ក្នុងពេលថ្មីៗនេះ IBM បានព្យាករណ៍មកថា ក្នុងរយៈពេល ៣ឆ្នាំទៀតពលករប្រមាណ ១២០លាននាក់នឹងត្រូវទទួលការហ្វឹកហាត់សាជាថ្មីព្រោះតែការធ្វើស្វ័យប្រវត្តិកម្ម និងបច្ចេកវិទ្យា Artificial Intelligence (AI)…
ក្នុងពេលថ្មីៗនេះ IBM បានព្យាករណ៍មកថា ក្នុងរយៈពេល ៣ឆ្នាំទៀតពលករប្រមាណ ១២០លាននាក់នឹងត្រូវទទួលការហ្វឹកហាត់សាជាថ្មីព្រោះតែការធ្វើស្វ័យប្រវត្តិកម្ម និងបច្ចេកវិទ្យា Artificial Intelligence (AI) ។ វាជាព័ត៌មានមួយដែលសហគ្រិនគួរតែយកចិត្តទុកដាក់ ព្រោះកត្តាដែលជួយឲ្យក្រុមហ៊ុន ឬអាជីវកម្មរបស់អ្នកជោគជ័យនៅថ្ងៃអនាគតអាចនឹងផ្លាស់ប្តូរ ។
ការធ្វើស្វ័យប្រវត្តិកម្ម និងបច្ចេកវិទ្យា AI នឹងធ្វើឲ្យមនុស្សរាប់លាននាក់លះបង់ការងារឲ្យទៅម៉ាស៊ីន ប៉ុន្តែអាជីវកម្មនៅតែត្រូវការមនុស្សដដែលព្រោះមានការងារមួយចំនួន ម៉ាស៊ីនមិនអាចបំពេញបានឡើយ ។ ជាមួយគ្នានេះផងដែរ វាក៏អាចបង្កើតការងារថ្មីៗដែលមនុស្សមិនទាន់ចេះ ឬមានជំនាញដែរ ។
ដោយហេតុដូចនេះក្រុមហ៊ុន និងអាជីវកម្មគួរតែយកចិត្តទុកដាក់ក្នុងការជ្រើសរើសបុគ្គលិក ព្រមទាំងត្រៀមពួកគេសម្រាប់ការផ្លាស់ប្តូរផ្សេងៗនាថ្ងៃអនាគត ជាពិសេសប្រសិនបើអាជីវកម្មរបស់អ្នកកំពុងតែពិចារណាធ្វើស្វ័យប្រវត្តិកម្មក្នុងផ្នែកណាមួយ ។
ប្រាកដណាស់ ជាដំបូងអ្នកត្រូវដឹងសិនថា តើការងារណាដែលអ្នកចង់ជំនួសមនុស្សដោយម៉ាស៊ីន? ហើយការងារណាដែលត្រូវការមនុស្សមកបំពេញវាដដែល? អ្នកត្រូវយល់ដឹងថាបច្ចេកវិទ្យាអាចជួយដល់អាជីវកម្មរបស់អ្នកក្នុងផ្លូវណាជាមុនសិន មុននឹងវិនិយោគលើបុគ្គលិករបស់អ្នក ។
ពេលដែលអ្នកអាចឆ្លើយនឹងសំណួរនេះហើយ អ្នកអាចចាប់ផ្តើមអនុវត្តគម្រោងការបាន តែមិនមែនមានន័យថាអ្នកត្រូវបញ្ឈប់ការងារមនុស្សដែលធ្លាប់តែបំពេញកិច្ចការដែលត្រូវបានជំនួយសដោយម៉ាស៊ីនទេ ។ ផ្ទុយមកវិញពួកគេគួរតែទទួលបានឱកាសក្នុងការរៀនសូត្រ និងធ្វើការក្នុងផ្នែកថ្មី ។ មានការសិក្សាជាច្រើនដែលបង្ហាញមកថា បុគ្គលិកដែលក្រុមហ៊ុន និងអាជីវកម្មនៅតែត្រូវការនៅថ្ងៃអនាគតគឺជាមនុស្សដែលមានជំនាញទន់ដូចជា ការដោះស្រាយបញ្ហា ភាពច្នៃប្រឌិត ការយល់ដឹងពីសង្គម និងការចូលចិត្តឆ្ងល់ជាដើម ។
ប្រសិនបើក្រុមការងាររបស់អ្នកមិនមានមនុស្សទាំងនេះទេ អ្នកអាចចាប់ផ្តើមផ្តល់ការហ្វឹកហាត់ដល់ពួកគេ ឬស្វែងរកបុគ្គលិកថ្មីដែលមានសមត្ថភាពទាំងនេះជាដើម ៕ កែសម្រួលដោយ ៖ សុឃាក់
ចែករំលែកព័តមាននេះ