រាជធានីភ្នំពេញ ៖ សាកសពបុរសមិនស្គាល់អត្តសញ្ញាណម្នាក់ដែលមានសភាពហើមស្អុយរលួយ ព្រមទាំងមានដង្កូវចោះទៅហើយនោះ ត្រូវបានបុរសដែលជាអ្នកយាមដីម្នាក់ដឹកគោទៅចងឲ្យស៊ីស្មៅ ហើយបានប្រទះឃើញសពនៅក្នុងអណ្ដូងទឹកមួយបង្កឲ្យមានការភ្ញាក់ផ្អើលទាំងព្រឹក ។
បន្ទាប់មកបុរសជាអ្នកយាមដីម្នាក់នោះក៏បានរាយការណ៍ជូនដល់កម្លាំងនគរបាលប៉ុស្តិ៍សំរោងក្រោមឱ្យចុះមកពិនិត្យមើលភ្លាមៗផងដែរ ប៉ុន្តែនគរបាលបានសន្និដ្ឋានថាជាករណីឃាតកម្ម ប៉ុន្តែមិនទាន់ដឹងថាកើតហេតុនៅទីនោះ ឬមួយក៏ជនរងគ្រោះត្រូវគេសម្លាប់នៅកន្លែងផ្សេង រួចដឹកយកទៅទម្លាក់ចោលក្នុងអណ្ដូងទឹកនោះនៅឡើយទ។
ហេតុការណ៍ខាងលើនេះបង្កការភ្ញាក់ផ្អើលកាលពីវេលាម៉ោង៦ព្រឹកថ្ងៃទី៧ ខែតុលា ឆ្នាំ២០១៩ នៅក្នុងដីឡូត៍មួយកន្លែង ស្ថិតក្នុងភូមិគោកព្រិច សង្កាត់សំរោងក្រោម ខណ្ឌពោធិ៍សែនជ័យ រាជធានីភ្នំពេញ។
សពបុរសរងគ្រោះម្នាក់ខាងលើមិនទាន់ត្រូវបានស្គាល់អត្តសញ្ញាណនៅឡើយទេ ហើយក៏មិនដឹងថាមានអាយុប៉ុន្មាននោះឡើយ តែតាមការសន្និដ្ឋានប្រហែលជាងអាយុ៤០ឆ្នាំ។
តាមប្រភពពីបុរសម្នាក់ជាអ្នកយាមដីខាងលើឈ្មោះសោ សារ៉ា់ត់ អាយុ៣២ឆ្នាំ មានស្រុកកំណើត នៅក្នុងភូមិបឹងស្ដុក ឃុំបរសេដ្ឋ ស្រុកបរសេដ្ឋ ខេត្តកំពងស្ពឺ បាននិយាយថា នៅមុនពេលមានហេតុការណ៍ភ្ញាក់ផ្អើលកើតឡើង គឺគាត់បានដឹកគោទៅចងឲ្យស៊ីស្មៅនៅក្នុងបរិវេណដីឡូត៌ខាងលើនេះ ។ លុះពេលទៅដល់ជិតអណ្ដូងទឹកខាងលើ ស្រាប់តែធុំក្លិនស្អុយចម្លែកខុសពីធម្មតា ពេលនោះគាត់មានការងឿងឆ្ងល់យ៉ាងខ្លាំងក៏បានទៅអឺតមើល ក្នុងអណ្ដូង ស្រាប់តែប្រទះឃើញសាកសពមនុស្សម្នាក់ហើមស្អុយរលួយ និងមានដង្កូវចោះបាត់ទៅហើយ។
តាមប្រភពដដែលបានបន្តទៀតថា ខណៈនោះគាត់មានការភ្ញាក់ផ្អើលយ៉ាងខ្លាំងហើយក៏បានរត់ត្រឡប់ទៅផ្ទះប្រាប់ដល់ម្ដាយបានដឹង បន្ទាប់មកម្ដាយរបស់គាត់បានទូរស័ព្ទប្រាប់ពូរបស់គាត់ម្នាក់ដែលជាមន្ត្រីយោធាឱ្យបានដឹងពីហេតុការណ៍ខាងលើ ។ បន្ទាប់មកពូរបស់គាត់បានរាយការណ៍បន្តទៅសមត្ថកិច្ចនគរបាលប៉ុស្តិ៍សំរោងក្រោមឲ្យចុះទៅពិនិត្យមើលភ្លាមៗ និងបង្កឲ្យមានការភ្ញាក់ផ្អើលដល់អ្នកភូមិនាំគ្នាទៅចោមរោមមើល ប៉ុន្តែពុំមាននរណាម្នាក់បានស្គាល់ជនរងគ្រោះឡើយ ម្យ៉ាងទៀតសពមានសភាពហើមស្អុយទៅហើយ ទោះបីមើលយ៉ាងណាក៏មិនស្គាល់ដែរ។ ដោយឡែកអណ្ដូងទឹកនេះជ្រៅណាស់ ហើយកាលមុនត្រូវបានអ្នកភូមិដងទឹកប្រើប្រាស់ជាប្រចាំ ប៉ុន្តែក្រោយមកត្រូវបានបោះបង់ចោលវិញ និងមានរយៈពេលប្រហែល៥ឆ្នាំកន្លងមកហើយ។
