រាជធានីភ្នំពេញ ៖ អង្គភាពយោធភូមិភាគទី៥បានប្រកាសច្រានចោលចំពោះការលើកឡើងរបស់បុគ្គល មី ដារ៉ា និងសារព័ត៌មានដែលញុះញង់ លាបពណ៌ បំភ្លើសបំភ្លៃព័ត៌មានមិនពិត វាយប្រហារមកលើរាជរដ្ឋាភិបាលកម្ពុជា ។…
រាជធានីភ្នំពេញ ៖ អង្គភាពយោធភូមិភាគទី៥បានប្រកាសច្រានចោលចំពោះការលើកឡើងរបស់បុគ្គល មី ដារ៉ា និងសារព័ត៌មានដែលញុះញង់ លាបពណ៌ បំភ្លើសបំភ្លៃព័ត៌មានមិនពិត វាយប្រហារមកលើរាជរដ្ឋាភិបាលកម្ពុជា ។
យោងតាមសេចក្តីបំភ្លឺព័ត៌មានរបស់អង្គភាពយោធភូមិភាគទី៥បានលើកឡើងថា បុគ្គលដែលមានការពាក់ព័ន្ធមេត្តាជ្រាបថា ដោយមួយរយៈនេះ មានគណនីហ្វេសប៊ុក ដែលមានឈ្មោះ Mey Dara (https://www.facebook.com/dara.may.98) បានបង្ហោះខ្លឹមសារផ្សាយផ្ទាល់ និងធ្វើការបកស្រាយលើបណ្តាញព័ត៌មាន (Cambodia Daily និងបណ្តាញព័ត៌មានប្រឆាំងមួយចំនួនទៀត) ដែលធ្វើឲ្យប៉ះពាល់ដល់កិត្តិយស និងសេចក្តីថ្លៃថ្នូររបស់កងយោធពលខេមរភូមិន្ទយ៉ាងធ្ងន់ធ្ងរ ក៏ដូចជាបានញុះញង់ លាបពណ៌ បំភ្លើសបំភ្លៃព័ត៌មានមិនពិតវាយប្រហារមកលើរាជរដ្ឋាភិបាលកម្ពុជា។
អង្គភាពយោធភូមិភាគទី៥ សូមជម្រាបជូនថា៖ បុគ្គលឈ្មោះ មី ដារ៉ា ពិតជាធ្លាប់ធ្វើជាយោធិននៅអង្គភាពយោធភូមិភាគទី៥ពិតប្រាកដមែន ដោយបានចូលបម្រើកងទ័ពនៅឆ្នាំ១៩៩១ ដល់ឆ្នាំ២០២៣ ជាវរសេនីយ៍នាយរងការិយាល័យអភិវឌ្ឍន៍យោធភូមិភាគទី៥ ក្នុងកំឡុងពេលបំពេញភារកិច្ចក្នុងអង្គភាព បុគ្គលនេះ បានប្រព្រឹត្តកំហុសឆ្គងល្មើស និងបទវិន័យទូទៅរបស់កងយោធពលខេមរភូមិន្ទជាច្រើនលើកច្រើនសារ និងបានធ្វើការអប់រំណែនាំពីសំណាក់នាយការិយាល័យអភិវឌ្ឍន៍ ក៏ដូចជាថ្នាក់ដឹកនាំយោធភូមិភាគទី៥ផងដែរ។
-ថ្ងៃទី២២ ខែវិច្ឆិកា ឆ្នាំ២០១៩ បុគ្គល មី ដារ៉ា បានប្រព្រឹត្តនូវកំហុសយ៉ាងធ្ងន់ធ្ងរ ខុសពីបទវិន័យទូទៅនៃកងយោធពលខេមរភូមិន្ទ ដោយបានឆបោកទឹកប្រាក់ពីប្រជាពលរដ្ឋចំនួន៧០០០ដុល្លារអាមេរិក(ប្រាំពីរពាន់)ពីឈ្មោះ សិន វិឆ័យប៉ូរ៉ា ដោយសន្យានាំចូលក្របខណ្ឌបម្រើកងទ័ពនៅបញ្ជាការដ្ឋានយោធភូមិភាគទី៥ ដោយសាម៉ីខ្លួនឈ្មោះ សិន វិន័យប៉ូរ៉ា រងចាំយូរមិនទទួលបានក្របខ័ណ្ឌតាមការសន្យា ក៏សម្រេចចិត្តដាក់ពាក្យបណ្ដឹងមក យោធភូមិភាគទី៥ ដើម្បីដោះស្រាយ។
