រង់ចាំ​ការ​ធ្វើ​កោសល្យវិច័យ​…​ដើម្បី​បញ្ជាក់​​ការ​ស្លាប់​ស្ត្រី​អង់គ្លេស​រូប​នេះ


ខេត្តកោះកុង ៖ ​រហូត​មក​ទល់ព្រឹកថ្ងៃទី​០១ វិច្ឆិកា នេះ សម្រាប់​ការ​ស្លាប់​របស់​នាង Amelia Bam​bridge ជន​ជាតិអង់គ្លេសនៅមិន​ទាន់​មានការ​បញ្ជាក់​នៅឡើយ​ទេ ដោយរង់ចាំ​ការ​ធ្វើ​កោ​សល្យវិច័យ​សិន ។ នាង Amelia Bambridge បាន​ចេញពី​វៀតណាម កាលពី​កំឡុងថ្ងៃ​ទី​១៥-១៦ ខែតុលា ឆ្នាំ​២០១៩ មក​ប្រទេស​កម្ពុជា ​តាម​ច្រក​ទ្វារ​អន្តរាគមន៍​បា​វិត និង​បន្ត​ធ្វើ​ដំណើរ​ទៅ​កាន់​ខេត្ត​ព្រះ​សីហ​នុ រហូត​បាត់​ខ្លួន​នៅ​ព្រឹក​ទៀប​ភ្លឺថ្ងៃ​ទី​២៤ ខែតុលា ពេល​ដែល​នាង​ជាមួយ​មិត្តភក្តិ​ទើប​ស្គាល់គ្នា​ជិត ១០​នាក់ រៀបចំ​កម្មវិធី​មួយ​មានឈ្មោះ​ថា «​ចាំ​មើល​ថ្ងៃ​រះ​» នៅ​លើ​កោះ​រ៉ុ​ង ។

​សូមរំលឹកថា ស្ត្រី​ជនជាតិ​អង់គ្លេស​ខាងលើ បាន​​បាត់​ខ្លួន​៨​ថ្ងៃ​មក​ហើយ ត្រូវ​តាម​ស្វែងរកឃើញ​យ៉ាង​ភ្លូក​ទឹកភ្លូកដី​នៅ​តំបន់​កោះ​រ៉ុ​ង ​ហើយ​ប្រទះ​ឃើញ​សាកសព​ស្ត្រី​រង​គ្រោះ​អណ្តែត​នៅ​លើ​លម្ហ​សមុទ្រ​ក្នុ​ុ​ង​ភូមិ​សាស្ត្រ​ស្រុក​កោះ​ស្តេច ចម្ងាយ​ពី​កោះ​រ៉ុ​ង​ប្រមាណ​ជាង​៤០​ម៉ៃ​ល៍ ស្មើនឹង​ជាង​៦០គីឡូម៉ែត្រ ​នៅ​​រសៀល​ថ្ងៃ​៣១ តុលា ហើយ​ភ្លាម​ៗ​ក្រោយ​រក​ឃើញ​សាកសព​ ត្រូវ​បាន​សមត្ថកិច្ច​រៀបចំ​ដឹក​ជញ្ជូន​នាំ​មក​កាន់​កំពង់​ផែ​ក្រុងព្រះសីហនុ ដើម្បី​ធ្វើ​ការងារ​បន្ត​តាម​នីតិវិធី ។

