ក្រុងព្រះសីហនុ៖ លំហូរចូលយ៉ាងគំហុកលើការវិនិយោគគ្រប់ប្រភេទដោយវិនិយោគិនបរទេស ជាពិសេសការវិនិយោគរបស់ជនជាតិចិនមកកាន់ខេត្តព្រះសីហនុរយៈពេលពីរ ឬបីឆ្នាំប៉ុណ្ណោះចុងក្រោយនេះបានធ្វើឲ្យវិស័យអចលនៈទ្រព្យនៅខេត្តមាត់សមុទ្រ ងើបឡើងយ៉ាងគំហុកដែលបានធ្វើឲ្យម្ចាស់ស្រុកខ្លះកាក់កបនឹងការជួលផ្ទះ ដីធ្លី យានយន្តឬក៏សាងសង់សណ្ឋាគារសម្រាប់ជួលឲ្យជនជាតិចិនក្នុងតម្លៃខ្ពស់ ។
ក៏ប៉ុន្តែគ្រប់យ៉ាងបានប្រែប្រួល១៨០ឌឺក្រេបណ្តាលឲ្យខ្មែរមួយចំនួននៅខេត្តព្រះសីហនុប្រែជាផលប៉ះពាល់និងកំពុងវណ្ឌកជាមួយនឹងការជំពាក់លុយនៅធនាគារ បន្ទាប់ពីរាជរដ្ឋាភិបាលបានចេញសារាចរណែនាំកាលពីថ្ងៃទី១៨ ខែសីហា ឆ្នាំ២០១៩ ស្តីពីការពង្រឹងការគ្រប់គ្រង អាជីវកម្មល្បែងភ្នាល់តាមម៉ាស៊ីនអេឡិចត្រូនិចតាមរយៈអិនធីណេត អនឡាញ( internet online ) ក្នុងនិងក្រៅប្រទេសគ្រប់ប្រភេទនិងគ្រប់រូបភាពនៅក្នុងព្រះរាជាណាចក្រកម្ពុជាត្រូវបិទជាស្ថាពរនៅចុងឆ្នាំ២០១៩ខាងមុខនេះ។ នៅក្នុងខ្លឹមសារសារាចរណែនាំខាងលើបានបញ្ជាក់ឲ្យដឹងទៀតថា ចំពោះអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៊ិនធីណេតអនឡាញក្នុងនិងក្រៅប្រទេសដែលមានអាជ្ញាប័ណ្ណត្រូវបានអនុញ្ញាតិឲ្យធ្វើសកម្មភាពរហូតផុតសុពលភាពដែលបានកំណត់ក្នុងអាជ្ញាប័ណ្ណបន្ទាប់ពីនេះក្រសួងសេដ្ឋកិច្ចនិងហិរញ្ញវត្ថុមិនបន្តសុពលភាពឲ្យប្រកបអាជីវកម្មល្បែងភ្នាល់ប្រភេទនេះតទៅទៀតឡើយ។
រាជរដ្ឋាភិបាលបញ្ឈប់ការផ្តល់គោលការណ៍និងអាជ្ញាបណ្ណអនុញ្ញតឲ្យប្រកបអាជីកម្មល្បែងភ្នាល់តាមម៉ាស៊ីនអេឡិចត្រូនិចតាមរយៈអ៊ិនធីណេតអនឡាញក្នុងនិងក្រៅប្រទេសនៅក្នុងព្រះរាជាណាចក្រកម្ពុជាចាប់ពីថ្ងៃចុះហត្ថលេខាដូចមាននៅក្នុងខ្លឹមសារខាងលើនេះរហូតដល់ត្រឹមចុងឆ្នាំ២០១៩ដែលកំពុងតែរំកិលខិតចូលមកដល់ក្នុងរយៈពេលដ៍ខ្លីខាងមុខ។
ក្រោយការប្រកាសបិទហ្គែមអនឡាញនៅកម្ពុជានោះ គឺបានឃើញជនជាតិចិនរាប់ពាន់នាក់បាននឹងកំពុងសម្រុកចាកចេញពីកម្ពុជានិងបានធ្វើឲ្យម្ចាស់អាជីវកម្មដែលធ្លាប់តែសើមមាត់សើម.ក នៃការជួលអចលទ្រព្យឲ្យទៅចិនញញឹមលែងស្រស់តែម្តង។
