រាជធានីភ្នំពេញ ៖ ព្រះករុណាព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា បានឡាយព្រះហស្ថលេខាលើព្រះរាជក្រឹត្យកាលពីថ្ងៃទី១៦ មេសា ២០១៤ ពីការបង្កើតគណៈកម្មាធិការជាតិរៀបចំព្រះរាជពិធីដង្ហែព្រះបរមអដ្ឋិ ព្រះករុណាព្រះបាទសម្តេចព្រះនរោត្តមសីហនុ ព្រះ មហាវីរក្សត្រ
រាជធានីភ្នំពេញ ៖ ព្រះករុណាព្រះបាទសម្តេចព្រះបរមនាថ នរោត្តមសីហមុនី ព្រះមហាក្សត្រនៃព្រះរាជាណាចក្រកម្ពុជា បានឡាយព្រះហស្ថលេខាលើព្រះរាជក្រឹត្យកាលពីថ្ងៃទី១៦ មេសា ២០១៤ ពីការបង្កើតគណៈកម្មាធិការជាតិរៀបចំព្រះរាជពិធីដង្ហែព្រះបរមអដ្ឋិ ព្រះករុណាព្រះបាទសម្តេចព្រះនរោត្តមសីហនុ ព្រះ មហាវីរក្សត្រ ព្រះវររាជបិតាជាតិខ្មែរ ព្រះបិតាឯករាជ្យ បូរណភាពទឹកដី និងឯកភាពជាតិខ្មែរ «ព្រះបរមរតនកោដ្ឋ» ។ នេះបើតាមការចុះផ្សាយរបស់ទីភ្នាក់ងារព័ត៌មាន (AKP) កាលពីថ្ងៃទី២៦ មេសា ។
គណៈកម្មាធិការជាតិរៀបចំព្រះរាជពិធីដង្ហែព្រះបរមអដ្ឋិព្រះបរមរតនកោដ្ឋនេះមាន សម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា ជាប្រធាន សម្តេចអគ្គមហាពញាចក្រី ហេង សំរិន ប្រធានរដ្ឋសភា ជាអនុប្រធាន និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី ជាអនុប្រធានប្រចាំការ ។ គណៈកម្មាធិការជាតិរៀបចំព្រះរាជពិធីដង្ហែព្រះបរមអដ្ឋិនេះមានលោក និងលោកជំទាវជាឧបនាយករដ្ឋមន្ត្រីចំនួន១០រូបជាអនុប្រធាន ដែលសម្តេចចៅហ្វាវាំង គង់ សំអុល ជាអនុប្រធានអចិន្ត្រៃយ៍ និងមានឥស្សរជនជាទេសរដ្ឋមន្ត្រី និងជារដ្ឋមន្ត្រីចំនួន១២រូបទៀតជាសមាជិក ។ ព្រះករុណាជាអម្ចាស់ជីវិតលើត្បូងមានព្រះរាជឱង្ការក្នុងព្រះរាជសារថា គណៈកម្មាធិការនេះមានភារកិច្ចរៀបចំព្រះរាជពិធីដង្ហែព្រះបរមអដ្ឋិព្រះករុណាព្រះបរមរតនកោដ្ឋ ឱ្យមានដំណើរការល្អប្រសើរឧត្តុង្គឧត្តមស័ក្តិសមនឹងព្រះរាជគោរមងាររបស់ព្រះអង្គជាព្រះមហាវីរក្សត្រ ព្រះវររាជបិតាឯករាជ្យ បូរណភាពទឹកដី និងឯកភាពជាតិខ្មែរ ។
សម្របសម្រួលការងាររៀបចំព្រះរាជពិធីដង្ហែព្រះបរមអដ្ឋិពីព្រះទីនាំងមហាមន្ទីរទៅតម្កល់នៅព្រះចេតិយក្នុងបរិវេណព្រះឧបោថរតនារាម ព្រះកែវមរកតនៃព្រះមហារាជវាំង ។ គណៈកម្មាធិការនេះអាចបង្កើតអនុគណៈកម្មការដើម្បីបំពេញការងារតាមការចាំបាច់ ហើយសម្តេចអគ្គមហាធម្មពោធិសាល ជា ស៊ីម ប្រធានព្រឹទ្ធសភា សម្តេចអគ្គមហាពញាចក្រី ហេង សំរិន ប្រធានរដ្ឋសភា និងសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ត្រូវទទួលបន្ទុកអនុវត្តឱ្យបានសម្រេចនូវព្រះរាជក្រឹត្យនេះចាប់ពីថ្ងៃឡាយព្រះហស្ថលេខាតទៅ ។
ទោះបីជាបែបណា ថ្ងៃដែលមានការរៀបចំព្រះរាជពិធីដង្ហែនោះមិនត្រូវបានដឹងនៅឡើយទេ ។
គួរបញ្ជាក់ថា ព្រះករុណា ព្រះបាទសម្តេចព្រះនរោត្តមសីហនុ ព្រះមហាវីរក្សត្រ «ព្រះបរមរតនកោដ្ឋ» បានយាងចូលទិវង្គតនៅមន្ទីរពេទ្យទីក្រុងប៉េកាំងសាធារណរដ្ឋប្រជាមានិតចិន ដោយជរាពាធ កាលពីថ្ងៃទី១៥ តុលា ២០១២ ក្នុងព្រះជន្មាយុ៩០ព្រះវស្សា ហើយព្រះរាជពិធីថ្វាយព្រះភ្លើង «ព្រះបរមរតនកោដ្ឋ» បានប្រព្រឹត្តទៅកាលពីថ្ងៃទី៤ កុម្ភៈ ២០១៣ កន្លងទៅនេះ ៕
ចែករំលែកព័តមាននេះ