ខេត្តកំពង់ឆ្នាំង ៖ នាងក្រមុំម្នាក់បានស្លាប់នៅមន្ទីរពេទ្យខេត្ត កាលពីវេលាម៉ោង៥និង៣០នាទីល្ងាច ថ្ងៃទី២៥ មេសា បន្ទាប់ពីដឹកមកសង្គ្រោះបានប៉ុន្មានម៉ោង ក្រោយពីនាងលេបថ្នាំសម្លាប់ខ្លួននៅផ្ទះរបស់នាង ស្ថិតក្នុងភូមិទួលធ្លក ឃុំមេលំ ស្រុកបរិបូណ៌ ។ តាមស្ត្រីឈ្មោះ លឹម សុផាន ជាម្តាយ បានឱ្យដឹងថា កូនស្រីគាត់ស្លាប់ដោយសារផឹកថ្នាំកណ្តុរ។
នាងឈ្មោះ ឆន សុផល អាយុ២២ឆ្នាំ ជាកូនទី១ ក្នុងចំណោមបងប្អូន៦នាក់ ។ គាត់ជាស្ត្រីមេម៉ាយ ក្រោយមកក៏បានប្តីម្នាក់ទៀត ឈ្មោះ ប៉ែន ឈុន អាយុ៤៩ឆ្នាំ ។ ស្ត្រីរូបនេះបន្តថា មុនកើតហេតុ នាវេលាម៉ោងប្រមាណជាង៨ព្រឹក ថ្ងៃទី២៥ មេសា មានមិត្តភក្តិកូនស្រីគាត់ ដែលនៅភូមិជាមួយគ្នា បានមកបបួលនាងទៅធ្វើការនៅរោងចក្រជាមួយខ្លួន ។ ពេលនោះ កូនស្រីគាត់បានមកសុំគាត់ជាម្តាយ ទៅធ្វើការរោងចក្រ តែគាត់មិនឱ្យទៅ ព្រោះខ្លាចកូនលំបាក ណាមួយកូនមិនធ្លាប់បែកពីក្រុមគ្រួសារផង ។
ក្រោយមកគាត់ក៏ដេកមួយស្របក់ ស្រាប់តែកូនស្រីគាត់ម្នាក់ទៀតឈ្មោះ ឆន ខេមរា អាយុ៦ឆ្នាំ រត់មកប្រាប់គាត់ថា បងផលមិនស្រួលខ្លួន ឈឺក្បាល និងក្អួត ។ ពេលនោះគាត់ក៏ស្ទុះទៅមើល ឃើញកូនស្រីគាត់ក្អួត ហើយពេលសួរនាំ កូនស្រីឆ្លើយថា កូនខុសហើយម៉ែ កូនគិតមិនដល់ កូនលាម្តាយហើយ ហួសពេលហើយម៉ែ គឺកូនលេបថ្នាំបំពុលកណ្តុរ ។ ភ្លាមនោះ គាត់ជាម្តាយបានប្រញាប់យកកូនមកមន្ទីរពេទ្យខេត្តជា បន្ទាន់ ។ ពេលមកដល់មន្ទីរពេទ្យ ទោះបីគ្រូពេទ្យខិតខំសង្គ្រោះយ៉ាងណាក្តី ក៏កូនស្រីគាត់នៅតែស្លាប់នៅម៉ោងជាង៥ល្ងាចថ្ងៃដដែល ។
សពនារីក្រមុំរូបនេះ ត្រូវម្តាយនិងក្រុមគ្រួសារដឹកយកទៅធ្វើបុណ្យតាមប្រពៃណីនៅលំនៅឋានរបស់នាង ក្នុងភូមិទួលធ្លក ឃុំមេលំ ស្រុកបរិបូណ៌ ក្រោមក្តីក្តុកក្តួលរបស់ម្តាយ និងក្រុមគ្រួសារ ។ ជុំវិញការស្លាប់របស់នាងក្រមុំម្នាក់នេះ ត្រូវបានអ្នកជិតខាងសង្ស័យថាមិនមែនត្រឹមតែរឿងមិនឱ្យទៅធ្វើការ ហើយនាងលេបថ្នាំសម្លាប់ខ្លួននោះទេ អាចមានបញ្ហាផ្សេងទៀត ទើបនាងដាច់ចិត្តបែបនេះ ៕
ចែករំលែកព័តមាននេះ