ខេត្តកំពង់ឆ្នាំង ៖ ដំណោះស្រាយប្រាក់គោលនយោបាយលើកទី២របស់ក្រុមហ៊ុន ខេ ឌី សុី ឱ្យទៅអ្នកតវ៉ាទាមទារសុទ្ធតែអត់មានដី អត់មានឯកសារណាមួយបញ្ជាក់សោះនៅភូមិឡពាង បានបន្តធ្វើនៅថ្ងៃទី៩ មេសា នៅសាលាស្រុកកំពង់ត្រឡាច ក្រោមការសម្របសម្រួលរបស់គណៈកម្មការចម្រុះមានសមាសភាព១៤រូប ដែលមានលោកជំទាវ ដោក សុទ្ធា អភិបាលរងខេត្ត ជាប្រធានគណៈកម្មការ ។
ខេត្តកំពង់ឆ្នាំង ៖ ដំណោះស្រាយប្រាក់គោលនយោបាយលើកទី២របស់ក្រុមហ៊ុន ខេ ឌី សុី ឱ្យទៅអ្នកតវ៉ាទាមទារសុទ្ធតែអត់មានដី អត់មានឯកសារណាមួយបញ្ជាក់សោះនៅភូមិឡពាង បានបន្តធ្វើនៅថ្ងៃទី៩ មេសា នៅសាលាស្រុកកំពង់ត្រឡាច ក្រោមការសម្របសម្រួលរបស់គណៈកម្មការចម្រុះមានសមាសភាព១៤រូប ដែលមានលោកជំទាវ ដោក សុទ្ធា អភិបាលរងខេត្ត ជាប្រធានគណៈកម្មការ ។
សូមបញ្ជាក់ថា គណៈកម្មការមានសមាសភាព១៥រូប តែព្រឹកនេះអវត្តមាន១រូប គឺលោក សំ ចាន់គា មន្ត្រីសិទ្ធិមនុស្សប្រចាំខេត្ត ដែល ធ្លាប់បញ្ជាក់ថា ខ្លួនមិនមែនមេខ្យល់ មិនមែនមេក្រមីុ ឬមិនមែនមេខ្លោងលាក់ក្រចកនោះ ពេលនេះបានសុំលាលែងពីតំណែងគណៈកម្មការ ។ កិច្ចសម្របសម្រួលវាយតម្លៃប្រាក់គោលនយោបាយនេះ គឺជាលើកទី២ហើយ ដែលកាលលើកទី១ បានធ្វើឡើងកាលពីថ្ងៃទី៤ មេសា ក្រោមសមាសភាពគណៈកម្មការដូចខាងលើដដែលនេះ ដែលជាលទ្ធផលបានដោះស្រាយប្រាក់គោលនយោបាយចំនួន៣៣គ្រួសារ ក្នុងចំណោម៥២គ្រួសារ ។ ក្នុងនោះអ្នកនៅសេសសល់មាន៤គ្រួសារ មិនព្រមទទួលយកការសម្របសម្រួល ។ ១១គ្រួសារ គណៈកម្មការមិនទាន់កោះហៅ និង២គ្រួសារ អវត្តមាន ព្រោះទៅធ្វើការនៅប្រទេសថៃ ។ ជាលទ្ធផលបាន៩០ភាគរយរួចហើយ ។
ប៉ុន្តែ អ្វីដែលស្មានមិនដល់នោះ ព្រឹកថ្ងៃទី៩ មេសា ក្រោយពីគណៈកម្មការបានអានការបំភ្លឺរបស់ប្រជាពលរដ្ឋចំនួន៨គ្រួសារ ក្នុងចំណោម១១គ្រួសារ ដែលគណៈកម្មការបានកោះហៅនៅព្រឹកនោះចប់ មិនទាន់បានសួរម្នាក់ម្ដងៗផង ស្រាប់តែឈ្មោះ រាជ សីម៉ា ដែលគេស្គាល់ច្បាស់ថា ជាមេខ្យល់កំបុតត្បូង សង្ស័យជាមនុស្សអគតិដែលប្រើរូបមន្ត បើឈ្នះបានដីចាញ់បានប្រាក់នោះ បានលើកដៃសុំមានយោបល់ ដោយលើកឡើងថា គណៈកម្មការបានអវត្តមានលោក