រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌពោធិ៍សែនជ័យ ដឹកនាំដោយលោកអភិបាលខណ្ឌ ហែម ដារិទ្ធិ បានចុះបង្រ្កាបទីតាំងចិញ្ចឹមមាន់គក ដែលត្រៀម ជល់ថ្ងៃចូលឆ្នាំចំនួន២កន្លែង កាលពីវេលាម៉ោង១២និង២០នាទីរសៀលថ្ងៃទី១០ មេសា ឆ្នាំ២០១៤ នៅក្នុងភូមិសាមគ្គីទី៦ សង្កាត់ត្រពាំងក្រសាំង ខណ្ឌពោធិ៍សែនជ័យ ដោយដកហូតបានមាន់ជល់ចំនួន១២ក្បាល ខណៈម្ចាស់ដឹងខ្លួនមុនដាក់មេប្រូចបាត់។
ប្រភពព័ត៌មានពីសមត្ថកិច្ចបានឲ្យដឹងថា រយៈពេលប៉ុន្មានថ្ងៃកន្លងមកនេះ ប្រជាពលរដ្ឋបានរាយការណ៍ឲ្យដឹងថា មានសង្វៀនជល់មាន់ធំមួយ ស្ថិតក្នុងភូមិខាងលើ និងមានទីតាំងចិញ្ចឹមមាន់គកចំនួន២កន្លែង ត្រៀមជល់ក្នុងសង្វៀននោះនាថ្ងៃចូលឆ្នាំ ។ ខណៈលោកអភិបាលខណ្ឌ បានរៀបចំកម្លាំងគណៈបញ្ជាការឯកភាពខណ្ឌ ចុះទៅចំណុចខាងលើ រកឃើញមាន់គកជាច្រើនក្បាលដែលគេត្រៀមទុកសម្រាប់ជល់មែន ទើបធ្វើការដកហូតយកប្រគល់ទៅឲ្យអាជ្ញាធរត្រពាំងក្រសាំងដើម្បីរក្សាទុកបណ្តោះអាសន្ន ។ ដោយឡែកម្ចាស់មាន់ទាំងនោះហាក់ដូចជាដឹងខ្លួនមុន គេចខ្លួនបាត់មុនពេល ដែលកម្លាំងសមត្ថកិច្ចចម្រុះចុះទៅដល់។
ប្រជាពលរដ្ឋបាននិយាយថា ទីតាំងចិញ្ចឹមមាន់គកខាងលើ កើតឡើងយូរហើយ ដែលអ្នកលេងតែងតែទៅទិញមាន់គកនៅទីនោះ ដើម្បីយកទៅជល់ជាបន្តបន្ទាប់ ហើយនៅទីនោះក៏មានសង្វៀនជល់មាន់ធំមួយដែលតែងតែជល់លួចលាក់ស្ទើរតែរាល់ថ្ងៃ ។
ចែករំលែកព័តមាននេះ