ខេត្តកំពត ៖ យុវជនម្នាក់ពិតជាឈាមរាវមែន បាននាំក្មេងស្រីអាយុ៧ឆាំ្នទៅរំលោភ ហើយពេលដើរចេញមកវិញឃើញម៉ូតូហុងដាឌ្រីមសេ១២៥មួយគ្រឿងដែលគេទុកនៅមុខផ្ទះ ក៏យកជិះយ៉ាងសង្ហាមកឌុបមិត្តភក្តិម្នាក់ដើរលេង ។ ទោះជាយ៉ាងណា យុវជនរូបនេះត្រូវនគរបាលស្រុកកំពង់ត្រាច ស្ទាក់ចាប់បានទាំងម៉ូតូ កាលពីវេលាម៉ោងប្រមាណ៥និង៣០នាទីល្ងាចថ្ងៃទី២០ តុលា នៅលើកំណាត់ផ្លូវជាតិលេខ៣៣ពីកំពង់ត្រាច ទៅកាន់ច្រកទ្វារអន្តរជាតិព្រែកចាក ក្នុងភូមិកោះខ្លូត ឃុំកំពង់ត្រាចខាងកើត ស្រុកកំពង់ត្រាច។
លោកវរសេនីយ៍ទោ សេង សុគន្ធចាត់ អធិការនគរបាលស្រុកកំពង់ត្រាច បានឲ្យដឹងថា យុវជនខាងលើឈ្មោះ ណុប ហុឺ អាយុ១៧ឆាំ្ន នៅឃុំស្វាយទងខាងត្បូង ស្រុកកំពង់ត្រាច ។ ជនសង្ស័យបម្រើការនៅកន្លែងលំហែកាយមួយនៅជើងភ្នំរមណីយដ្ឋានភ្នំកំពង់ត្រាច ហើយរូបគេបានដើរលេងជាមួយគូកនផ្សេងទៀតនៅឃុំដំណាក់កន្ទួតខាងជើង ស្រុកកំពង់ត្រាច ។ នាវេលាម៉ោងប្រមាណ៣រសៀលថ្ងៃទី២០ ខែតុលា ជន
សង្ស័យបានទៅលេងផ្ទះអ្នកភូមិ ហើយឃើញឱកាសល្អក៏នាំក្មេងស្រីម្នាក់អាយុ៧ឆ្នាំទៅបេះផ្លែមៀននៅក្រោយផ្ទះ រួចចាប់រំលោភសេពសន្ថវៈតែម្ដង និងបានគំរាមថា កុំនិយាយប្រាប់អ្នកណាឱ្យសោះ ។
ក្រោយពីរំលោភរួច ជនសង្ស័យចេញមកវិញឃើញម៉ូតូសេ១២៥មួយគ្រឿង ពណ៌ខ្មៅ ស៊េរីឆាំ្ន២០១៤ ដែលម្ចាស់គេទុកនៅមុខផ្ទះ ក៏លួចយកជិះមកឃុំស្វាយទងខាងត្បូង មកឌុបមិត្តភក្តិម្នាក់ អាយុ១៧ឆាំ្នដូចគ្នា ឈ្មោះ ង៉ាន់ យុទ្ធី ទៅដើរលេង ។
លោកអធិការ សេង សុគន្ធចាត់ ថ្លែងទៀតថា ក្រោយពីមានករណីខាងលើ លោកបានទាក់ទងទៅតាមបណ្ដាប៉ុស្តិ៍នគរបាលទាំង១៤ទូទាំងស្រុកកំពង់ត្រាច ទើបកម្លាំងនគរបាលស្ទាក់ចាប់បាននៅលើកំណាត់ផ្លូវជាតិលេខ៣៣ ក្នុងឃុំកំពង់ត្រាចខាងកើត ។ ក្រោយពីឃាត់ខ្លួន សមត្ថកិច្ចបានធ្វើការពិសោធមើលឃើញថា ពួកគេទាំង២នាក់សុទ្ធតែមានសារធាតុញៀននៅក្នុងខ្លួន ។ ទោះបីជាបែបណា ជនសង្ស័យទាំង
២នាក់ត្រូវបានបញ្ជូនទៅកាន់ស្នងការដ្ឋាននគរបាលខេត្ត ឯម៉ូតូប្រគល់ជូនម្ចាស់វិញ ៕
ចែករំលែកព័តមាននេះ