រាជធានីភ្នំពេញ ៖ ដោយសារតែវិស័យធនធានមនុស្សជាពិសេសជំនាញនៅកម្ពុជា ហាក់នៅមានកម្រិតបើធៀបនឹងបណ្ដាប្រទេសក្នុងតំបន់អាស៊ាន កម្ពុជា បានកែទម្រង់នេះដោយបានងាកមកបណ្ដុះបណ្ដាលបន្ថែមនូវជំនាញធនធានមនុស្ស ដើម្បីបម្រើក្នុងវិស័យអាទិភាព ហើយរាជរដ្ឋាភិបាលបានបញ្ចេញទុន៥លានដុល្លាររបស់ខ្លួន ដើម្បីគម្រោងអភិវឌ្ឍន៍ជំនាញនៅកម្ពុជា និងមានការចូលរួមពីខាងធនាគារអភិវឌ្ឍន៍អាស៊ីនូវទឹកប្រាក់ប្រមាណ១០លានដុល្លារអាមេរិកបន្ថែមទៀត សម្រាប់ដំណើរការនូវគម្រោងបណ្ដុះបណ្ដាលធនធានមនុស្សនេះ ។
បើតាមលោក វង្សី វិស្សុត រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានមានប្រសាសន៍ថា ការអភិវឌ្ឍជំនាញគឺមានសារសំខាន់ណាស់ ក្នុងការអភិវឌ្ឍប្រទេសជាតិ ព្រោះជំនាញនេះ វាអាចជួយបង្កើនផលិតភាពនិងតម្លៃបន្ថែមក្នុងឧស្សាហកម្ម ក៏ដូចជា សេវាកម្មផ្សេងៗ ជាពិសេសគឺសម្រាប់ទ្រទ្រង់កំណើនសេដ្ឋកិច្ច ។ ជាក់ស្ដែង អ្នកដែលមានជំនាញអាចឱ្យពួកគេមានប្រាក់ខែសមរម្យ ដែលអាចជួយលើកកម្ពស់ជីវភាពគ្រួសារចាកចេញពីភាពក្រីក្រ បើសិនជាពួកគេមានប្រវត្តិពីគ្រួសារក្រីក្រ ដូច្នេះសរុបសេចក្ដីមក ជំនាញនេះបានជួយទាំងផ្នែកសេដ្ឋកិច្ច គ្រួសារនិងសង្គម ។
លោករដ្ឋលេខាធិការបានបញ្ជាក់ថា « ដោយសារតែជំនាញនេះ មានប្រយោជន៍ធំធេងបែបនេះ ទើបរាជរដ្ឋាភិបាលបានយកចិត្តទុកដាក់ខ្ពស់ ក្នុងការអភិវឌ្ឍជំនាញរបស់ប្រជាពលរដ្ឋ ពេញសមត្ថភាព» ។ លោកបានបន្តថា រាជរដ្ឋាភិបាលបានរុញការវិនិយោគ ជំនាញទៅកាន់មុខព្រួយបីសំខាន់ៗរួមមាន ក្រសួងការងារនិងបណ្ដុះបណ្ដាលវិជ្ជាជីវៈ ដែលក្រសួងនេះ មានថវិកាធំមួយសម្រាប់ទ្រទ្រង់ដល់ការបណ្ដុះបណ្ដាលជំនាញ ពីមួយឆ្នាំទៅមួយឆ្នាំ ព្រោះក្រសួងនេះត្រូវរៀបចំបណ្ដុះបណ្ដាលធនធានសម្រាប់បម្រើអោយវិស័យឧស្សាហកម្មនិងសង្គមកិច្ច ដែលមានចរឹកជាការលើកកម្ពស់ជីវភាព និងការកាត់បន្ថយភាពក្រីក្រ ។ ក្រៅពីនេះ ក៏មានក្រសួងអប់រំយុវជននិងកីឡាផងដែរ ដែលរាជរដ្ឋាភិបាលបានយកចិត្តទុកដាក់ ក្នុងការកែទម្រង់និងជំរុញអោយមានការបណ្ដុះបណ្ដាលបន្ថែម ។ មុខព្រួយមួយទៀត ដែលកម្ពុជាបាននិងកំពុងអនុវត្តន៍នោះគឺមូលនិធិអភិវឌ្ឍន៍ជំនាញ ប៉ុន្តែរដ្ឋាភិបាលមិនមែនជាអ្នកធ្វើគម្រោងដោយខ្លួនឯងទេ ។ រដ្ឋាភិបាលគ្រាន់តែជាអ្នកបើកឱកាសក្នុងការផ្ដល់មូលនិធិទៅអោយដៃគូរនិងអ្នកពាក់ព័ន្ធទាំងអស់ ដែលចង់បានជំនាញនេះ ទាំងវិស័យឯកជននិងរដ្ឋាភិបាល ។
លោកបានមានប្រសាសន៍ថា « មូលនិធិនេះ យើងមិនផ្ដល់ទៅដល់ការបណ្ដុះបណ្ដាលគ្រប់វិស័យទេ តែយើងនឹងផ្ដល់ទៅអោយវិស័យកម្មន្តសាល វិស័យទេសចរណ៍និងវិស័យឌីជីថលជាដើម ដែលវិស័យនេះ មានអាទិភាព និងជាក្បាលអូសទាញកំនើនសេដ្ឋកិច្ចកម្ពុជា »។ លោកបានបញ្ជាក់ថា រដ្ឋាភិបាលបានបញ្ចេញថវិកា៥លានដុល្លារដើម្បីគម្រោងមូលនិធិនេះ ហើយខាងធនាគារអភិវឌ្ឍន៍អាស៊ី ក៏បានជួយ១០លានដុល្លារ និងមានដៃគូរជាច្រើនទៀត កំពុងសិក្សានិងត្រៀមជួយដល់គម្រោងនេះផងដែរ ។
យោងតាមរបាយការណ៍ និងការព្យាករណ៍របស់ធនាគារអភិវឌ្ឍន៍អាស៊ី ថាសេដ្ឋកិច្ចកម្ពុជា នៅរក្សាបានភាពរឹងមាំទៀតក្នុងឆ្នាំនេះ និងឆ្នាំបន្ទាប់ ដោយឆ្នាំនេះកំណើនសេដ្ឋកិច្ចនឹងរក្សាបាននូវ ៧ភាគរយនិងឆ្នាំបន្ទាប់មានកំណើន៦,៨ភាគរយ ។ យ៉ាងណាក៏ដោយកម្ពុជាត្រូវធ្វើពិពិធកម្ម កែទម្រង់មួយចំនួន ដើម្បីទទួលបាននូវកំណើននេះ ។
បើតាមលោក Sunniya Durrani-Jamal នាយិកាធនាគារអភិវឌ្ឍន៍អាស៊ី ប្រចាំកម្ពុជាបានបញ្ជាក់ក្នុងរបាយការណ៍ថា ជាមួយនឹងភាពមិនប្រាកដប្រជា នៃបរិយាកាសពាណិជ្ជកម្មសាកលមានការកើនឡើង ព្រមទាំងផលប៉ះពាល់របស់វាមកលើវិស័យសេវាកម្ម ដូចជាទេសចរណ៍ កម្ពុជាត្រូវការយុទ្ធសាស្ត្រ ពិពិធកម្មមួយជាបន្ទាន់ ដែលផ្ដោតលើអ្វីដែលមានភាពសមស្របសម្រាប់ខ្លួនឯង ព្រមទាំងផ្ដោតលើផលិតផលនិងសេវាកម្មដែមានតម្លៃខ្ពស់ជាងមុន ។ ធនធានក្នុងវិស័យនេះ ត្រូវតែមានជំនាញច្បាស់លាស់ ដើម្បីពង្រឹងគុណភាពសេវាកម្ម និងផលិតផល ៕ កែសម្រួលដោយ ៖សុឃាក់
ចែករំលែកព័តមាននេះ