ពាណិជ្ជករប្រកបរបរទិញ-លក់ អចលនទ្រព្យ ពុះដីឡូត៍លក់ និងម្ចាស់ផ្ទះសំណាក់ សណ្ឋាគារដែលមានបន្ទប់ជួលឲ្យជនជាតិចិនជាច្រើនអ្នកសុំមិនបញ្ចេញឈ្មោះបានត្អូញត្អែរបង្ហាញនូវក្តីកង្វល់របស់ពួកគាត់ថា ក្រោយពេលដែលរាជរដ្ឋាភិបាលបានចេញសារាចរណែរនាំបញ្ឈប់ការលេងល្បែងភ្នាល់ដូចបានរៀបរាប់ខាងលើ ធ្វើឲ្យជនជាតិចិនបាននាំគ្នាវេចបង្វិចចាកចេញពីខេត្តព្រះសីហនុទៅប្រទេសកំណើតវិញជាបន្តបន្ទាប់ ធ្វើឲ្យម្ចាស់ផ្ទះសំណាក់.សណ្ឋាគារ ដែលជួលឲ្យចិននិងអ្នកប្រកបមុខរបរផ្សេងៗមួយចំនួនត្រូវបានជួបហារនិភ័យជាច្រើន តែសម្រាប់អ្នកដែលបានលក់ដីផុតឲ្យចិនគឺមិនមានបញ្ហានោះទេ។
ប្រភពដដែលបានបន្តទៀតថាអ្នករងគ្រោះធំគឺភាគច្រើនអ្នកមានដីជួលឲ្យជនជាតិចិន គឺពុំមានសកម្មភាពនៃការអ្នកជួល ឬទិញគគ្រឹកគគ្រេងដូចមុនឡើយ ។ ហើយបើមានអ្នកជួល ឬទិញ ក៏សុំបញ្ចុះតម្លៃខុសពីពេលមុនរហូតដល់ទៅ៥០%។ ដូចជាករណីជួលផ្ទះ.សណ្ឋាគារ។ល។ ប្រភពខាងលើបានបន្តឲ្យដឹងទៀតថា ទីតាំងខ្លះដែលជនជាតិចិនបានជួលមកទល់ពេលថ្មីនេះពួកគេបាននាំគ្នាចាកចេញទាំងយប់និងបានលួបដោះយកសម្ភារៈនៅក្នុងផ្ទះឬសណ្ឋារគារយកទៅលក់ឡាយឡុងមិនឲ្យម្ចាស់ផ្ទះដឹងមុន។ អ្នកមានដី ផ្ទះសំណាក់ និងសណ្ឋាគារជួលខ្លះត្រូវបានជនជាតិចិនបញ្ចប់មុនកិច្ចសន្យាមកដល់ ជាហេតុធ្វើឲ្យមានហានិភ័យខ្ពស់កំពុងតែវាយលុកជាបណ្តើរៗដូចជាម្ចាស់ដី .ម្ចាស់ផ្ទះ. ម្ចាស់សណ្ឋាគារ ណាដែលជាប់កម្ចីឥណទានធនាគារ។ល។ ហើយបញ្ហាប្រឈមខ្លាំងគឺនៅចុងខែធ្នូ ឆ្នាំ២០១៩ ខាងមុខក្រោយពេលឱសាន្តវាទបញ្ចប់ល្បែងភ្នាល់តាមរយៈអិនធីណេត អនឡាញ។
ចំពោះការចាកចេញរបស់ជនជាតិចិនក៏បានបណ្តាលឲ្យមានផលប៉ះពាល់ដល់អ្នកជួលរថយន្តឲ្យចិនផងដែរ ក្រោយចិនចាកចេញពីខេត្តព្រះសីហនុ ម្ចាស់រថយន្តកំពុងលក់រថយន្តបញ្ចុះតម្លៃស្ទើរតែ៥0%នៅតាមកន្លែងជួលរថយន្តស្របពេលរថយន្តជួលឲ្យចិនហើយចិនបានប្រគល់មកឲ្យម្ចាស់វិញ។ ងាកទៅផលប៉ះពាល់ផ្នែកជួលដីឬពុះដីឡូត៍លក់វិញ គឺមានសភាពទ្រឹង។ ត្រង់ចំនុចនេះមានន័យថា នៅពេលវិស័យអនឡាញកំរើកយ៉ាងគំហុកនិងមានជនជាតិចិនរាប់ពាន់នាក់បង្ហាញវត្តមាននៅខេត្តព្រះសីហនុ ចរន្តលុយបានចរាចរពីតំបន់មួយទៅតំបន់មួយទៀតតាមរយៈអ្នកដែលមានផ្ទះ សណ្ឋាគារ និងដីជួលឬលក់ឲ្យចិន ក៏បានធ្វើឲ្យឈ្មួញពុះដីឡូត៍លក់ ឬសង់ផ្ទះល្វែងបានកាក់កបយ៉ាងក្រាស់ក្រែល។ តែបច្ចុប្បន្នការលក់ដីឡូត៍.