ្យទៀងទាត់គឺក្នុងមួយថ្ងៃម្តង ហើយផ្តល់ក្នុងបរិមាណសមល្មមកូនកន្ធាយសុីអស់មិនសល់ ។ ចំណីក្នុងទកបង្កឲ្យខូចគុណភាពទឹកតាមស្រះចិញ្ចឹមនិមួយៗ ។
លោកបញ្ជក់ថា បច្ចុប្បន្នលោកមានម៉ូយចាំទិញកន្ធាយយកតាមហាងនានា ក្នុងតម្លៃមួយគីឡូក្រាម១០ដុល្លារ ហើយពេលនេះលោកលែងធ្វើចំណាកស្រុកទៀតហើយ ដោយសារមានមុខរបរពិតប្រាកដក្នុងការចិញ្ចឹមកន្ធាយលក់ជាប្រចាំ ។
លោក ហេង ម៉ាទីណេ ម្ចាស់កសិដ្ឋានចិញ្ចឹមកន្ធាយវិហារសួគ៌ក៏បានត្អូញត្អែរផងដែរថា ក្នុងរយះពេលចុងក្រោយនេះ ការចិញ្ចឹមកន្ធាយតាមបណ្តាខេត្តនានា មានការថយចុះច្រើន និងបាក់ទឹកចិត្តដោយសារតែមានការលួចនាំចូលកន្ធាយពីប្រទេសវៀតណាម តាមច្រកព្រំដែនអន្តរជាតិបាវិតខេត្តស្វាយរៀងជារៀងរាល់ថ្ងៃ តាមរថយន្តក្រុងយកមកបោះម៉ូយនៅរាជធានីភ្នំពេញមិនមានការទប់ស្កាត់ពីមន្ត្រីជំនាញនោះធ្វើឲ្យទីផ្សារនៅស្រុកខ្មែរជួបការលំបាក ។
លោកថាមិនមែនមានតែកសិដ្ឋានរបស់លោកនោះទេ គឺមានបងប្អូនចិញ្ចឹមកន្ធាយ តាមបណ្តាខេត្តនានាសុំឲ្យសមត្ថកិច្ចជំនាញត្រូវតែទប់ស្កាត់ឲ្យបានជាដាច់ខាត ពិសេសច្រកទ្វារអន្តរជាតិបាវិតតែម្តង ។ បើគ្មានការលើកទឹកដល់អ្នកចិញ្ចឹមកន្ធាយក្នុងស្រុកទេ សុំឲ្យជួយទប់ស្កាត់ការនាំចូលពីប្រទេសវៀតណាមបានហើយ ៕
ចែករំលែកព័តមាននេះ