ខេត្តប៉ៃលិន ៖ ក្រោយពីសារព័ត៌មាននិងគេហទំព័រកោះសន្តិភាព បានចេញផ្សាយកាលពីព្រឹកថ្ងៃទី១០ តុលា នូវព័ត៌មានដ៏កក្រើកមួយពាក់ព័ន្ធនឹងករណី ស្ត្រីចំណាស់មេម៉ាយក្រីក្រម្នាក់ បានអំពាវនាវដល់ទេវតាក្នុងករណីរឿងរដ្ឋអំណាចខេត្តឃុបឃិតគ្នាយកដីដែលគាត់ធ្លាប់អាស្រ័យផល ទៅលក់ឱ្យក្រុមហ៊ុនឯកជនរបស់លោកឧកញ៉ាមួយរូប នៅចំណុចភ្នំ២០០ ស្ថិតក្នុងភូមិផ្សារព្រំជើង ឃុំស្ទឹងកាច់ ស្រុកសាលាក្រៅ ខេត្តប៉ៃលិន ដែលដីនោះមានទំហំជាង១ហិកតា មិនបានទទួលប្រាក់សូម្បី១០០រៀល ខណ:គាត់ធ្លាប់ដាំដុះបន្លែបង្ការលើដីនោះជាយូរណាស់មកហើយ ពោលគឺចាប់តាំងពីឆ្នាំ២០០៧-២០០៨មកម្ល៉េះ ។ សូមរំលឹកថា៖ ឈរយំសំពះទេវតា រកអ្នកមានបុណ្យមេត្តាជួយផង..!
ប្រភពច្បាស់ការណ៍ថា លុះពេលថ្មីៗកន្លងទៅនេះខណ:ដីឡើងថ្លៃ ស្រាប់តែក្រុមឈ្មួញត្រូវគ្នាជាមួយអ្នកមានអំណាច បានរៀបចំគម្រោងធ្វើប្លង់ យកទៅលក់ឲ្យអ្នកផ្សេង(ឧកញ៉ា) បានប្រាក់រាប់សែនដុល្លារ ហើយធ្វើរបងហ៊ុមព័ទ្ធជុំវិញ ដោយមិនព្រមចេញថ្លៃសំណងជាប្រាក់ទៅឱ្យរូបគាត់ សូម្បីតែមួយរយរៀលនោះឡើយ ទើបរហូតមកដល់ថ្ងៃទី១១ តុលា លោក ផាន់ ចាន់ធុល អភិបាលខេត្តប៉ៃលិន បានឱ្យមន្ត្រីក្រោមឱវាទហៅស្ត្រីមេម៉ាយក្រីក្រឈ្មោះ ឡុង នឿន អាយុ៥៥ឆ្នាំ ចូលជួបក្នុងសាលាខេត្ត ដើម្បីធ្វើការសម្របសម្រួលនៅក្នុងបន្ទប់ធ្វើការរបស់លោកដោយបានប្រគល់ប្រាក់ចំនួន១០លានរៀល ដើម្បីឱ្យគាត់ស្ងប់ចិត្តស្ងប់អារម្មណ៍យកទៅផ្គត់ផ្គង់ជីវភាពប្រចាំថ្ងៃ ។
ប្រភពព័ត៌មានបានឱ្យដឹងថា ការសម្របសម្រួលនោះ ខាងភាគីស្ត្រីក៏បានព្រមទទួលប្រាក់ដើម្បីយកទៅដោះស្រាយជីវភាពរស់នៅ ព្រោះគាត់ជាស្ត្រីមេម៉ាយក្រីក្រកម្សត់ ចិញ្ចឹមកូនរហូតដល់ទៅ៦នាក់ និងធ្លាប់បានដាំដុះនៅលើដីនេះ ជាង១០ឆ្នាំមកហើយ មិនដឹងថាដីនោះមានម្ចាស់នោះទេ ព្រោះគាត់ជាអ្នកកាប់ឆ្ការមុនគេ ។
ឆ្លៀតក្នុងឱកាសនោះលោក ផាន់ ចាន់ធុល អភិបាលខេត្ត បានណែនាំ និងក្រើនរំលឹកដល់អ្នកសារព័ត៌មាននៅក្នុងខេត្តប៉ៃលិនទាំងអស់ថា មុននឹងធ្វើការសរសេរចុះផ្សាយរឿងរ៉ាវអ្វីមួយចំនួន ដូចជាការផ្សព្វផ្សាយពាក់ព័ន្ធនឹងរឿងភ្នំជាដើម ត្រូវតែរាយការណ៍ ជូនលោកជាមុនសិន ។ ម្យ៉ាងវិញទៀត ត្រូវផ្សាយតែព័ត៌មានណា ដែលជួយអភិវឌ្ឍន៍ខេត្ត ហាមផ្សាយព័ត៌មានណា ដែលមានចរិតញុះញង់ធ្វើឲ្យចលាចលដល់សង្គមជាតិជាដើម ។
ស្ត្រីមេម៉ាយ ឈ្មោះ ឡុង នឿន បានថ្លែងអំណរគុណយ៉ាងជ្រាលជ្រៅចំពោះលោក ផាន់ ចាន់ធុល អភិបាលខេត្ត ដែលបានប្រគល់ប្រាក់ចំនួន១០លានរៀលជូនគាត់ ដើម្បីយកទៅប្រើប្រាស់ចាយវាយសម្រាប់ចិញ្ចឹមកូនចៅ ហើយក៏មិនភ្លេចអរគុណដល់សារព័ត៌មានកោះសន្តិភាព ដែលជាកាសែតល្បីប្រចាំប្រទេសកម្ពុជា បានចុះផ្សាយពាក់ព័ន្ធនឹងរឿងរ៉ាវរបស់គាត់ ។
រូបគាត់ក៏សូមជូនពរដល់អាជ្ញាធរខេត្ត ក៏ដូចជាកាសែតកោះសន្តិភាព និងភ្នាក់ងារប្រចាំខេត្តប៉ៃលិនឱ្យទទួលបាននូវជោគជ័យគ្រប់ប្រការ ជាទីសង្ឃឹមដល់ប្រជាពលរដ្ឋគ្រប់ៗគ្នាផងដែរ ។ បើកុំកោះសន្តិភាពចេញផ្សាយ ប្រហែលគ្មានមនុស្សលោកណាមើលឃើញភាពអយុត្តិធម៌នេះទេ ។
សូមបញ្ជាក់ថា នៅចំណុចដីភ្នំ២០០ ក្រោយកាស៊ីណូម្កុដពេជ្រ ជាប់ព្រំដែនកម្ពុជាថៃ ក្នុងភូមិផ្សារព្រំ ឃុំស្ទឹងកាច់ ស្រុកសាលាក្រៅ ត្រូវបានគេយកស័ង្កសីទៅហ៊ុមព័ទ្ធជុំវិញ មានចំនួនជាង២៣ហិកតា ក្រោយពីបានលក់ឱ្យឈ្មួញ ដើម្បីធ្វើការអភិវឌ្ឍសម្រាប់ខេត្ត ៕
ចែករំលែកព័តមាននេះ