តាមប្រភពពីនគរបាលប៉ុស្តិ៍សំរោងក្រោមបានឲ្យដឹងថា ក្រោយពេលទទួលបានព័ត៌មានខាងលើនោះភ្លាម កម្លាំងសមត្ថកិច្ចបានចុះទៅកាន់កន្លែងកើតហេតុឃើញសពជនរងគ្រោះមានសភាពហើមស្អុយរលួយទៅហើយ ដែលសង្ស័យថា បានស្លាប់រយៈពេល១អាទិត្យមកហើយ ។ បន្ទាប់មកកម្លាំងនគរបាលប៉ុស្តិ៍បានធ្វើការសាកសួរសាក្សីនៅនឹងកន្លែងកើតហេតុ ហើយសង្ស័យថាជាអំពើឃាតកម្ម តែពុំដឹងថាកើតហេតុនៅទីនោះផ្ទាល់ ឬក៏នៅកន្លែងផ្សេង ហើយសពត្រូវបានគេនាំយកទៅទម្លាក់ចោលក្នុងអណ្ដូងនោះឡើយ។ ប៉ុន្តែទោះបីជាបែបណា នេះគ្រាន់តែជាការសង្ស័យប៉ុណ្ណោះ ពុំមែនជាការសន្និដ្ឋានទេ ។
ពាក់ព័ន្ធនឹងករណីខាងលើនេះ កម្លាំងនគរបាលប៉ុស្តិ៍និងកម្លាំងនគរបាលព្រហ្មទណ្ឌខណ្ឌក៏បានរាយការណ៍ជូនថ្នាក់លើនិងសុំកម្លាំងនគរបាលការិយាល័យបច្ចេកទេសនៃស្នងការដ្ឋាននគរបាលរាជធានីភ្នំពេញដើម្បីសុំឲ្យកម្លាំងនគរបាលការិយាល័យបច្ចេកទេសនៃស្នងការដ្ឋាននគរបាលរាជធានីភ្នំពេញ ចុះទៅពិនិត្យ និងធ្វើកោសល្យវិច័យដើម្បីឱ្យដឹងថាតើជាអំពើឃាតកម្មពិតប្រាកដឬបែបណា ។
គិតមកត្រឹមវេលាម៉ោង៤ល្ងាចថ្ងៃដដែលនេះដែរ ជនរងគ្រោះដែលស្លាប់នៅក្នុងអណ្ដូងទឹកនៅមិនទាន់ត្រូវបានស្គាល់អត្តសញ្ញាណនៅឡើយ បន្ទាប់ពីទទួលដំណឹងថា មានករណីប្រទះឃើញសាកសពខាងលើ ក៏មានអ្នកបាត់សាច់ញាតិមកមើលដែរ ប៉ុន្តែពេលទៅមើលផ្ទាល់សុទ្ធតែថាពុំមែនជាសាច់ញាតិបស់ខ្លួនដែលបាត់ឡើយ។
ចំណែកឯកម្លាំងនគរបាលការិយាល័យបច្ចេកទេសនៃស្នងការនគរបាលរាជធានីភ្នំពេញ រួមជាមួយគ្រូពេទ្យផ្នែកពិនិត្យសាកសពបានស្រង់សាកសពឡើងគោក រួចពិនិត្យកោសល្យវិច័យ ជាលទ្ធផលបានបញ្ជាក់ថា ជនរងគ្រោះបានស្លាប់ដោយសារតែលង់ទឹក មិនមានជាប់ពាក់ព័ន្ធទៅនឹងអំពើឃាតកម្មឡើយ ។
តាមប្រភពពីនគរបាលបានបញ្ជាក់ថា ជនរងគ្រោះអាចរត់ពេលយប់ងងឹតហើយធ្លាក់ចូលក្នុងអណ្ដូងទឹកនេះ ហើយក៏សង្ស័យថាជាជាជនសង្ស័យលួចមាន់ផងដែរ ដោយកាលពីមួយអាទិត្យមុនមានក្រុមជនសង្ស័យលួចមាន់១ក្រុមបានចូលទៅធ្វើសកម្មភាពលួចមាន់នៅក្នុងភូមិកើតហេតុខាងលើដែរ ហើយត្រូវបានអ្នកភូមិដេញតាមចាប់ ។ ខណៈនោះក្រុមជនសង្ស័យបាននាំគ្នារត់គេចខ្លួន ហើយអ្នកភូមិចាប់មិនបាននោះទេ ហើយអ្នកភូមិសង្ស័យថា ដោយសារជនសង្ស័យភ័យពេកក៏រត់ធ្លាក់អណ្ដូងទឹកជម្រៅជិត៣០ម៉ែត្រនោះបណ្ដាលឲ្យលង់ស្លាប់បែបនេះតែម្ដង ។
តាមប្រភពដដែលបានបន្តថា ប៉ុន្តែទោះបីជាបែបណានេះក្តី គឺគ្រាន់តែជាការសន្និដ្ឋានប៉ុណ្ណោះ ប្រសិនបើបងប្អូនណាមានបាត់សមាជិកគ្រួសារ សូមទំនាក់ទំនងនគរបាលប៉ុស្តិ៍សំរោងក្រោមឬនគរបាលខណ្ឌពោធិ៍សែនជ័យ ដើម្បីដឹងព័ត៌មាន ។
ក្រោយការពិនិត្យរួចរាល់ សពត្រូវបាននាំយកទៅរក្សាទុកបូជានៅឈាបនដ្ឋានវត្តស្ទឹងមានជ័យសង្កាត់ស្ទឹងមានជ័យ ខណ្ឌមានជ័យ រាជធានីភ្នំពេញហើយ៕ (កែសម្រួលដោយ ៖ ធីតា)
ចែករំលែកព័តមាននេះ