សំ ចាន់គា ដែលគេសង្ស័យជាក្រុមរបស់គាត់ ព្រោះគាត់បានលាឈប់ពីតំណែង ចំណែកជួរគណៈកម្មការដែលនៅសេសសល់បានកៀបសង្កត់ គំរាមកំហែង បំបាក់ស្មារតី និងបង្ខំឱ្យទទួលយកប្រាក់តិចតួច ដូច្នេះគាត់មិនអាចទទួលយកបានទេ ។ និយាយចប់ភ្លាម ឈ្មោះ រាជ សីម៉ា បានដើរចេញពីមុខគណៈកម្មការ ដែលមានលោកជំទាវអភិបាលរងខេត្ត ជាប្រធាន ដោយបានសម្លក់ភ្នែកដាក់បក្សពួក៨នាក់ ដែលគេស្គាល់ថាភាគច្រើនជាសាច់ញាតិគាត់ មានបង មានប្អូន ដែលត្រូវដោះស្រាយព្រឹកនោះ ដើរចេញពីសាលប្រជុំសាលាស្រុកទៀតផង ។
សកម្មភាពបែបនេះ អ្នកសង្កេតការណ៍យល់ឃើញថា មិនខុសពីឈ្មោះ រាជ សីម៉ា បានធ្វើកាលពីថ្ងៃទី២៧ មីនា ឆ្នាំ២០១៤ នៅសាលាឃុំតាជេស នោះដែរ ។ សកម្មភាពនេះហើយ ដែលអ្នកតាមដានអះអាងអត់ខុសថា គាត់ជាមេខ្លោង ជាមេក្រមីុ ឬជាមេខ្យល់ញុះញង់អត់ឈប់ឈរ ។ សកម្មភាពនេះ ត្រូវបានលោកជំទាវ ប្រធានគណៈកម្មការមើលឃើញថា ឈ្មោះ រាជ សីម៉ា គ្មានឆន្ទៈក្នុងការដោះស្រាយវិវាទនេះទេ ព្រោះនៅព្រឹកនោះ គណៈកម្មការមិនបានគំរាមកំហែងអ្វីឡើយ បើសិនឈ្មោះ រាជ សីម៉ា មានឆន្ទៈក្នុងការដោះស្រាយមែននោះ នឹងរង់ចាំដល់ពេលដែលត្រូវគណៈកម្មការហៅចូលបន្ទប់ពិភាក្សាម្តងម្នាក់ៗដូចការដោះស្រាយថ្ងៃទី៥ មេសា ដែលដោះស្រាយបាន៣៤នាក់ ជាពុំខាន ។ តែនេះ គណៈកម្មការមិនទាន់បានហៅសាកសួរផង ឈ្មោះ រាជ សីម៉ា ស្រែកតវ៉ាដើរចេញ ដូចគ្មានច្បាប់ទម្លាប់អ្វីបន្តិចសោះ ដូចមនុស្សរស់នៅក្រៅច្បាប់ ។ សកម្មភាពនេះ ត្រូវបានគេមើលឃើញទៀតថា គឺមកពីផ្ទះចាំតែស្រែកជំទាស់តែប៉ុណ្ណោះ ។
សូមបញ្ជាក់ថា ប្រជាពលរដ្ឋកាលពីថ្ងៃទី៤ មេសា ឆ្នាំ២០១៤ បានព្រមទទួលយកប្រាក់ដោះស្រាយគោលនយោបាយរបស់ក្រុមហ៊ុន ចំនួន៣៣គ្រួសារ តែក្រោយមក មួយគ្រួសារបានមកសុំក្រុមហ៊ុនទទួលយកប្រាក់នោះវិញ ក្រោយពីបដិសេធគឺឈ្មោះ នាង ង៉ាត់ ។ ដូច្នេះ ប្រជាពលរដ្ឋបានព្រមទទួលយកប្រាក់ដោះស្រាយរបស់ក្រុមហ៊ុន ឡើងដល់៣៤គ្រួសារ ។ ចំណែកនៅព្រឹកថ្ងៃទី៩ មេសា ក្រោយពីដើរចេញតាមការញុះញង់របស់ឈ្មោះ រាជ សីម៉ា មានប្រជាពលរដ្ឋមួយគ្រួសារ បានលួចរត់ត្រឡប់មកទទួលយកប្រាក់ពីក្រុមហ៊ុនវិញ ដែលសបញ្ជាក់ថា ក្នុងចំណោមប្រជាពលរដ្ឋទាំង៨គ្រួសារ នៅមានអ្នកចង់ទទួលយកប្រាក់ដោះស្រាយគោលនយោបាយពីក្រុមហ៊ុនទៀត លើកលែងតែសាច់បង្កើត និងសាច់ថ្លៃជាមួយមេខ្យល់កួច ។ ប៉ុន្តែដោយសារតែឈ្មោះ រាជ សីម៉ា ទើបពួកគាត់ពុំហ៊ានចេញមុខមកទទួលយកប្រាក់ ។