សង់ផ្ទះល្វែងលក់ហាក់នៅទ្រឹងមួយកន្លែងតែមិនទាន់មានសញ្ញាណណាមួយបញ្ចុះតម្លៃលក់ចេញទេ ហើយជំនួញពុះដីឡូត៍ ឬសង់ផ្ទះល្វែងលក់ក៏មិនបន្តគំរោងថ្មីទៀតដែរ។
សេវាមេធាវីវិញរយៈពេល២ឆ្នាំចុងក្រោយនេះគឹតត្រឹមថ្ងៃទី១៨ ខែកញ្ញា ឆ្នាំ ២០១៩ មេធាវីមានសេវាកាក់កបជាមួយអតិថិជនរកស៊ីជួល.ទិញ.លក់អចលនៈទ្រព្យ។ បច្ចុប្បន្នមេធាវីចាប់ផ្តើមធ្វើកិច្ចការបណ្តឹងនៃកិច្ចសន្យាវិញហើយ (សេវាធ្លាក់ចុះ) ។ បន្ទាប់ពីជនជាតិចិន បានត្រលប់ទៅវិញបណ្ដើរៗ ប្រជាពលរដ្ឋកម្ពុជាមួយចំនួន បានរងផលប៉ះពាល់ជាពិសេសទៅលើប្រាក់ចំណូលរបស់ពួកគេ ។ ជាក់ស្ដែងបងប្រុសមួយរូបដែលប្រាប់ឈ្មោះត្រឹមថា លោកធី បានអះអាងថាលោកផ្ទាល់ ដែលធ្លាប់តែបានផលពីវត្តមានជនជាតិចិន នៅក្នុងខេត្តព្រះសីហនុ ដោយការជួលអគារនិងផ្ទះទៅជនជាតិចិននោះ ពេលនេះចិនចាប់ផ្ដើមទទូចសុំបញ្ចុះតម្លៃផ្ទះជួលទាំងវិញ ដោយសារតែពួកគេថា គ្នាគេមួយចំនួនត្រលប់ទៅវិញ ហើយមិនសូវមានអ្នកមករកសេវាកម្មស្នាក់នៅដូចមុនទៀតឡើយ ។ លោកបានបន្តថាកាលមុនជនជាតិចិនគ្នាគាត់អាចរកចំណូលបានច្រើនពីគ្នាគាត់ ហើយគាត់ហ៊ានជួលផ្ទះពីពលរដ្ឋក្នុងស្រុកក្នុងតម្លៃខ្ពស់ ដើម្បីជួលបន្តទៅជនជាតិចិនគ្នាគាត់ តែនៅពេលដែលចិនត្រលប់ទៅវិញ ពួកគាត់ក៏រកចំណូលមិនបានច្រើនដូចមុន ដូច្នេះហើយគាត់ត្រូវស្នើសុំម្ចាស់ផ្ទះជួលដែលជាជនជាតិខ្មែរ បញ្ចុះតម្លៃខ្លះ ដើម្បីអាចនៅជួលបន្ត ហើយបើសិនជាម្ចាស់ផ្ទះជួលជនជាតិខ្មែរ មិនព្រមបញ្ចុះតម្លៃនោះទេ ពួកគេអាចនឹងឈប់ជួល ។
លោកធីបានបន្ថែមថា «នៅមានអ្នកប៉ះពាល់ច្រើនជាងនេះទៀត ដោយសារតែពលរដ្ឋមួយចំនួន ឃើញគេធ្វើផ្ទះជួលអោយជនជាតិចិន បានលុយច្រើន ទើបខំប្រឹងស្រវេស្រវារកខ្ចីលុយពីធនាគារ ដើម្បីមកសង់ផ្ទះសម្រាប់ជួលអោយចិនដែរ តែអ្នកខ្លះក៏ទើបតែជួលបានមួយរយៈពេលខ្លះ អ្នកខ្លះទៀតមិនទាន់ទាំងបានជួលផង ស្រាប់តែជនជាតិចិនមួយចំនួនត្រលប់ទៅស្រុកវិញ ។ នៅពេលចិនត្រលប់ទៅវិញ ក៏ចាប់ផ្ដើមមានបញ្ហាហិរញ្ញវត្ថុ ដោយមិនមានប្រាក់គ្រប់គ្រាន់សម្រាប់បង់ទៅធនាគារវិញ » ។
