រាជធានីភ្នំពេញ ៖ សម្តេចតេជោហ៊ុន សែន នាយករដ្ឋមន្ត្រីកម្ពុជាថ្មីៗនេះ បានស្នើឲ្យភាគីចិនក្នុងការជួយគាំទ្រដល់ការអភិវឌ្ឍនៅខេត្តព្រះសីហនុ ដោយសារតែក្រុមហ៊ុនចិនជាច្រើនត្រូវវិនិយោគនៅក្នុងខេត្តមាត់សមុទ្រមួយនេះ ។ ការស្នើឡើងរបស់សម្តេចតេជោ ធ្វើឡើងនៅក្នុងជំនួបពិភាក្សាការងារជាមួយនាយករដ្ឋមន្ត្រីនៃសាធារណរដ្ឋប្រជាមានិតចិន ឯកឧត្តម លី ខឺឈាង (Li Keqiang) កាលពីថ្ងៃទី ៣ ខែវិច្ឆិកានេះ ក្នុងឱកាសដែលសម្ដេចអញ្ជើញចូលរួមក្នុងកិច្ចប្រជុំកំពូលអាស៊ានលើកទី៣៥ នៅទីក្រុងបាងកក ប្រទេសថៃ។
ក្នុងជំនួបនេះនាយករដ្ឋមន្ត្រីនៃប្រទេសទាំង២ បានធ្វើការជជែកពិភាក្សាទៅលើបញ្ហា០៣ចំណុចសំខាន់ៗ ដែលក្នុងនោះចំនុចទី១- គឺការស្នើភាគីចិនក្នុងការជួយគាំទ្រដល់ការអភិវឌ្ឍន៍នៅខេត្តព្រះសីហនុនេះតែម្តង ។
ជាការឆ្លើយតបនាយករដ្ឋមន្ត្រីចិនបានគាំទ្រចំពោះគម្រោងនៃការអភិវឌ្ឍនៃខេត្តព្រះសីហនុនេះ ហើយឯកឧត្តមបានមានប្រសាសន៍ថា «ប្រទេសទាំងពីរនឹងធ្វើការពិភាក្សាគ្នា ជាពិសេសលើរឿងជំនួយឥតសំណង ដើម្បីជួយដល់ការអភិវឌ្ឍន៍នៃខេត្តព្រះសីហនុនេះ» ។ ក្រៅពីបញ្ហានៃការអភិវឌ្ឍខេត្តព្រះសីហនុនោះ នៅក្នុងជំនួបនោះផងដែរ នាយករដ្ឋមន្ត្រីនៃប្រទេសទាំងពីរបានធ្វើការជជែកពិភាក្សាទៅលើបញ្ហា២ចំណុចសំខាន់ៗផ្សេងទៀត រួមមាន ទី២- ទាក់ទងនឹងកិច្ចប្រជុំលើកទី៥ គណៈកម្មាធិការនៃអន្តររដ្ឋាភិបាលកម្ពុជា-ចិន ដោយសម្ដេចតេជោបានស្នើឱ្យមានជំនួបនេះមុនបំណាច់ឆ្នាំ២០១៩ខាងមុខនេះ ដែលគ្រោងនឹងធ្វើនៅឯខេត្តព្រះសីហនុនោះ ។
ឯកឧត្តមនាយករដ្ឋមន្ត្រីចិន បានមានប្រសាសន៍ថា ចិននឹងគាំទ្រក្នុងការរៀបចំនៃកិច្ចប្រជុំនេះ ដើម្បីពិភាក្សាទាក់ទងនឹងរឿងថវិកានៃប្រទេសទាំងពីរផងដែរ ។ និងទី៣- ទាក់ទងទៅនឹងកិច្ចប្រជុំអនុតំបន់ដែលមានយន្តការពីរនោះមានយន្តការនៃកិច្ចសហប្រតិបត្តិការទន្លេឡានឆាង និងទន្លេមេគង្គដែលគ្រោងធ្វើនៅទីក្រុងវៀងច័ន្ទប្រទេសឡាវក្នុងឆ្នាំក្រោយនេះ និងកិច្ចប្រជុំកំពូលអនុតំបន់ទន្លេមេគង្គដែលត្រូវប្រជុំនៅឆ្នាំក្រោយដែរ ។ ហើយប្រទេសកម្ពុជា និងចិននឹងសហការគ្នា ដើម្បីឱ្យកិច្ចប្រជុំនេះនៅឆ្នាំក្រោយទទួលបានភាពល្អប្រសើរ ហើយក្រសួងការបរទេសនៃប្រទេសទាំងពីរ នឹងធ្វើកិច្ចការងារនេះជាបណ្តើរៗ ។
ក្រៅពីនោះទៀតពាក់ព័ន្ធនៅខេត្តព្រះសីហនុនៅឆ្នាំនេះ ជាឆ្នាំដែលប្រទេសកម្ពុជា និងប្រទេសចិន បានឯកភាពនូវការអនុវត្តកិច្ចសហប្រតិបត្តិការទៅលើច្បាប់ដែលប្រទេសទាំងពីរបានឯកភាពគ្នា ហើយកន្លងមកបានឯកភាព និងរួមគ្នាក្នុងការអនុវត្តច្បាប់នៃប្រទេសទាំងពីរផងដែរ ៕ កែសម្រួលដោយ ៖សុឃាក់
ចែករំលែកព័តមាននេះ