រាជធានីភ្នំពេញ ៖ តារាចម្រៀងលោកព្រាប សុវត្ថិ ត្រូវគេចាត់បញ្ចូលនៅក្នុងបញ្ជីនៃការប្រកួតប្រជែងដណ្ដើមពានរង្វាន់ដែលមានឈ្មោះថា World Music Awa-rds 2014 ។
រាជធានីភ្នំពេញ ៖ តារាចម្រៀងលោកព្រាប សុវត្ថិ ត្រូវគេចាត់បញ្ចូលនៅក្នុងបញ្ជីនៃការប្រកួតប្រជែងដណ្ដើមពានរង្វាន់ដែលមានឈ្មោះថា World Music Awa-rds 2014 ។
កម្មវិធីប្រកួតប្រជែងដ៏ធំ និងជាលក្ខណៈអន្ដរជាតិនេះ តារាចម្រៀង លោកព្រាប សុវត្ថិ ស្ថិតនៅក្នុងបញ្ជីឈ្មោះដណ្ដើមយកពានរង្វាន់ក្នុងផ្នែក World Best Male Artist ដែលក្នុងបញ្ជីនោះមានតារាចម្រៀងប្រុស ល្បីៗជាច្រើននាក់ពីពាសពេញពិភពលោក ។
តាមការគ្រោងទុក ជ័យលាភីទាំងអស់នឹងត្រូវប្រកាសក្នុងកម្មវិធី World Music Awards នៅថ្ងៃទី២៧ ឧសភា ២០១៤ នៅទីក្រុង Monte Carlo ប្រទេសម៉ូណាកូ ។
លោកព្រាប សុវត្ថិ ប្រាប់កោះសន្ដិភាពតាមទូរស័ព្ទកាលពីថ្ងៃទី២៤ មេសា ២០១៤ថា លោកភ្ញាក់ផ្អើលខ្លាំងនៅពេលទទួលព័ត៌មានថាមានឈ្មោះលោកនៅក្នុងកម្មវិធីប្រកួតប្រជែងដណ្ដើមពានរង្វាន់ដ៏ធំ និងជាលក្ខណៈអន្ដរជាតិប្រចាំឆ្នាំនាពេលនេះ ។ កម្មវិធីនេះតាមលោកដឹងគឺគេជ្រើសរើសយកតារាចម្រៀង ល្បីៗ និងមានទឹកដមពីរោះប្រមាណជាង៣០០នាក់នៅពាសពេញពិភពលោក ដើម្បីដាក់ឱ្យបោះឆ្នោតប្រកួតប្រជែង ។
លោកព្រាប សុវត្ថិ ឱ្យដឹងទៀតថា កម្មវិធីនោះធ្វើឡើងមិនមែនប្រកួតប្រជែងអ្វីឡើយ ប៉ុន្ដែជាការរៀបចំជ្រើសរើសយកតារាចម្រៀង ល្បីៗ ហើយមានទឹកដមសំនៀងពីរោះតាំងពីកំណើត និងមានគេទទួលស្គាល់ជាលក្ខណៈអន្ដរជាតិ ។ ទើបតែឆ្នាំនេះដែលរូបលោកមានឈ្មោះនៅក្នុងបញ្ជីកម្មវិធី World Music Awards ។ នេះចាត់ទុកជាកិត្ដិយសសម្រាប់រូបលោក ក៏ដូចជាប្រជាជនកម្ពុជាទាំងមូលដែរ ដោយហេតុថា កម្មវិធីនេះគឺបានជ្រើសរើសយកតែតារាចម្រៀងដែលមានទេពកោសល្យខ្ពស់ និងមានទឹកដមសំនៀងល្អ ដែលគេចាត់ទុកជាតារាចម្រៀងដ៏អស្ចារ្យសម្រាប់ពិភពលោក ។
តារាចម្រៀង លោកព្រាប សុវត្ថិ មានមោទនភាពចំពោះខ្លួនឯង និងមោទនភាពយ៉ាងខ្លាំងក្នុងនាមជាតារាចម្រៀងខ្មែរមួយរូបដែលត្រូវគេចាត់ចូលទៅក្នុងបញ្ជីតារាចម្រៀង ល្បីៗបំផុតនៅជុំវិញពិភពលោក ។ លោកសប្បាយចិត្ដនៅពេលដែលទេពកោសល្យរបស់លោកត្រូវគេទទួលស្គាល់ជាអន្ដរជាតិ ហើយក៏ជាមុខមាត់មួយសម្រាប់ប្រជាជន និងប្រទេសកម្ពុជា ក្នុងនាមលោកជាកូនខ្មែរមួយរូបដែលមានឱកាសបង្ហាញអ្វីដែលជាអត្ដសញ្ញាណរបស់ជាតិ ។
លោកព្រាប សុវត្ថិ ថ្លែងអំណរគុណទស្សនិកជនទាំងនៅក្នុងស្រុក និងក្រៅស្រុកដែលតែងលើកទឹកចិត្ដ និងគាំទ្ររូបលោកជារៀងរហូតមក។ ក្នុងនាមជាតារាចម្រៀងជើងចាស់ លោកព្រាប សុវត្ថិ ផ្ដាំផ្ញើដល់អ្នកសិល្បៈខ្មែរជំនាន់ក្រោយ ត្រូវខិតខំបង្កើនសមត្ថភាព ទេពកោសល្យ និងរៀបចំខ្លួនឱ្យសមរម្យថ្លៃថ្នូរ ដើម្បីចូលរួមលើកតម្កើងវិស័យសិល្បៈខ្មែរឱ្យកាន់តែរីកចម្រើន និងល្បីល្បាញនៅលើឆាកអន្ដរជាតិ ៕
ចែករំលែកព័តមាននេះ