លោក ងួន នេត ប្រជាពលរដ្ឋក្នុងខេត្តព្រះសីហនុ ក៏បាននិយាយផងដែរថា លោកមើលឃើញថា ចិនមិនទាន់ចេញទៅអស់ទេ ពោលគឺចេញតែចិនដែលមកលេងហ្គេម តែសម្រាប់ការដ្ឋានសំណង់ធំៗរបស់ចិន នៅតែមានដំណើរការដដែល គ្រាន់តែមិនសូវសំបូរចិនដូចកាលពីមុន ។ លោកបាននិយាយថា «សម្រាប់ផលប៉ះពាល់ក្រោយពេលចិនចាកចេញទៅប្រាកដជាមាន ចំពោះអាជីវកម្មមួយចំនួន ដូចជាជួលផ្ទះ និងជួលឡានអោយចិនជាដើម ។ អ្នកខ្លះយកលុយពីធនាគារ មកសង់ផ្ទះ ឬ ទិញរថយន្តជួលអោយចិន តែនៅពេលចិនចាកចេញពួកគេ ចាប់ផ្ដើមមានបញ្ហាហិរញ្ញវត្ថុហើយ » ។ លោកបន្តថា តម្លៃផ្ទះជួលអោយចិន ពេលនេះ បានធ្លាក់ចុះប្រហែល៥០ភាគរយឯណោះ សម្រាប់ផ្ទះណាដែលចិនចង់នៅបន្ត តែសម្រាប់ផ្ទះណាដែលចិនឈប់នៅ ពិបាករកអ្នកជួលបន្តណាស់ ដូច្ននេះ វាពិតជាមានផលប៉ះពាល់ពិតមែន ក្រោយការចាកចេញរបសជនជាតិចិន ។
អ្នករត់រ៉ឺម៉កកង់បី និងអ្នកបើកតាក់ស៊ី ក្នុងខេត្តនេះ ក៏បានត្អូញត្អែផងដែរ ពីការចាកចេញរបស់ចិន ដោយពួកគេនិយាយថា ពីមុនគេអាចរកចំណូលបានយ៉ាងហោចណាស់ ១០ម៉ឺនឬ២០ម៉ឺនរៀលក្នុងមួយថ្ងៃ តែពេលនេះវិញ រកតែ១០ដុល្លារក៏ពិបាកដែរ ពីព្រោះអ្នកជិះកាលមុនជាចិន ហើយគេហ៊ានអោយតម្លៃខ្ពស់ៗ សម្រាប់ដឹកគេទៅកន្លែងដែលគេចង់ទៅ តែសម្រាប់ជនជាតិខ្មែរវិញ គឺមានការត្បិតត្បៀតណាស់ មុននឹងចាយវាយ ។
បើក្រឡេកទៅមើលផលប៉ះពាល់ជ្រុងម្ខាងទៀតក្រោយការបិទល្បែងភ្នាល់គ្រប់ប្រភេទតាមរយៈអ៊ីនធើណែតអនឡាញ បុគ្គលិកនារីៗ៦០-៧០% ប្រឈមទៅការអត់ការងារធ្វើ។ ប្រភពខាងលើបានបញ្ជាក់ជាចុងក្រោយថា ការហក់ឡើងលើវិស័យអចលនទ្រព្យនៅខេត្តព្រះសីហនុនាពេលកន្លងមកដែលទទួលបានផលប្រយោជន៍ច្រើនមានតែអ្នកដែលមានដី មានផ្ទះ សណ្ឋាគារ ជួលឬលក់ឲ្យជនជាតចិនតែប៉ុណ្ណោះ។ ដោយឡែកអ្នកដែលរត់ទៅរកកម្ចីពីឥណទានមីក្រូធនាគារ។ល។ យកមករកស៊ី និងខ្លះខ្ចីលុយធនាគារសាងសង់ផ្ទះទុកជួលឲ្យចិនមិនទាន់បានសង់រួចរាល់ផង ចិនក៏ចេញទៅអស់ បច្ចុប្បន្នកំពុងតែជួបហានិភ័យខ្ពស់បណ្តាលឲ្យហូបមិនបាន សម្រាន្តមិនលក់ បក់មិនល្ហើយធ្លាក់ខ្លួនស្គមរីងរៃដោយសារតែភ័យព្រួយខ្លាចមិនមានប្រាក់សងមីក្រូហិរញ្ញវត្ថុ ឬធនាគារ ហើយត្រូវបានបង្ខំចិត្តលក់ឡាយឡុងអចលនៈទ្រព្យរបស់ខ្លួនយកមកដោះបំណុល។
