ខេត្តសៀមរាប ៖ នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត បានចាប់ឃាត់រថយន្តទួរីសប្រភេទ១២កៅអី មួយគ្រឿង ដែលដឹកទំនិញគេចពន្ធចេញពីច្រកទ្វារព្រំដែនខ្មែរ-ថៃ (ច្រកជាំស្រង៉ាំ) ឆ្លងកាត់តាមស្រុកអន្លង់វែង ខេត្តឧត្តរមានជ័យ ឆ្ពោះចូលមកខេត្តសៀមរាប ដើម្បីយកទៅចែកចាយឱ្យម៉ូយនៅស្រុកជីក្រែង ។
ខេត្តសៀមរាប ៖ នគរបាលប្រឆាំងបទល្មើសសេដ្ឋកិច្ចនៃស្នងការដ្ឋាននគរបាលខេត្ត បានចាប់ឃាត់រថយន្តទួរីសប្រភេទ១២កៅអី មួយគ្រឿង ដែលដឹកទំនិញគេចពន្ធចេញពីច្រកទ្វារព្រំដែនខ្មែរ-ថៃ (ច្រកជាំស្រង៉ាំ) ឆ្លងកាត់តាមស្រុកអន្លង់វែង ខេត្តឧត្តរមានជ័យ ឆ្ពោះចូលមកខេត្តសៀមរាប ដើម្បីយកទៅចែកចាយឱ្យម៉ូយនៅស្រុកជីក្រែង ។
ការចាប់ឃាត់នេះ បានធ្វើឡើងកាលពីវេលាម៉ោង៨ និង៣០នាទីយប់ ថ្ងៃទី២៦ មេសា នៅចំណុចផ្លូវហាយវ៉េ (ផ្លូវលេខ៦៧) ក្នុងស្រុកប្រាសាទបាគង ។ លោកវរសេនីយ៍ទោ សឿន សេន នាយការិយាល័យនគរបាលប្រឆាំងបទល្មើសសេដ្ឋកិច្ចខេត្ត ឱ្យដឹងថា អ្នកបើកបររថយន្តទួរីសប្រភេទ១២កៅអីនោះ ឈ្មោះ ស៊ុន នី ភេទប្រុស អាយុ៤០ឆ្នាំ រស់នៅក្នុងភូមិកំពង់ក្តី ឃុំកំពង់ក្តី ស្រុកជីក្រែង និងព្រូរថយន្តឈ្មោះ ថៃ យ៉ន់ ភេទប្រុស អាយុ១៩ឆ្នាំ ស្នាក់នៅជាមួយគ្នា ។
លោកវរសេនីយ៍ទោ សឿន សេន ឱ្យដឹងទៀតថា ក្នុងការបង្ក្រាបនេះ សមត្ថកិច្ចរឹបអូសបានទំនិញគេចពន្ធជាច្រើនមុខ មានដូចជា សាប៊ូម្សៅកញ្ចប់តូចចំនួន១២កេស និងកញ្ចប់ធំចំនួន២០កេស ទឹកក្រូចដបធំចំណុះ៣,១លីត្រចំនួន២០៨យួរ ទឹកដោះគោក្រហម២០កេស ទឹកដោះគោឆៅកំប៉ុង៥កេស ទឹកក្រូចកំប៉ុង៨យួរ មីម៉ាម៉ា២កេស និងទំនិញគេចពន្ធជាច្រើនទៀត។
លោក សឿន សេន ឱ្យដឹងទៀតថា ក្រោយពីឃាត់ខ្លួនម្ចាស់ទំនិញ និងរថយន្តរួចមក កម្លាំងជំនាញបានបើកមកប្រគល់ជូនសាខាគយ និងរដ្ឋាករខេត្ត ដែលស្ថិតនៅក្នុងសង្កាត់ទឹកវិល ក្រុងសៀមរាប ដើម្បីបន្តចាត់ការផាកពិន័យតាមនីតិវិធីច្បាប់ ៕
ចែករំលែកព័តមាននេះ