ខេត្តបន្ទាយមានជ័យ ៖ ពិការភាពមានច្រើនប្រភេទ ខ្លះពីកំណើត ខ្លះដោយសារឧប្បត្តិហេតុផ្សេងៗ ខ្លះដោយសារសង្គ្រាម ។ ជាអកុសលជនពិការប្រុស-ស្រី៣នាក់ មានទាំងកូនតូចបីក្នុងដៃផងនោះ រស់ដោយលំបាក…
ខេត្តបន្ទាយមានជ័យ ៖ ពិការភាពមានច្រើនប្រភេទ ខ្លះពីកំណើត ខ្លះដោយសារឧប្បត្តិហេតុផ្សេងៗ ខ្លះដោយសារសង្គ្រាម ។ ជាអកុសលជនពិការប្រុស-ស្រី៣នាក់ មានទាំងកូនតូចបីក្នុងដៃផងនោះ រស់ដោយលំបាក មើលទៅពិតជាគួរឲ្យសង្វេគណាស់ ដោយសារពួកគេទៅណាមកណាត្រូវតោងដៃគ្នា អាស្រ័យលើបុរសម្នាក់ដែលពិការភ្នែកម្ខាង ហើយភ្នែកម្ខាងទៀត មើលបានមិនដល់៥០ភាគរយ និងមើលមិនបានឆ្ងាយទៀតផង ។
ជនពិការទាំង៣នាក់ខាងលើ ២នាក់ជាប្តីប្រពន្ធឈ្មោះ ឆន តុង ភេទប្រុស អាយុ៣៥ឆ្នាំ ប្រពន្ធឈ្មោះ ប្រាក់ សាវេត អាយុ២៤ឆ្នាំ ស្នាក់នៅចល័ត និងមានទីលំនៅភូមិច្រម៉ាស់ ឃុំប្រាសាទសំបូរ ស្រុកប្រាសាទសំបូរ ខេត្តកំពង់ធំ (ប្តីពិការភ្នែកម្ខាង ប្រពន្ធពិការភ្នែកទាំង២) ។ ចំណែកស្ត្រីម្នាក់ទៀតឈ្មោះ កៅ យ៉ែម អាយុ៣៥ឆ្នាំ មានទីលំនៅភូមិពោធិ ឃុំពង្រក្រោម ស្រុកជីក្រែង ខេត្តសៀមរាប (ពិការភ្នែកទាំង២) ។
គ្រួសារ ពិការភ្នែកខាងលើ បុរសជាប្តីអះអាងថា ពិការតាំងពីអាយុ៤ខែ ដោយសារទឹកសាប៊ូ ឯនាងប្រពន្ធអះអាងថា ពិការកាលពីអាយុ៨ឆ្នាំ ដោយសារជំងឺកញ្ជ្រិល ។ ទោះជាយ៉ាងណាគ្រួសារមួយនេះ ចាប់ដៃគ្នាជាប្តីប្រពន្ធបង្កើតបានកូនស្រី២នាក់ មានអាវៈយវៈគ្រប់គ្រាន់ជាចំណងដៃ ។ ចំណែកស្ត្រីពិការឈ្មោះ កៅ យ៉ែម អះអាងថា បានធ្លាក់ខ្លួនពិការតាំងពីកំណើត ។
ជនពិការទាំង៣នាក់ រស់នៅប្រៀបដូចជាគ្រួសារតែមួយ ស្ត្រីឈ្មោះ កៅ យ៉ែម ជាមិត្តភកិ្តរបស់បុរសខាងលើ គឺស្នាក់នៅជុំគ្នា និងទៅណាមកណាជំុគ្នារហូត ។ ពួកគេប្រាប់ថា បច្ចុប្បន្នរស់អាស្រ័យលើការចល័តទី តាមបណ្តាខេត្តដាក់ធុងបាស់ និងអំភ្លីស្រែកច្រៀង ដើម្បីសុំថវិកាពីអ្នកស្រុក ដោយម្តងទៅខេត្តនេះ ម្តងទៅខេត្តនោះ ។
ពួកគេរៀបរាប់ប្រាប់កោះសន្តិភាពបន្តទៀតថា ការចល័តទី ដាក់ធុងបាស់ស្រែកច្រៀងរកប្រាក់ចិញ្ចឹមជីវិតនេះ ពេលខ្លះក៏មានការថ្នាំងថ្នាក់ពីអ្នកដទៃដែរ តែក៏ចេះតែសុំអង្វរគេទៅ ធ្វើម្តេចបើជីវិតធ្លាក់បែបហ្នឹងទៅហើយ ពិសេសដើម្បីចិញ្ចឹមកូនស្រី២នាក់ ដែលនៅតូចៗឲ្យមានអនាគតនឹងគេ ។
អ្វីដែលកាន់តែខ្លោចចិត្តអាណិតថែមទៀតនោះ បុរសពិការភ្នែកខាងលើ ក្លាយជាអ្នកបើកបរម៉ូតូសណ្តោងរ៉ឺម៉ក ដឹកប្រពន្ធ និងមិត្តស្រី ព្រមទាំងកូន និងឧបករណ៍ច្រៀង ទៅណាមកណាទៀតផង ។ ជនពិការទាំង៣នាក់ខាងលើ សុំអំពាវនាវយ៉ាងទទូច សប្បុរសជនក្នុង និងក្រៅប្រទេស មេត្តាជួយដល់ពួកគេផង ពិសេសអ្នកស្រុកសូមមេត្តាយោគយល់ ពេលពួកគេដាក់ទីតាំងលក់សម្លេងដើម្បីចិញ្ចឹមជីវិត ព្រោះគ្មានប្រាក់ខែឡើយ ៕
ចែករំលែកព័តមាននេះ