-ថ្ងៃទី៥ ខែសីហា ឆ្នាំ២០២០ ក្រោយទទួលបានពាក្យបណ្តឹង អង្គភាពបានចាត់តាំងក្រុមការងារដោះស្រាយដោយឲ្យបុគ្គល មី ដារ៉ា ប្រគល់ប្រាក់ចំនួន៧០០០ដុល្លារអាមេរិក(ប្រាំពីរពាន់) ជូនជនរងគ្រោះវិញ និងធ្វើកិច្ចសន្យាជាលើកចុងក្រោយជាមួយអង្គភាពយោធភូមិភាគទី៥។
-ថ្ងៃទី១២ ខែវិច្ឆិកា ឆ្នាំ២០២១ បុគ្គល មី ដារ៉ា បានស្នើសុំទៅរៀនវគ្គបណ្តុះបណ្តាលសេនាធិការបច្ចេកទេសយោធាជំនាន់ទី១៣ នៅវិទ្យាស្ថានបច្ចេកទេសយោធាតេជោ ហ៊ុន សែន ព្រៃផ្តៅ រយៈពេល១ឆ្នាំ ក្រោយពីទទួលបានលិខិតផ្ទេរជីវភាពផ្តាច់ចេញពីអង្គភាពយោធភូមិភាគទី៥ ទៅក្រោមការគ្រប់គ្រងរបស់វិទ្យាស្ថានបច្ចេកទេសយោធាតេជោ បុគ្គល មី ដារ៉ា បានលួចទាក់ទងជាមួយពួកឧទ្ទាមក្រៅច្បាប់ប្រឆាំង និងរាជរដ្ឋាភិបាលកម្ពុជានៅប្រទេសអូស្ត្រាលីដើម្បីទទួលបានឱកាសទៅរស់នៅប្រទេសអ្វីស្គាលី ក្រោមរូបភាពរងការកៀបសង្កត់ផ្នែកនយោបាយពីសំណាក់អាជ្ញាធរ និងកងកម្លាំងប្រដាប់អាវុធ។
ក្រោយពេលបោះបង់ចោលអង្គភាពទៅដល់ប្រទេសអូស្ត្រាលី នៅខែវិច្ឆិកា ឆ្នាំ២០២៣ បុគ្គល មី ដារ៉ា បានបន្តវាយប្រហារកាន់តែខ្លាំងឡើងមកលើរាជរដ្ឋាភិបាលកម្ពុជា និងកងកម្លាំងប្រដាប់អាវុធ ក៏ដូចជាកងយោធពលខេមរភូមិន្ទ ដើម្បីបានបន្តសិទ្ធិរស់ក្នុងប្រទេសអូស្ត្រាលី ក្រោមការរៀបចំរបស់ក្រុមខ្មែរប្រឆាំងនៅប្រទេសអូស្ត្រាលី។ក្រៅពីប្រព្រឹត្តកំហុសនៅក្នុងអង្គភាព បុគ្គល មី ដារ៉ា ក៏បានប្រព្រឹត្តនូវបទល្មើសឆបោកមួយចំនួនជាមួយប្រជាពលរដ្ឋ ដែលរស់នៅក្នុងក្រុងបាត់ដំបង ខេត្តបាត់ដំបងផងដែរ ។
ប្រភពបានបញ្ជាក់ថា«ផ្អែកតាមមូលដ្ឋាន ទង្វើ និងការញុះញង់ បំបែកបំបាក់ ឲ្យមានការរើសអើង បំភ្លើសបំភ្លៃការពិត ក្នុងជួរកងទ័ព នៃកងយោធពលខេមរភូមិន្ទ របស់បុគ្គល មី ដារ៉ា ដូចបានជម្រាបជូនខាងលើ សូមសាធារណជន បណ្តាញផ្សព្វផ្សាយព័ត៌មាន មេត្តាជ្រាបជាព័ត៌មាន បុគ្គល មី ដារ៉ា នេះ មិនមែនជាយោធិននៃកងយោធពលខេមរភូមិន្ទនោះទេ» ៕
ចែករំលែកព័តមាននេះ