ខេត្តព្រះសីហនុ ៖ ប្រជាពលរដ្ឋជាច្រើនគ្រួសារបានជម្លៀសខ្លួនយ៉ាងឆាប់រហ័សចេញពីផ្ទះសម្បែង បន្ទាប់ពីទុយោប្រេងពោងរបស់ក្រុមហ៊ុនតេលាកម្ពុជា លេខ T107 បានបែកធ្លាយហូរប្រេងស្រោចពេញដី និងហូរចូលពេញក្នុងលូទឹក ក្លិនប្រេងបានជះសាយភាយពិបាកទ្រាំ ជាហេតុធ្វើឱ្យប្រជាពលរដ្ឋរស់នៅជិតនោះមានការភ័យខ្លាចពីការផ្ទុះឆេះជាយថាហេតុចៃដន្យណាមួយ ដែលអាចកើតឡើងនឹកស្មានមិនដល់ ។
ខេត្តព្រះសីហនុ ៖ ប្រជាពលរដ្ឋជាច្រើនគ្រួសារបានជម្លៀសខ្លួនយ៉ាងឆាប់រហ័សចេញពីផ្ទះសម្បែង បន្ទាប់ពីទុយោប្រេងពោងរបស់ក្រុមហ៊ុនតេលាកម្ពុជា លេខ T107 បានបែកធ្លាយហូរប្រេងស្រោចពេញដី និងហូរចូលពេញក្នុងលូទឹក ក្លិនប្រេងបានជះសាយភាយពិបាកទ្រាំ ជាហេតុធ្វើឱ្យប្រជាពលរដ្ឋរស់នៅជិតនោះមានការភ័យខ្លាចពីការផ្ទុះឆេះជាយថាហេតុចៃដន្យណាមួយ ដែលអាចកើតឡើងនឹកស្មានមិនដល់ ។
ទីតាំងឃ្លាំងប្រេងឥន្ធនៈនេះ ស្ថិតនៅអតីតរោងចក្រប្រេងកាត ក្នុងឃុំអូរត្រេះ ស្រុកស្ទឹងហាវ ខេត្តព្រះសីហនុ ។ ជំុវិញបញ្ហាផ្ទុះពោងប្រេងនេះ ពុំមានអ្នកណាម្នាក់ហ៊ានអះអាងថា បណ្តាលមកពីអ្វីច្បាស់លាស់នោះទេ ។ ប៉ុន្តែបើយោងតាមប្រភពពីកម្មករម្នាក់បានអះអាងថា ការលេចធ្លាយប្រេងនេះបានកើតឡើងតាំងពីម៉ោងជាង១២ថ្ងៃត្រង់ ថ្ងៃទី២៦ មេសា មកម្លេ៉ះ ។ ការលេចធ្លាយទុយោប្រេងនេះ ពុំមានអ្នកណាម្នាក់បានដឹងក្រៅតែពីបុគ្គលិកបម្រើការងារក្នុងនោះ ព្រោះអ្វីៗត្រូវបានលាក់ជិតឈឹង កុំតែមានការភ្ញាក់ផ្អើលពីប្រជាពលរដ្ឋដោយសារក្លិនសាយភាយចេញតាមលូទឹក កុំអីគ្មានអ្នកណាបានដឹងពីហេតុការណ៍ដ៏ស្រៀវខ្លួននេះទេ ។
ប្រភពដដែលបានបន្តថា នៅវេលាម៉ោង១ថ្ងៃត្រង់ ថ្ងៃទី២៦ មេសា ខណៈ ពេលក្រុមកម្មករ និងបុគ្គលិកមកពីហូបបាយវិញ ក៏ឃើញទុយោប្រេងពោងលេខ T107 លេចធ្លាយបាញ់ប្រេងចេញតាមគល់វ៉ាន ។ ខណៈនោះ ក្រុមបច្ចេកទេសក៏រូតរះធ្វើការជួសជុល ប៉ុន្តែការជួសជុលត្រូវបរាជ័យ ដោយសារកន្លែងដែលលេចធ្លាយនោះ ប្រេងបានបាញ់ចេញខ្លាំងទៅៗ រហូតក្រុមការងារចូលជិតលែងបាន ។ នៅពេលនោះហើយ គ្រោះមហន្តរាយជាយថាហេតុត្រូវបានប្រឈមមុខមិនអាចទប់បាន ទើបក្រុមការងារបានបណ្តោយឱ្យប្រេងហូរតាមសម្រួល និងបានត្រឹមជួយបាញ់ទឹកបន្ថយចំហាយប្រេងតែប៉ុណ្ណោះ ។
ក្នុងឧបទ្ទវហេតុនេះ តាមដំណឹងថាបានត្រឹមតែយករថយន្តមកបូមយកប្រេងចេញពីលូទឹក ដឹកចេញពី កន្លែងកើតហេតុ ព្រោះប្រេងដែលលេចធ្លាយនេះមានបរិមាណមិនច្បាស់លាស់ទេ ដែលតាមសម្តីកម្មករខ្លះថា មានចំនួនរាប់សិបតោន ។ រហូតមកដល់ព្រឹកថ្ងៃទី២៧ មេសា ការគ្រប់គ្រងស្ថានការណ៍ទប់ស្កាត់ ក្រែងកើតមានគ្រោះអាសន្នណាមួយ នៅតែបន្ត ខណៈពេលប្រេងដែលលេចធ្លាយ មិនទាន់អស់គ្រោះថ្នាក់ ។ ក្នុងស្ថានភាពជម្លៀសប្រេងដែលលេចធ្លាយនេះ គេសង្កេតឃើញ រថយន្តរបស់ក្រុមហ៊ុនតេឡារាប់រយគ្រឿងបញ្ឈរចាំដឹកជញ្ជូនចេញ ។ ពុំមានព័ត៌មានផ្លូវការណាមួយទម្លាយចេញទេ ហើយការព្យាយាមសុំការបំភ្លឺពីអ្នកទទួលខុសត្រូវទីនោះ ពុំទទួលបានលទ្ធផលឡើយ ៕
ចែករំលែកព័តមាននេះ