រាជធានីភ្នំពេញ ៖ នៅក្នុងឱកាសបិទការប្រកួតកីឡាការ៉ាតេ ជ្រើសរើសជើងឯកថ្នាក់ជាតិប្រចាំឆ្នាំ២០១៩ ដែលបានប្រព្រឹត្តទៅកាលពីព្រឹកថ្ងៃអាទិត្យទី៦ ខែតុលា នៅទីលានសហព័ន្ធការ៉ាតេក្នុងសាកលវិទ្យាល័យភូមិន្ទភ្នំពេញ លោកឧបនាយករដ្ឋមន្ត្រី អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ធកិច្ចនិងហិរញ្ញវត្ថុ និងជាប្រធានសហព័ន្ធកីឡាការ៉ាតេកម្ពុជា បានដាក់ ចេញនូវផែនការការងារជាអាទិភាពចំនួន៤ចំ ណុច ដើម្បីឆ្ពោះទៅដណ្ដើមមេដាយពីការប្រកួត កីឡាអាស៊ីអាគ្នេយ៍ឆ្នាំ២០២៣ ។
ផែនការរការងារជាអាទិភាពចំនួន៤ចំណុច នេះរួមមាន ៖ ទី១-ត្រូវរៀបចំសមាសភាពគណៈកម្មាធិការប្រតិបត្តិដឹកនាំគ្រប់គ្រងមួយប្រកបដោយប្រសិទ្ធភាព ។ ទី២-រៀបចំក្រុមជម្រើសជាតិប្រចាំសហព័ន្ធកីឡាការ៉ាតេកម្ពុជា ដើម្បីត្រៀមលក្ខណសម្បត្តិចូលរួមប្រកួតកីឡាអូឡាំពិកនៅឆ្នាំ២០២០ រួចត្រៀមទៅដណ្ដើមឧត្តមភាពកីឡាការ៉ាតេក្នុងការ ប្រកួតស៊ីហ្គេមនៅឆ្នាំ២០២៣ ។
ទី៣-រៀបចំកសាងសាលហ្វឹកហាត់ការ៉ាតេរបស់សហព័ន្ធកីឡាការ៉ាតេកម្ពុជាជាប្រញាប់ និងទី៤ ចាប់ផ្ដើមស្វែងរកជំនួយបច្ចេកទេសពីសហព័ន្ធការ៉ាតេពិភពលោក ដើម្បីពង្រឹងសមត្ថភាពកីឡាករកីឡាការិនី ក៏ដូចជាមន្ត្រីកីឡា អាជ្ញាកណ្ដាល ចៅក្រម។ល។
ជាមួយគ្នានេះ លោក អូន ព័ន្ធមុន្នីរ័ត្ន បានប្រកាសដាក់ក្រសួងសេដ្ឋកិច្ចនិងហិរញ្ញវត្ថុជាដៃគូទ្រទ្រង់កីឡាការ៉ាតេជាផ្លូវការ ស្របតាមអនុសាសន៍ណែនាំរបស់សម្ដេចតេជោនា យករដ្ឋមន្ត្រី ហ៊ុន សែន គឺ«ប្រជាជនម្នាក់ ហាត់ កីឡាមួយមុខ» និង «ក្រសួង-ស្ថាប័នមួយទ្រទ្រង់កីឡាមួយប្រភេទ» ។
តាមរយៈការគាំទ្រសកម្មភាពនេះ វិស័យកីឡាការ៉ាតេបច្ចុប្បន្នត្រូវបានយកចិត្តទុកដាក់ គួឱ្យកត់សម្គាល់ ។ ក្រៅពីរៀបចំឱ្យមានទីកន្លែងហ្វឹកហាត់សមរម្យ គ្រូបង្វឹក ចៅក្រម អាជ្ញាកណ្ដាល ត្រូវបានបញ្ជូនទៅចូលរួមក្នុងសិក្ខាសា លា និងទទួលបានការបណ្ដុះបណ្ដាលទាំងថ្នាក់ ជាតិនិងអន្តរជាតិ ។
លោក វ៉ាត់ ចំរើន រដ្ឋលេខាធិការក្រសួងទេសចរណ៍ និងជាអគ្គលេខាធិការគណៈកម្មាធិការជាតិអូឡាំពិកកម្ពុជា ហើយក៏ជាអគ្គលេ ខាធិការសហព័ន្ធកីឡាការ៉ាតេកម្ពុជា បានមានប្រសាន៍ថា សហព័ន្ធបានបញ្ជូនកីឡាករឆ្នើមទៅហ្វឹកហាត់ពិសេសនៅប្រទេសអីុតាលីចំនួន២ដងរួចមកហើយ ដែលលើកទី១មានរយៈពេល១ខែ មានកីឡាករកីឡាការិនីចំនួន៨នាក់ និងលើកទី២មានរយៈពេល៣ខែ មានកីឡាករកីឡាការិនីចំនួន៨នាក់ដូចគ្នា ។ ដំណើរការហ្វឹកហាត់នៅទីនោះមានការរីកចម្រើន និងវឌ្ឍនភាពបច្ចេក ទេស ជំនាញប្រយុទ្ធ Kumite យ៉ាងគត់មត់ គួរជាទីសង្ឃឹមក្នុងការត្រៀមប្រកួតកីឡាស៊ីហ្គេម លើកទី៣០ ដែលនឹងប្រព្រឹត្តទៅនៅប្រទេសហ្វ៊ីលីពីននាចុងឆ្នាំ២០១៩នេះ ។
គួររំឭកថា ឆ្លងកាត់ការប្រកួតរយៈពេល៤ថ្ងៃដែលបានដំណើរការចាប់ពីថ្ងៃទី៣ ខែតុលា ក្នុងចំណោម១៤សមាគមក្លិបចូលរួមប្រកួត មជ្ឈមណ្ឌលកីឡាកងយោធពលខេមរភូមិន្ទ ដណ្ដើមបានមេដាយច្រើនជាងគេ ក្នុងនោះមេដាយមាសចំនួន១១គ្រឿង មេដាយប្រាក់១គ្រឿង និងមេដាយសំរឹទ្ធិ៦គ្រឿង ។ សមាគមកីឡាក្រសួង មហាផ្ទៃ ជាប់ចំណាត់ថ្នាក់លេខ២ ដណ្ដើមបានមេដាយមាស៦គ្រឿង មេដាយប្រាក់៣គ្រឿង និងមេដាយសំរឹទ្ធិ៣គ្រឿង ។ ចំណាត់ថ្នាក់លេខ៣
បានទៅក្លិបការ៉ាតេដូ អូគឺយឺគឹ ខេត្តសៀមរាបដណ្ដើមបានមេដាយមាស៣គ្រឿង មេដាយប្រាក់៤គ្រឿង និងមេដាយសំរឹទ្ធិ៣គ្រឿង ៕ (កែសម្រួលដោយ ៖ បុប្ផា)
ចែករំលែកព័តមាននេះ