ខេត្តកំពង់ចាម ៖ ជនសង្ស័យជាមេខ្លោងឧក្រិដ្ឋជនឆ្លងដែនជនជាតិកូរ៉េខាងត្បូងម្នាក់ឈ្មោះ Lee Ingyong ភេទប្រុស អាយុ៣៦ឆ្នាំ ដែលកាន់លិខិតឆ្លងដែនលេខ JR 3533883 និងមានជំនាញខាងលួចលុយតាមប្រព័ន្ធអេឡិចត្រូនិក ATM ពីធនាគារនៅប្រទេសកូរ៉េ ត្រូវបានចាប់ខ្លួនកាលពីវេលាម៉ោងជាង១០ព្រឹកថ្ងៃទី១០ មេសា ក្នុងបន្ទប់សណ្ឋាគារមនោរម្យ
ខេត្តកំពង់ចាម ៖ ជនសង្ស័យជាមេខ្លោងឧក្រិដ្ឋជនឆ្លងដែនជនជាតិកូរ៉េខាងត្បូងម្នាក់ឈ្មោះ Lee Ingyong ភេទប្រុស អាយុ៣៦ឆ្នាំ ដែលកាន់លិខិតឆ្លងដែនលេខ JR 3533883 និងមានជំនាញខាងលួចលុយតាមប្រព័ន្ធអេឡិចត្រូនិក ATM ពីធនាគារនៅប្រទេសកូរ៉េ ត្រូវបានចាប់ខ្លួនកាលពីវេលាម៉ោងជាង១០ព្រឹកថ្ងៃទី១០ មេសា ក្នុងបន្ទប់សណ្ឋាគារមនោរម្យ ស្ថិតនៅសង្កាត់កំពង់ចាម ក្រុងកំពង់ចាម រួមជាមួយប្រពន្ធជនជាតិខ្មែរអ៊ិស្លាម និងបុរសជនជាតិកូរ៉េម្នាក់ទៀតផងដែរ ។
លោកឧត្តមសេនីយ៍ត្រី បែន រ័ត្ន ស្នងការនគរបាលខេត្តមានប្រសាសន៍ឱ្យដឹងថា ក្នុងប្រតិ បត្តិការតាមប្រមាញ់ឧក្រិដ្ឋជនឆ្លងដែនឈ្មោះ Ingyong ខាងលើនេះ គឺក្រោមការដឹកនាំផ្ទាល់ពីលោកវរសេនីយ៍ទោ សាន សុភា នាយការិយាល័យព្រហ្មទណ្ឌកម្រិតធ្ងន់ខេត្ត សហការជាមួយការិយាល័យកណ្តាលសន្តិសុខខេត្ត នៅយប់ថ្ងៃទី៩ មេសា ពេលទទួលដំណឹងថា ជននោះជិះរថយន្តម៉ាកឡិចស៊ីសចូលមកក្រុងកំពង់ចាម ។ លោកឧត្តមសេនីយ៍ត្រី បែន រ័ត្ន ស្នងការនគរបាលខេត្តមានប្រសាសន៍ទៀតថា រហូតដល់ព្រឹកថ្ងៃទី១០ មេសា ពេលដឹងមុខសញ្ញា ជាមេខ្លោងនេះកំពុងតែសម្ងំលាក់ខ្លួននៅក្នុងបន្ទប់សណ្ឋាគារមនោរម្យបន្ទប់ VIP លេខ៤១០ និង៤១២ កម្លាំងសមត្ថកិច្ចបានឡោមព័ទ្ធដោយចាប់បានទាំងសម្បុកចំនួន៣នាក់បញ្ជូនមកកាន់ ស្នងការដ្ឋាននគរបាលខេត្តដើម្បីសួរនាំ ។ ប្រសិនណាបើមិនចាប់មេខ្លោងនេះទាន់ពេលវេលានោះទេ ឧក្រិដ្ឋជនឈ្មោះ Lee Ingyong អាចនឹងធ្វើសកម្មភាពលួចលុយពី ATM នៅកម្ពុជាជាក់ជាមិនខានឡើយ ។
លោកឧត្តមសេនីយ៍ត្រី ប៉ាង ណារិន អនុប្រធាននាយកដ្ឋានផ្ទៃក្នុងមានប្រសាសន៍ឱ្យដឹងដែរថា ជនជាតិកូរ៉េរូបនេះរួមនឹងបក្សពួកមួយចំនួនទៀតបានធ្វើសកម្មភាពលួចលុយតាមប្រព័ន្ធអេឡិចត្រូនិកនៅប្រទេសកូរ៉េខាងត្បូងយកលុយច្រើនសន្ធឹកសន្ធាប់រហូតដល់លោកស្រីប្រធានាធិបតីកូរ៉េបញ្ជាឱ្យតាមចាប់ខ្លួន ។ បន្ទាប់មកបក្សពួកត្រូវបានចាប់ខ្លួនបានដែរ ។ ចំណែកមេខ្លោងឈ្មោះ Ingyong បានរត់គេចខ្លួនចូលមកប្រទេសកម្ពុជាជាង១ឆ្នាំមកហើយ ។ ជននេះត្រូវបានតុលាការប្រទេសកូរ៉េចេញដីកាដោយមាននគរបាលអាំងទែប៉ូលជាអ្នកតាមចាប់ខ្លួន ។ លោកឧត្តមសេនីយ៍ ប៉ាង ណារិន បញ្ជាក់ថា ម្សិលមិញ (ថ្ងៃទី៩ មេសា ) មេខ្លោងនេះបានគេចខ្លួនពីខេត្តកំពតមកកាន់ក្រុងកំពង់ចាម ហើយត្រូវបានរូបលោកស្វែងរកចាប់ខ្លួនដោយមានកិច្ចសហការជាមួយនឹងនគរបាលអាំងទែប៉ូល៣នាក់ផងដែរ ។
ទីបំផុតមេខ្លោងរូបនេះត្រូវបានចាប់ខ្លួននាព្រឹកថ្ងៃទី១០ មេសា នៅសណ្ឋាគារមនោរម្យក្រសោបបានមនុស្ស៣នាក់។ តែក្នុងនោះមានឈ្មោះ Ingyong ត្រូវបានបញ្ជូនទៅប្រទេសកូរ៉េវិញទាំងយប់ថ្ងៃទី១០ មេសា ឬថ្ងៃស្អែកនេះ ៕
ចែករំលែកព័តមាននេះ