មន្ត្រី​កង​ទ​ព័​ជើង​ទឹក​នៅ​ក្នុង​ទីបញ្ជាការ​ជួរ​មុខ​នៃ​គណៈកម្មាធិការ​ជាតិ​សន្តិសុខ​លម្ហ​សមុទ្រ​បានឱ្យ​ដឹង​ដឹង​
ថា សាកសព​ស្ត្រី​រង​គ្រោះ​ត្រូវ​បាន​កម្លាំង​ទីបញ្ជាការ​ជួរ​មុខ អគ្គលេខាធិការដ្ឋាន​នៃ​គណៈកម្មាធិការ​ជាតិ​សន្តិសុខ​លម្ហ​សមុទ្រ ក្រោម​កិច្ចសហការ​ជាមួយ​ក្រុមហ៊ុន ជី ធី វី ស៊ី ស្ពី​ត​ប៊ូ​ត​កម្ពុជា របស់​លោក​ឧកញ៉ា ទៀ វិចិត្រ បាន​ប្រទះ​ឃើញ​សាកសព​ស្ដ្រី​ជនជាតិ​អង់គ្លេស​ឈ្មោះ Amelia Bambridge រូប​នេះ អណ្ដែត​នៅ​លើ​ផ្ទៃសមុទ្រ​នៅ​ចំណុច​(​ខន​ដរ​) ក្បែរ​ព្រំដែន​សមុទ្រ​កម្ពុជា​-​ថៃ ។

ទោះជា​យ៉ាងនេះ​ក្តី ភ្លាម​ៗ​ក្រោយ​ទទួល​ដំណឹង​ថា ​សាកសព​ត្រូវ​បាន​រក​ឃើញ​ហើយ​នោះ ក្រុម​អ្នករាយ​ការណ៍​ព័ត៌មាន​នៅ​មិន​ទាន់​ទទួល​បាន​របាយការណ៍​ពី​សមត្ថកិច្ច​ជំនាញ​អំពី​ការ​ស្លាប់​របស់​ស្ត្រី​រង​គ្រោះ​ថា​បណ្តាល​មក​ពី​ហេតុ​អ្វី​នៅឡើយ​ទេ ។ លោក​ឧត្តមនាវីឯក ទៀ សុខា មេបញ្ជាការ​រង​កងទ័ពជើងទឹក និង​ជា​មេបញ្ជាការ​ទីបញ្ជាការ​ជួរ​មុខ អគ្គលេខាធិការដ្ឋាន នៃ​គណៈកម្មាធិការ​ជាតិ​សន្តិសុខ​លំហ​សមុទ្រ បាន​ថ្លែងប្រាប់​ឱ្យ​ដឹង​បន្ថែម​ថា សព​នារី​ជនជាតិ​អង់គ្លេស ត្រូវ​បាន​រក​ឃើញ​នៅ​ម្ដុំ​កោះ​ឆ្លាម ក្នុង​ខេត្តកោះកុង ហើយ​នៅ​ពេល​នេះ​កម្លាំង​របស់​លោក​កំពុង​តែ​នាំ​សព​របស់​នាង​មក​លើគោក ដើម្បី​ធ្វើ​កោសល្យវិច័យ​បន្ថែម​ទៀត ។

លោក​ឧត្តមសេនីយ៍ទោ ជួន ណា​រិ​ន្ទ ស្នងការ​នគរបាល​ខេត្ត​បាន​បញ្ជាក់​ថា តាម​ព័ត៌មាន​បឋម​ដែល​លោក​ទទួល​បាន គឺ​ពិតជា​រក​ឃើញ​សព​របស់​នាង បាន​អណ្ដែត​ដល់​ខេត្តកោះកុង ហើយ​ពេល​នេះ​កម្លាំង​នគរបាល អាជ្ញាធរ បាន​ទាក់ទង​ទៅ​ខាង​ក្រុម​លំហ​សមុទ្រ​នាំ​យក​សព​របស់​នាង​មក​លើគោក​វិញ ។ បើ​តាម​លោក​ឧត្តមសេនីយ៍​ស្នងការ ការងារ​នេះ​អភិបាលខេត្ត​ព្រះ​សីហ​នុ លោក គួ​ច ចំរើន បាន​យកចិត្តទុកដាក់​យ៉ាង​ខ្លាំង និង​បាន​ចាត់​ឲ្យ​ទាំង​អាជ្ញាធរ​និង​សមត្ថកិច្ច​ទាក់ទង​អន្តរាគមន៍​នាំ​យក​សព​របស់​នាង​មក​លើគោក​ដើម្បី​ធ្វើ​កោសល្យវិច័យ​មុន​ពេល​ប្រគល់​ជូន​ក្រុម​គ្រួសារ ។

