អ្នកល្បែងលោតចុះពីលើឡានបោកក្បាលស្លាប់…តែសាច់ញាតិចោទសមត្ថកិច្ច

ថ្ងៃទី ១០ ខែ តុលា ឆ្នាំ ២០១៩
ម៉ោង ១៧:០៧
ឆោម ពិសម័យ

ខេត្តបាត់ដំបង ៖ បុរសម្នាក់ដែលត្រូវកម្លាំងសមត្ថកិច្ចឃាត់ខ្លួនពីបទប្រព្រឹត្តល្បែងស៊ីសងខុសច្បាប់ បានលោតទម្លាក់ពីលើរថយន្តពេលកំពុងធ្វើដំណើរបោកក្បាលទៅលើថ្នល់ជាតិ បណ្ដាលឲ្យរងរបួសធ្ងន់ ហើយបានស្លាប់នៅវេលាម៉ោង១និង៣០នាទីរំលងអធ្រាត្រ ឈានចូលថ្ងៃទី១០ តុលា នេះ ខណៈពេលបញ្ជូនដល់មន្ទីរពេទ្យបង្អែកស្រុកសំពៅលូន តែត្រូវសាច់ញាតិដាក់ការសង្ស័យស្លាប់ ដោយសារសមត្ថកិច្ចប្រើ
ហិង្សា ។

ជនរងគ្រោះ ឈ្មោះជ័យ ភារិន ហៅពៅ អាយុ៣៦ឆ្នាំ រស់នៅភូមិភ្នំព្រឹក ឃុំភ្នំព្រឹក ស្រុកភ្នំព្រឹក ។ លោកសារ៉េត វិសេដ្ឋ អធិការស្រុកភ្នំព្រឹក បានសរសេរនៅក្នុងរបាយការណ៍ថា ឈ្មោះជ័យ ភារិន ហៅ ពៅ នេះត្រូវបានកម្លាំងជំនាញរបស់លោកឃាត់ខ្លួន កាលពីវេលាម៉ោង៩និង៣០នាទីយប់ថ្ងៃទី៩ តុលា នៅក្នុងចំណោមមនុស្សរាប់សិបនាក់ ដែលកំពុងនាំគ្នាលេងល្បែងស៊ីសង (អាប៉ោង) ខុសច្បាប់ឡើងវក់វី នៅក្នុងភូមិភ្នំព្រឹក ឃុំភ្នំព្រឹក តែកម្លាំងរបស់លោកឃាត់បានតែឈ្មោះជ័យ ភារិន នេះម្នាក់ប៉ុណ្ណោះ ជាមួយនឹងវត្ថុតាង ខណៈអ្នកលេងជាច្រើននាក់ទៀតបានរត់រួច។

លោកសារ៉េត វិសេដ្ឋ បានសរសេរក្នុងរបាយការណ៍ទៀតថា ក្រោយពីបង្ក្រាបបាន កម្លាំងរបស់លោកបានយករថយន្តមួយគ្រឿង ម៉ាកនីស្សាន់ប្រភេទមួយបាំងកន្លះ ទៅដឹកវត្ថុតាងទាំងនោះយកមកកាន់អធិការនគរបាលស្រុក ។ ប៉ុន្តែលោកអធិការរូបនេះ បានបញ្ជាក់ថា ពេលដឹកវត្ថុតាង ដែលមានម៉ូតូផងដឹកលើរថយន្ត ពេលនោះមន្ត្រីរបស់លោកបានឲ្យឈ្មោះជ័យ ភារិន (អ្នកលេងល្បែង) ជិះខាងក្រោយ ដើម្បីជួយទប់ម៉ូតូ ព្រោះគ្មានខ្សែចង តែពេលកំពុងធ្វើដំណើរមកតាមផ្លូវចេញផុតពីកន្លែងកើតហេតុបន្តិច ស្រាប់តែជននោះលោតទម្លាក់ពីរថយន្តបោកក្បាល បណ្ដាលឲ្យរងរបួសធ្ងន់ ។