បើទោះបីបែបនេះក្តី តាមប្រជាពលរដ្ឋខ្លះបានលួចខ្សិបថា នឹងមានប្រជាពលរដ្ឋបន្តទៀត ដែលនឹងចេញមុខមកទទួលប្រាក់ពីក្រុមហ៊ុនជាពុំខាន ព្រោះអ្នកទាំងនោះ លែងចង់ស្តាប់ឈ្មោះ រាជ សីម៉ា ទៀតហើយ ។ ម្យ៉ាងទៀត ពួកគេមិនហ៊ានតទល់ជាមួយគណៈកម្មការទេ ព្រោះឈ្មោះ រាជ សីម៉ា នៅជាមួយ ដែលឈ្មោះ សីម៉ា នេះអត់មានដីទេ ទើបគេចចេញពីសំណួរផ្សេងៗ ។ លោកជំទាវ ដោក សុទ្ធា អភិបាលរងខេត្ត និងជាប្រធានគណៈកម្មការ មានប្រសាសន៍ថា ពេលនេះគណៈកម្មការបានបូកសរុបពីការងារ និងវាយតម្លៃលទ្ធផលក្នុងកិច្ចដំណោះស្រាយរយៈកាលកន្លងមក ដាក់ជូនលោកអភិបាលខេត្ត រួចហើយ ។ បើតាមផ្លូវច្បាប់ពីពេលនេះទៅ ការងារដែលនៅសេសសល់ គឺត្រូវដោះស្រាយគ្នានៅតុលាការ ព្រោះនេះជាច្បាប់ ។ ប៉ុន្តែទោះយ៉ាងនេះក្តី តាមលោកជំទាវ បានដឹងពីភាគីក្រុមហ៊ុន នៅតែមានឆន្ទៈដោះស្រាយជូនប្រជាពលរដ្ឋទាំង១១គ្រួសារ ដែលនៅសេសសល់នៅឡើយ បើប្រជាពលរដ្ឋចង់មកដោះស្រាយគ្នា ក្រុមហ៊ុននឹងរង់ចាំទទួល ប៉ុន្តែមានកំណត់ពេល ។
ជុំវិញវិវាទដីធ្លីរវាងប្រជាពលរដ្ឋជាមួយក្រុមហ៊ុន ដែលមើលឃើញថា នឹងបញ្ចប់ទៅដោយរលូនទៅហើយនោះ បែរជាមកល្អក់កករដោយសារតែមនុស្សម្នាក់ គឺឈ្មោះ រាជ សីម៉ា នេះឯង ជាមេខ្យល់យ៉ាងពិតប្រាកដ និងមានមេខ្យល់ធំនៅលាក់លៀមពីក្រោយទៀត ។ ឈ្មោះនេះបានជាខិតខំណាស់ក្នុងវិវាទដីធ្លីនេះ ព្រោះតែគាត់ជឿមេខ្យល់ធំធ្វើអង្គការមួយបោកគំនិតថា បើសិនជាមានទំនាស់រហូតចាប់ដាក់គុក នឹងត្រូវអង្គការជម្លៀសចេញទៅក្រៅប្រទេស ព្រោះជាសកម្មជនតស៊ូទំនាស់ដីធ្លី ។ តើប្រទេសណាអន់ម៉្លេះដែលយក រាជ សីម៉ា ទៅចិញ្ចឹម ។ តាមកោះសន្ដិភាពបានដឹង មានតែប្រទេសពន្ធនាគារប៉ុណ្ណោះដែលទទួល ។ ប៉ុន្តែសូមកុំភ្លេចថា គាត់ប្រាប់គណៈកម្មការដោះស្រាយថា គាត់បានទទួលដីកេរ ខណៈយាយ អ៊ុំ ទុំ ជាម្តាយ អត់មានដីមួយចំអាមសោះ សុំដីក្រុមហ៊ុនស្នាក់នៅ ដែលក្រុមហ៊ុនអាណិត និងពឹងពាក់ឱ្យជួយមើលដីឱ្យផង ។ ដល់ពេលក្រុមហ៊ុនត្រូវការដីមកអភិវឌ្ឍន៍ ទើបពួកគេស្រែកថា ក្រុមហ៊ុនរំលោភយកដីគាត់ ។ តើឈ្មោះ រាជ សីម៉ា មានដីកេរម៉ែឪមកពីណាចែកឱ្យ ? អ្នកស្រុកដឹងឮគ្រប់គ្នា ប៉ុន្តែពួកគេអត់ហ៊ាននិយាយទេ ព្រោះឈ្មោះនេះ «ឆ្អិនក្បាលសុីក្បាល ឆ្អិនកន្ទុយសុីកន្ទុយ» ។
មានតែទុកឱ្យតុលាការដោះស្រាយដោយយុត្តិធម៌ទៅចុះ ។ ម្យ៉ាងទៀត ឈ្មោះ រាជ សីម៉ា មានសំណុំរឿងដែលក្រុមហ៊ុនប្តឹងជាប់ចោទពីបទដុតបំផ្លាញផ្ទះអ្នកចាំដី ។ តាមជើងលេខគ្រូទាយសង្ស័យមានទោសព្រហ្មទណ្ឌជាមិនខាន ប្រសិនបើក្រុមហ៊ុនមិនដកពាក្យបណ្តឹង ។ នៅមានសល់រឿងច្រើនទៀតដែលមិនទាន់បានផ្សាយ ដូចជារឿងលោក ចាន់ សាវ៉េត ទៅជួបជាមួយក្រុមអ្នកតវ៉ា កាលពីថ្ងៃទី៤ មេសា ។ តើលោក ចាន់ សាវ៉េត ដែលស្កាត់ពីរាជធានីភ្នំពេញទៅជួបអ្នកភូមិឡពាង បាននិយាយអ្វីខ្លះជាមួយអ្នកតវ៉ា ដែលកោះសន្ដិភាពលើកយកសម្ដីអ្នកភូមិម្នាក់ដែលជឿ និងធ្វើតាមពីដំបូងនោះមកផ្សាយនៅពេលក្រោយទៀត ។ ដល់ពេលនោះអ្នកអានទាំងឡាយប្រាកដជាយល់ថា អ្នកណាជាមេខ្យល់កំបុតត្បូង ឬជាមេខ្យល់កួច ?
ពិសេសទៀត២ថ្ងៃកន្លងមកនេះ ការិយាល័យនិពន្ធកោះសន្ដិភាពបានទទួលលិខិត២ច្បាប់ពីអ្នកភូមិឡពាង សុំមិនបញ្ចេញឈ្មោះរៀបរាប់ពីការចាញ់បោកមេខ្យល់ឈ្មោះ រាជ សីម៉ា និងមេខ្យល់ម្នាក់ទៀតជាអង្គការ ដែលយើងសម្រេចថតចម្លងលិខិតនោះមកចុះផ្សាយទាំងស្រុងនៅពេលក្រោយដែរ ។
និយាយសរុបទៅ ក្រុមហ៊ុម ខេ ឌី ស៊ី របស់ប្រទេសកូរ៉េ ដែលមានបំណងអភិវឌ្ឍនៅទីនោះ រងគ្រោះធ្ងន់ធ្ងរណាស់ ដូចភ្នំសង្កត់ពីលើ ព្រោះតែមេខ្យល់២-៣នាក់ ដែលប្រើរូបមន្ដនយោបាយដ៏ចាស់គំរិលមួយ«ឈ្នះបានដីចាញ់បានប្រាក់» ។ ពួកគេអត់មានដី អត់មានឯកសារអ្វីបញ្ជាក់ ដែលគិតតែពីលើកគ្នាធ្វើបាតុកម្មប្រឆាំង ធ្វើឱ្យក្រុមហ៊ុនសម្រេចថា សុខចិត្ដបោះសាច់មួយដុំចោលទៅចុះឱ្យជ្រះចង្រៃ ។ ប៉ុណ្ណឹងហើយ នៅមានខ្លះមិនព្រមទៀត ដែលមានតែតុលាការទេទើបសម្រេចបានឆាប់រហ័ស និងអស់កង្វល់ ៕
ចែករំលែកព័តមាននេះ