ក្រៅពីផលប៉ះពាល់នៅខេត្តព្រះសីហនុ ការចាកចេញរបស់ជនជាតិពីកម្ពុជាជាបន្តបន្ទាប់ ផលប៉ះពាល់បានកើតឡើងជាបន្តបន្ទាប់ទៅលើប្រជាពលរដ្ឋដែលធ្លាប់ទទួលផលពីវត្តមានជនជាតិ បើទោះបីជាមន្ត្រីរាជរដ្ឋាបាលបានប្រកាសថាមិនមានផលប៉ះពាល់ក៏ដោយ ។ សម្រាប់តំបន់ដែលប៉ះពាល់ក្រៅពីខេត្តព្រះសីហនុ ក៏មានតំបន់ពីរផ្សេងទៀតនៅជាប់ព្រំដែនរងផលប៉ះពាល់ដូចគ្នា ក្នុងនោះមានប៉ោយបែត នៃខេត្តបន្ទាយមានជ័យ និងក្រុងបាវិត នៃខេត្តស្វាយរៀង ដោយសារតែទាំងពីរតំបន់នោះក៏មានវត្តមានជនជាតិច្រើន រកស៊ីអាជីវកម្មហ្គេមអនឡាញ ។
បើតាមលោក ខៀវ បូរី ប្រជាពលរដ្ឋក្នុងក្រុងប៉ោយប៉ែត បាននិយាយថា ក្នុងនាមប្រជាពលរដ្ឋរស់នៅតំបន់ប៉ោយប៉ែតផ្ទាល់ លោកមើលឃើញថា ផលប៉ះពាល់ពិតជាមានមែន បន្ទាប់ពីចិនបានចាកចេញពីប្រទេសកម្ពុជា ក្រោយការប្រកាសបិតហ្គេមអនឡាញពីសំណាក់រាជរដ្ឋាភិបាល ។ ផលប៉ះពាល់ធំៗរួមមានទៅលើវិស័យដីធ្លី ដែលបានឡើងខ្ពស់ និងមានការទិញលក់ច្រើននោះ បានធ្លាក់ចុះនិងស្ងប់ស្ងាត់វិញ ហើយពលរដ្ឋដែលធ្លា់អាស្រ័យផលពីវត្តមានជនជាតិចិននោះ ក៏កំពុងតែមានវិបត្តិផងដែរ ដោយសារតែពួកគេមួយចំនួន បានត្រៀមពង្រីកអាជីវកម្មសម្រាប់ទទួលពីចិន ដូចជាសង់សណ្ឋាគារ ផ្ទះសំណាក់ឬអគារជួលទៅចិន ហើយទុនមួយចំនួន ក៏បានយកពីធនាគារ និងមីក្រូហិរញ្ញវត្ថុ ដើម្បីមកសាងសង់ តែនៅពេលដែលចិនត្រលប់ទៅវិញ គ្មានអ្នកជួល គ្មានប្រាក់ចំណូល ដែលធ្វើអោយពួកគេ ត្រូវជួបវិបត្តិហិរញ្ញវត្ថុ សម្រាប់ដោះស្រាយសងត្រលប់ទៅធនាគារ ។ លោកបានបន្តថា ចិនដែលមកកាន់ប៉ោយប៉ែត ជាចិនប្រកបអាជីវកម្មហ្គេមអនឡាញ ហើយនៅពេលដែលរដ្ឋាភិបាលបានប្រកាសបិទភ្លាមៗពួកគេក៏មិនដឹងថាត្រូវធ្វើអ្វី ទើបពួកគេត្រូវចាកចេញពីកម្ពុជា និងស្វែងរកប្រទេសផ្សេងទៀត ដែលអនុញ្ញាតអោយគេអាចប្រកបរបរនេះបាន ។