សមត្ថកិច្ចក៏បានដឹកទៅសង្គ្រោះបន្ទាន់នៅមណ្ឌលសុខភាព ហើយបានបញ្ជូនបន្តទៅកាន់មន្ទីរពេទ្យបង្អែកស្រុកសំពៅលូន ហើយបានស្លាប់នៅទីនោះ ដោយសាររបួសធ្ងន់ធ្ងន់ពេក។ ជុំវិញការស្លាប់ឈ្មោះជ័យ ភារិន ហៅពៅ នេះ បើតាមប្រភពព័ត៌មានបានឲ្យដឹងថា ក្រុមគ្រួសារជនរងគ្រោះ ហាក់មានការសង្ស័យទៅលើសមត្ថកិច្ចថា បានប្រើហិង្សាទៅលើជនរងគ្រោះ ទើបធ្វើឲ្យជនរងគ្រោះរងរបួសធ្ងន់រហូតដល់ស្លាប់បែបនេះ តែដូចជាមិនប្រាកដប្រជាទេ ចំពោះការសន្និដ្ឋាននេះ ។ ប៉ុន្តែប្រភពដទៃទៀត ហាក់មិនហ៊ានធ្វើការសន្និដ្ឋានដូចការលើកឡើងរបស់សាច់ញាតិជនរងគ្រោះទេ ។

ប្រភពទាំងនោះបាននិយាយថា គេមិនឃើញមានការប្រើហិង្សាទេ នៅកន្លែងកើតហេតុ តែគេឃើញមានស្នាមឈាមនោះលើដងផ្លូវ ពេលដឹកចេញផុតពីកន្លែងកើតហេតុ ដែលទំនងអាចជនរងគ្រោះលោតចុះពីរថយន្តមែន ។ លោកសារ៉េត វិសេដ្ឋ អធិការស្រុកភ្នំព្រឹកបានឲ្យដឹងតាមរយៈរបាយការណ៍ដដែលថា ជាមួយនឹងការបង្ក្រាបនោះ មន្ត្រីរបស់លោកដកហូតបានម៉ូតូ៣គ្រឿង និងសម្ភារ សម្រាប់ប្រព្រឹត្តល្បែងស៊ីសង (អាប៉ោង) ហើយម៉ូតូ១គ្រឿងឲ្យមន្ត្រីជំនាញជិះ រីឯ២គ្រឿងទៀតដឹកតាមរថយន្ត ដោយឲ្យឈ្មោះជ័យ ភារិន ជិះនៅខាងក្រោយ ដើម្បីជួយទប់ម៉ូតូ តែមិននឹកស្មានថា ពេលធ្វើដំណើតាមផ្លូវ ស្រាប់តែឈ្មោះពៅ លោតចុះពីរថយន្តធ្វើឲ្យមានគ្រោះថ្នាក់បែបនេះ។ ហើយនេះមិនជាការប្រើហិង្សាទេ គឺជនរងគ្រោះបង្កដោយខ្លួនឯង ។

ពាក់ព័ន្ធនឹងករណីនេះ លោកឧត្តមសេនីយ៍ត្រី ជេត វណ្ណនី ស្នងការរងខេត្តបានមានប្រសាសន៍ថា កិច្ចប្រតិបត្តិការបង្ក្រាបល្បែងស៊ីសងនោះ គឺសមត្ថកិច្ចស្រុកភ្នំព្រឹក ឃាត់ខ្លួនអ្នកលេងបានតែម្នាក់ទេ រួមទាំងការដកហូតវត្ថុតាងមួយចំនួនផង ។

លោកស្នងការរងបានច្រានចោលចំពោះការសង្ស័យពីក្រុមគ្រួសារថា សមត្ថកិច្ចបានប្រើហិង្សាទៅលើជនរងគ្រោះ ។ លោកបានអះអាងដូច្នេះថា «ជាគោលការណ៍របស់ថ្នាក់ដឹកនាំ មិនបានលើកទឹកចិត្តដល់កងកម្លាំងឲ្យប្រើហិង្សាទៅលើអ្នកលេងល្បែងស៊ីសងទេ ពេលចុះបង្ក្រាប ។ ប៉ុន្តែខ្ញុំយល់ថា នេះជាការធ្វេសប្រហែសរបស់កម្លាំងជំនាញ នៅពេលដឹកជញ្ជូនវត្ថុតាងនិងជនសង្ស័យ»។

លោកស្នងការរងរូបនេះបានបញ្ជាក់ថា ជនសង្ស័យគួរតែត្រូវប្រុងប្រយ័ត្ន ពេលធ្វើដំណើរតាមផ្លូវ តែយ៉ាងណា ពេលនេះលោកស្នងការខេត្ត បានបញ្ជាឲ្យមន្ត្រីបច្ចេកទេសចុះពិនិត្យទីកន្លែងគ្រោះថ្នាក់ ដើម្បីធ្វើកំណត់ហេតុ ឬកសាងសំណុំរឿងឲ្យបានត្រិមត្រូវ ដើម្បីដាក់ជួនទៅតុលាការចាត់ការតាមនីតិវិធីហើយ៕