រាជធានីភ្នំពេញ៖ វិស័យចំណង់និងអចលនទ្រព្យកម្ពុជានៅប៉ុន្មានឆ្នាំចុងក្រោយមានការរីកចម្រើន ប៉ុន្តែហាក់មិនទាន់ទទួលការបណ្តាក់ទុនវិនិយោគពីប្រទេសដៃគូពាណិជ្ជកម្មឱ្យបានច្រើនដូចគ្នានៅឡើយនោះទេ តួយ៉ាងវិនិយោគិនជនជាតិកូរ៉េ បោះទុនក្នុងវិស័យមួយនេះនៅមានកម្រិតតិចតួច។
តើមកពីមូលហេតុអ្វីនៅពីក្រោយការចូលមកបណ្តាក់ទុនលើវិស័យអចលនទ្រព្យនៅកម្ពុជាមានចំនួនតិចតួចនៅកម្ពុជា ?
បើតាមអ្នកជំនាញផ្នែកស្រាវជ្រាវទីផ្សារអចលនទ្រព្យបានឱ្យដឹងថា បច្ចុប្បន្ននេះតាមការសង្កេតទូទៅវិនិយោគិនជនជាតិកូរ៉េចូលមកបណ្តាក់ទុនលើវិស័យសំណង់ និងអលនទ្រព្យនៅកម្ពុជាហាក់នៅមានចំនួនតិចតួចនៅឡើយ ដោយសារប្រទេសកូរ៉េមានការរីកចម្រើនខ្លាំង ជាហេតុធ្វើវិនិយោគិនរបស់ពួកគេមិនចង់ចេញទៅវិនិយោគនៅតាមបណ្តាប្រទេសផ្សេងៗរួមទាំងកម្ពុជាផងដែរ បើធៀបនិងទៅនិងវិនិយោគិនជនជាតិផ្សេងៗ ខណៈវិស័យអចលទ្រព្យនិងសំណង់នៅកម្ពុជាកំពុងក្តោបក្តាប់ដោយវិនិយោគិនមកពីប្រទេស
ចិន។
លោក ហ៊ឹម សីហា នាយកផ្នែកស្រាវជ្រាវទីផ្សារនៃក្រុមហ៊ុន VTrust បានឱ្យដឹងកាលពីថ្ងៃទី៤ ខែតុលាម្សិលមិញថា «តាមការសង្កេតពីស្ថានភាពទូទៅនៅកម្ពុជាអ្នកអភិវឌ្ឍមកពីប្រទេសចិនមានច្រើន តែសម្រាប់វិនិយោគិនកូរ៉េចាប់ពីដំបូងទីមកគាត់ចូលមកវិនិនិយោគមានចំនួនតិចតួច។ ខ្ញុំធ្លាប់ប្រទះឃើញវិយោគិនកូរ៉េមានចំនួនតិចវាមានមិនច្រើនដូចចិនទេ»។ លោក ហ៊ឹម សីហា បានលើកឡើងថា ទាក់ទងនិងវិស័យអចលនទ្រព្យកម្ពុជាទទួលបានវិនិយោគិនច្រើនចូលមកបណ្តាក់ទុន ដោយសារចិនមានភាពជិតស្និទ្ធនឹងកម្ពុជាខ្លាំង ហើយគោលការណ៍ចិនជំរុញឱ្យវិនិយោគិនចិនចូលមកស្រុកខ្មែរច្រើន ព្រោះសេដ្ឋកិច្ចចិនវាកើនឡើងខ្លាំង អាចធ្វើឱ្យវិនិយោគិនចិនមើលឱកាសរកផលចំណេញបានច្រើនជាងនៅប្រទេសខ្លួនឯង។ ប៉ុន្តែសម្រាប់វិនិយោគិនកូរ៉េមានចំនួនតិចតួច ដោយសារតែប្រទេសកូរ៉េមានការរីកចម្រើនខ្លាំង អីចឹងធ្វើឱ្យវិនិយោគិនរបស់កូរ៉េមិនចង់ចេញមកខាងក្រៅនោះទេមិនថានៅប្រទេសផ្សេងឬកម្ពុជានោះទេ» ។
លោកបានបញ្ជាក់ថា «យើងមើលឃើញវិនិយោគិនជនជាតិកូរ៉េ ចូលមកវិនិយោគនៅក្នុងវិស័យអចលនទ្រព្យកម្ពុជា ភាគច្រើនវិនិយោគលើផ្នែកសំណង់ខ្ពស់ៗមានដូចជាខុនដូ»។ ស្របពេលអ្នកជំនាញសង្កេតមើលឃើញវិនិយោគិនជនជាតិកូរ៉េបណ្តាក់ទុនលើ វិស័យសំណង់និងអចលនទ្រព្យហាក់នៅមានកម្រិតបើប្រៀបធៀបទៅនឹងប្រទេសចិនគេមើលឃើញការធ្វើពាណិជ្ជកម្មទ្វេភាគីរវាងកម្ពុជានិងកូរ៉េនៅក្នុងរយៈពេលជាង២ឆ្នាំចុងក្រោយនេះសម្រាប់ទំហំពាណិជ្ជកម្មរួមមានប្រមាណ៧០០លានដុល្លារកាលពីឆ្នាំ២០១៨។
លោក ប៉ានសូរស័ក្តិ រដ្ឋមន្ត្រីក្រសួងពាណិជ្ជកម្មបានឱ្យដឹងកាលពីថ្ងៃទី២ ខែតុលាកន្លងទៅនេះថា «ក្នុងក្របខ័ណ្ឌកិច្ចសហប្រតិបត្តិការសេដ្ឋកិច្ច ពាណិជ្ជកម្មទ្វេភាគីរបស់យើងកំពុងកើនឡើងពីប្រមាណ ៦០០ លានដុល្លារអាមេរិកក្នុងឆ្នាំ២០១៧ ដល់ជាង ៧០០ លានដុល្លារអាមេរិកក្នុងឆ្នាំ២០១៨ និងប្រហែល ៤៥០ លានដុល្លារអាមេរិកនៅឆមាសទី១ នៃឆ្នាំ ២០១៩»៕ កែសម្រួលដោយ ៖ សុឃាក់
ចែករំលែកព័តមាននេះ