រាជធានីភ្នំពេញ ៖ ចៅស្រីរបស់សម្តេចតេជោ ហ៊ុន សែន នាយករដ្ឋមន្ត្រីបានបន្តឈរលើកតារាងក្នុងកម្មវិធីប្រកួតប្រជែងផ្នែកគណិតវិទ្យាប្រចាំតំបន់អាស៊ី និងលំដាប់ថ្នាក់ពិភពលោក ។ យោងតាមបណ្តាញសង្គមឈ្មោះថា កម្ពុជាពិតបានលើកឡើងថា កុមារី ហ៊ុន ពេជ្រមុន្នីលីណា ចៅស្រីរបស់លោក ហ៊ុន សែន នាយករដ្ឋមន្ត្រីនៃកម្ពុជាបន្តសាងភាពល្បាញល្បីសម្រាប់កម្ពុជាទៀតហើយដោយបន្តឈរនៅកំពូលតារាងកម្មវិធីប្រកួតប្រជែងសមត្ថភាពផ្នែកគណិតវិទ្យាប្រចាំតំបន់អាស៊ី (Asia’s Top 100 Students) និងកម្រិតថ្នាក់ពិភពលោក (World Top 100 Students) ។
ក្រៅពីកុមារី ហ៊ុន ពេជ្រមុន្នីលីណា មានកូនខ្មែរម្នាក់ទៀតបានដណ្តើមចំណាត់លេខ២ សម្រាប់តំបន់អាស៊ី ។ យោងតាមលទ្ធផលដែលបង្ហាញនៅលើគេហទំព័រប្រឡងគណិតវិទ្យា បានបង្ហាញថា កុមារី ហ៊ុន ពេជ្រមុន្នីលីណា បានឈរនៅលើកំពូលតារាងតំបន់អាស៊ីជាមួយពិន្ទុ ១៤,០១៩ ហើយនៅកំពូលតារាងលើពិភពលោកជាមួយពិន្ទុ១៤,០១៩ផងដែរ ។ ដោយកូនខ្មែរម្នាក់ទៀតដែលមានឈ្មោះ Kaly K ឈរនៅលំដាប់ទីពីរសម្រាប់តំបន់អាស៊ីជាមួយពិន្ទុ ៥,១៣០ ។
កុមារី ហ៊ុន ពេជ្រមុន្នីលីណា ជាកូនស្រីទី២ របស់លោក ហ៊ុន ម៉ាណែត និងលោកស្រី ពេជ ចន្ទមុន្នី ។ តាមរយៈគេហទំព័រប្រកួតប្រជែងគណិតវិទ្យាកម្រិតថ្នាក់អាស៊ី និងពិភពលោកនេះកុមារី ហ៊ុន ពេជ្រមុន្នីលីណា តែងតែបានចូលរួមប្រកួតប្រជែងសមត្ថភាពជារឿយៗ ហើយតែងតែទទួលបានចំណាត់ថ្នាក់ល្អៗផងដែរ ។ នៅក្នុងមួយរយៈពេលចុងក្រោយនេះកុមារី ហ៊ុន ពេជ្រមុន្នីលីណា តែងដណ្តើមតំណែងកំពូលតារាងនៃកម្មវិធីប្រកួតប្រជែងគណិតវិទ្យានេះទាំងនៅតំបន់អាស៊ី និងលើពិភពលោក ។
ជាមួយការដណ្តើមបានចំណាត់ថ្នាក់កំពូលតារាងរបស់កុមារី ហ៊ុន ពេជ្រមុន្នីលីណា បានធ្វើឲ្យរូបសញ្ញាទង់ជាតិរបស់កម្ពុជាត្រូវបានបង្ហាញលើកំពូលតារាងគេហទំព័រ «Mathletics Hall of Fame» ដែលជាគេហទំព័រមួយមានការប្រកួតប្រជែងគណិតវិទ្យារបស់កុមារា កុមារី មកពីប្រទេសជាច្រើននៅលើពិភពលោក ។
លទ្ធផលនេះក៏បានលើកតម្លៃអប់រំនៅកម្ពុជានាពេលបច្ចុប្បន្ន ហើយបានបង្ហាញថាភាពវៃឆ្លាតរបស់កុមារកម្ពុជាមិនចាញ់កុមារនៅលើពិភពលោកនោះឡើយ ពោល គឺមិនដូចជា ការនិយាយរបស់ក្រុមប្រឆាំងថា វិស័យអប់រំនៅកម្ពុជាមិនសូវមានគុណភាពនោះទេ ។
គួររំឮកថា សម្តេចតេជោនាយករដ្ឋមន្ត្រី ហ៊ុន សែន ធ្លាប់បានលើកឡើងថា ភាពវ័យឆ្លាតរបស់មនុស្សមិនស្ថិតនៅលើមនុស្សនោះកើតក្នុងប្រទេសធំ ប្រទេសមានសេដ្ឋកិច្ចរុងរឿង ឬ ប្រទេសនោះជាប្រទេសតូច ឬមានសេដ្ឋកិច្ចមិនរីកចម្រើននោះឡើយ ពោលមនុស្សជាតិកើតក្នុងប្រទេសតូច ប្រទេសក្រីក្រ ក៏មានសមត្ថភាពឆ្លាតវៃដូច ឬឆ្លាតជាងប្រទេសមានសេដ្ឋកិច្ចរុងរឿងប្រទេសធំផងដែរ ។
តាមរយៈសមត្ថភាពលេចធ្លោលើការប្រកួតប្រជែងគណិតវិទ្យានេះបានបង្ហាញពីសមត្ថភាពរបស់កូនខ្មែរ ។ បើទោះបីប្រទេសនេះធ្លាប់ជាប្រទេសរស់នៅក្រោមអាណានិគមជាប្រទេសធ្លាប់យាយីដោយភ្លើងសង្គ្រាម តែបច្ចុប្បន្នប្រជាជាតិកម្ពុជាក្រោមម្លប់សន្តិភាព កំពុងមានឱកាសទទួលបានចំណេះដឹង និងប្រកួតប្រជែងសមត្ថភាពជាមួយមនុស្សជាតិនៅលើពិភពលោក ហើយក៏អាចដណ្តើមបានចំណាត់ថ្នាក់ល្អខ្ពស់លើសគេផងដែរ ។
ជាកត់សម្គាល់កម្ពុជាយើងបច្ចុប្បន្ននេះ មានសិស្សនិស្សិត ចំនួនមានសមត្ថភាពខ្លាំងក្នុងការសិក្សារហូតទទួលបានមេដាយមាសប្រាក់ក្នុងការចូលរួមប្រឡងថ្នាក់អន្តរជាតិទៀតផង ៕ កែសម្រួលដោយ ៖ សុឃាក់
ចែករំលែកព័តមាននេះ