លោក ខៀវ បូរី បានបន្តថា «ការប្រកាសបិទហ្គេមអនឡាញត្រូវបានធ្វើឡើងលឿនរហ័ស និងប្រញ៉ាប់ពេក ដោយមិនទុកពេលវេលាណាមួយសម្រាប់អោយពលរដ្ឋកម្ពុជា ដោះស្រាយជាមួយជនជាតិចិនដែលធ្វើអាជីវកម្មនេះ នៅក្នុងប្រទេសកម្ពុជា ដូច្នេះហើយទើបចិន ក៏សម្រុកចេញពីកម្ពុជាទាំងប្រញ៉ាប់ដូចគ្នា » ។ លោកបន្ថែមថា សព្វថ្ងៃនេះពលរដ្ឋដែលជំពាក់លុយគេច្រើនសម្រាប់សង់អគារ និងទិញឡានជួលអោយចិន ស្ទើរតែមានអ្នកខ្លះលោតពីលើអគារហើយ ដោយសារតែពិបាកក្នុងដោះស្រាយ និងអវត្តមានរបស់ចិន បើទោះបីជាក្រសួងការងារ បានប្រកាសអោយជនបរទេសអាចប្រកបរបរដែលត្រូវហាមកាលពីប៉ុន្មានខែមុននោះ ។ លោកបានបន្តថា « រដ្ឋាភិបាលគួរតែទុកពេលវេលាណាមួយសមស្រប មួយឆ្នាំឬកន្លះឆ្នាំ ដើម្បីត្រៀមខ្លួន ។ ម្យ៉ាងទៀតនៅពេលដែលប្រកាសបិទភ្លាមៗបែបនេះ ចិនក៏បានប្រកាសលក់ឧបករណ៍ឡៃឡុងដែរ ដូចជាកុំព្យូទ័រ ម៉ាស៊ីនត្រជាក់ និងឧបករណ៍ផ្សេងទៀត ។ក្រៅពីនោះដែរ ពលរដ្ឋក៏បាត់បង់ការងារដែលធ្លាប់ធ្វើជាមួយចិនដែរ ដែលអាចឈានទៅដល់ការបាត់បង់ចំណូលដូចគ្នា » ។
ដោយឡែកពលរដ្ឋមួយរូបនៅក្នុងក្រុងបាវិតខេត្តស្វាយរៀង ក៏បាននិយាយស្រដៀងគ្នាដែរថា សព្វថ្ងៃ មើលឃើញថាចិនបានដាក់លក់ឧបករណ៍នៅមុខអគារដែលធ្លាប់ជួលនោះក្នុងតម្លៃទាប ដើម្បីចេញអោយលឿន និងប្រញ៉ាប់ទៅកាន់ទីកន្លែងផ្សេង ។ សកម្មភាពនេះ បានកើតឡើងបន្ទាប់ពីរដ្ឋាភិបាលប្រកាសបិទហ្គេមអនឡាញដូចគ្នាដែរ ។
លោក គី សេរីវឌ្ឍន៍អ្នកវិភាគសេដ្ឋកិច្ចមួយរូបនៅកម្ពុជា បានលើកឡើងថា ការចាកចេញរបស់ចិន ពីកម្ពុជា បន្ទាប់ពីរដ្ឋាភិបាលប្រកាសបិទហ្គេមអនឡាញយើងមិនអាចបដិសេធពីផលប៉ះពាល់បាននោះទេ ពោលវាពិតជាមានផលប៉ះពាល់ ក៏ប៉ុន្តែវាក្នុងរយៈពេលខ្លីប៉ុណ្ណោះ សម្រាប់រយៈពេលវែងវិញ ស្ថានភាពនេះនឹងត្រលប់មករកភាពដើមវិញ ព្រោះអ្នកដែលចាកចេញ មិនមែនជាវិនិយោគិននោះទេ ដូច្នេះសកម្មភាពវិនិយោគនៅតែមាន មិនមានការរាំងស្ទះអ្វីឡើយ ។ លោកថា៖« ក្នុងរយៈពេលខ្លី វាពិតជាទទួលរងផលប៉ះពាល់មែន ក្រោយការចាកចេញរបស់ចិន ដោយសារតែពលរដ្ឋដែលធ្លាប់រកចំណូលបានពីជនជាតិក៏បានធ្លាក់ចំណូលវិញ ក៏ប៉ុន្តែនៅរយៈពេលវែងទៅមុខទៀត ផលប៉ះពាល់នេះ វានឹងប្រសើរឡើងវិញ » ៕ កែសម្រួលដោយ ៖សុឃាក់
អត្ថបទសរសេរ ដោយ
អត្ថបទសរសេរ ដោយ
ចែករំលែកព័តមាននេះ