សូម​បញ្ជាក់​ថា នាង Amelia Bambridge បាន​ចេញពី​ក្រុងព្រះសីហនុ ឆ្ពោះទៅ​ក្រុង​កោះ​រ៉ុ​ង នៅ​ម៉ោង​៥​ល្ងាច​ថ្ងៃ​ទី​១៩ ខែតុលា ឆ្នាំ​២០១៩ និង​ទៅ​ដល់​កោះ​រ៉ុ​ង​នៅ​ម៉ោង​៦​ល្ងាច ។ នាង​បាន​ចូល​ស្នាក់​នៅផ្ទះ​សំណាក់ Ness Beach នៅ​វេលា​ម៉ោង​៨​និង​១៥​នាទី​យប់​ថ្ងៃ​ដដែល ។ មុន​ពេល​បាត់​ខ្លូ​ន​គេ​បាន​ប្រទះ​ឃើញ​នាង​ជា​លើក​ចុង​ក្រោយ នៅ​ម៉ោង​៣​និង​៣០​ទៀប​ភ្លឺ ឈាន​ចូល​ថ្ងៃ​ទី​២៤ ខែតុលា ឆ្នាំ​២០១៩ ក្នុង​ពិធីជប់លៀង​មួយ​នៅ​ឆ្នេរ​កោះ​រ៉ុ​ង (Police Beach) ក្រោយមក​ក៏​បាត់​ខ្លួន​តែ​ម្តង ។

ក្រោយ​បាត់​ខ្លួន​ប្រធាន​គណៈ​បញ្ជាការ​ឯកភាព​ខេត្ត លោក គួ​ច ចំរើន សហការ​ជាមួយ​នាយ​ឧត្តមសេនីយ៍ ថោ​ង លី​ម អគ្គស្នងការ​រង​នគរបាល​ជាតិ បាន​ដឹកនាំ​កម្លាំង​អាជ្ញាធរ និង​កម្លាំង​សមត្ថកិច្ច ព្រមទាំង​មានការ​ចូលរួម​ពី​ក្រុម​លោក​ឧកញ៉ា ទៀ វិចិត្រ និង​ប្រជាពលរដ្ឋ​រាប់រយ​នាក់ រហូត​មានការ​ប្រើ​សុ​ខន​ហិតក្លិន​និង​ឧទ្ធម្ភាគចក្រ​បាន​បើក​ប្រតិបត្តិការ​ស្វែងរក​យ៉ាង​សកម្ម​បំផុត​ដែល​សរុប​អ្នករុករក​មិន​ខ្វះ​ពី​ជាង​២០០​នាក់​ទេ ។

​ការ​បាត់​ខ្លួន​ស្ត្រី​អង់គ្លេស​រូប​នេះ​មនុស្ស​លើ​កោះ​៦​នាក់​ត្រូវ​បាន​ឃាត់ខ្លួន​សាកសួរ​ផង​ដែរ ក្នុង​ការ​ខិតខំ​ស្វែងរក​ព័ត៌មាន​ជុំវិញ​ការ​បាត់​ខ្លួន​នេះ ។ ពិតជា​គួរ​ឱ្យ​សោកស្តាយ​ចំពោះ​ការ​ទទួលមរណភាព​របស់​ស្ត្រី​ទេសចរ​រូប​នេះ ។សព​ស្ត្រី​ដែល​បាន​រក​ឃើញ​នោះ ត្រូវ​បាន​បុរស​ជា​ឪពុក​អះអាង​ថា ពិតជា​កូនស្រី​គាត់​ដែល​បាត់​ខ្លួន ព្រោះ​មាន​ស្នាម​សាក់​រូប​ក្បាល​គោ​នៅ​ដើមដៃ ៕

ព័ត៌មាន​ជាតិ

Sponsored News

ការស្ទង់មតិគេហទំព័រថ្មី




សូម​អរគុណ