ខេត្ដបន្ទាយមានជ័យ ៖ អាជីវករជាង១០០នាក់ កាលពីល្ងាចថ្ងៃទី៧ មេសា បាននាំគ្នាតវ៉ានៅមុខសាលាខេត្ដ ដោយសម្រេចចិត្ដមិនព្រមចេញពីផ្សារសិរីសោភ័ណ ក្រោយពីដឹងថា នឹងមានការឱ្យចាកចេញនៅថ្ងៃទី៨ មេសា ។ ក្រុមអាជីវករដែលលើកគ្នាមកតវ៉ាបានលើកបដាដែលមានរូបសម្ដេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន សំដៅអំពាវនាវឱ្យជួយដោះស្រាយពួកគាត់ឱ្យបានលក់នៅផ្សារសិរីសោភ័ណ
ខេត្ដបន្ទាយមានជ័យ ៖ អាជីវករជាង១០០នាក់ កាលពីល្ងាចថ្ងៃទី៧ មេសា បាននាំគ្នាតវ៉ានៅមុខសាលាខេត្ដ ដោយសម្រេចចិត្ដមិនព្រមចេញពីផ្សារសិរីសោភ័ណ ក្រោយពីដឹងថា នឹងមានការឱ្យចាកចេញនៅថ្ងៃទី៨ មេសា ។ ក្រុមអាជីវករដែលលើកគ្នាមកតវ៉ាបានលើកបដាដែលមានរូបសម្ដេចតេជោ ហ៊ុន សែន និងសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន សំដៅអំពាវនាវឱ្យជួយដោះស្រាយពួកគាត់ឱ្យបានលក់នៅផ្សារសិរីសោភ័ណផង ព្រោះលោកអភិបាលខេត្ដ មានវិធានការដេញមិនឱ្យលក់នៅជុំវិញផ្សារសិរីសោភ័ណដូចមុនទេ ។
ហេតុដូចនេះហើយ អាជីវករទាំងអស់សូមឱ្យសម្ដេចតេជោ និងសម្ដេចកិត្ដិព្រឹទ្ធបណ្ឌិត ជួយប្រជាពលរដ្ឋផង ព្រោះផ្សារសិរីសោភ័ណនៅរយៈពេល៥ឆ្នាំទៀត ទើបដាច់អាណត្ដិ ។ ទាក់ទិនទៅដល់ការលក់បច្ចុប្បន្ននៅជុំវិញ និងលើដងផ្លូវឥតសណ្ដាប់ធ្នាប់នេះ តំណាងអាជីវករបាននិយាយថា កាលពីមុន អាជីវករមានកន្លែងលក់ដូរនៅក្នុងផ្សារសិរីសោភ័ណយ៉ាងល្អ។ ប៉ុន្ដែកាលពីអាណត្ដិមុន ខេត្ដបានឃុបឃិតជាមួយក្រុមហ៊ុនផ្សារវាស់ផ្សារមេឃលក់អស់ ហើយអាជីវករក៏ត្រូវចេញមកលក់នៅតាមផ្លូវជុំវិញផ្សារសិរីសោភ័ណ ដែលមានគណៈកម្មការ កាលណោះមានលោកស្រី នួម សុភ័ណ ជាអភិបាលរងខេត្ដ និងលោក អ៊ុំ រាត្រី ជាអភិបាលស្រុក បានសម្រេចឱ្យលក់នៅជុំវិញផ្សារសិរីសោភ័ណ ។ អ្នកតំណាងដដែលបន្ដថា ពេលលោក ទ្រី ណារិន អតីតអភិបាលខេត្ដមុនឡើង លោកក៏មានវិធានការចង់ឱ្យក្រុមអាជីវករចាកចេញដូចគ្នា និងទៅលក់នៅផ្សាររាត្រី តែដោយមានការតវ៉ាក៏បានលុបចោលផែនការឱ្យចាកចេញរហូតដល់ឆ្នាំ២០១៨ ។
ក្រោយពេលលោក គោស៊ុំ សារឿត ជាអភិបាលខេត្ដថ្មីមកកាន់ជំនួសលោក ទ្រី ណារិន ដែលទទួលមរណភាពដោយគ្រោះថ្នាក់ចរាចរណ៍ ក៏បានសម្រេចជាមោឃភាពលើកំណត់ហេតុស្ដីពីការប្រជុំរៀបចំសណ្ដាប់ធ្នាប់ផ្សារសិរីសោភ័ណដោយបានលុបចោលគណៈកម្មការចាស់មុនអាណត្ដិ ហើយគ្រោងឱ្យអាជីវករចេញពីផ្សារសិរីសោភ័ណឱ្យទៅលក់នៅផ្សាររាត្រី និងផ្សារហ៊ុយឡេង ។ ការតវ៉ារបស់ក្រុមអាជីវករទាំងអស់បានសម្រេចចិត្ដថា មិនចេញទេ ដោយរង់ចាំដាច់អាណត្ដិផ្សាររយៈពេល៥ឆ្នាំទៀត ទើបនាំគ្នាតវ៉ានៅមុខទីស្នាក់ការគណបក្សប្រជាជនកម្ពុជាខេត្ដ និងសាលាខេត្ដ ដើម្បីឱ្យលោកអភិបាលខេត្ដជួយរកយុត្ដិធម៌ឱ្យផ្សារមេឃមកវិញ ។
ក្រោយពេលមានប្រជាពលរដ្ឋនាំគ្នាធ្វើការតវ៉ានៅមុខសាលាខេត្ដ លោក ចុង ផែត អភិបាលរងខេត្ដបានឱ្យអាជីវករជាង១០០នាក់ ចូលជួបប្រជុំដោះស្រាយ តែគោលជំហរខេត្ដនៅតែបន្ដអនុវត្ដឱ្យអាជីវករដែលលក់លើចិញ្ចើមផ្លូវជុំវិញផ្សារសិរីសោភ័ណគឺអាជ្ញាធរត្រូវរកទីតាំងថ្មីឱ្យលក់ដូរបន្ដនៅផ្សាររាត្រី និងផ្សារហ៊ុយឡេង នៅក្រុងសិរីសោភ័ណ ។ លោក ចុង ផែត បន្ដថា មូលហេតុដែលរកទីតាំងថ្មីឱ្យអាជីវករលក់ដូរមិនឱ្យលក់លើចិញ្ចើមផ្លូវជុំវិញផ្សារសិរីសោភ័ណ គឺខេត្ដអាណត្ដិថ្មីនេះ នឹងរៀបចំសណ្ដាប់ធ្នាប់ ដើម្បីប្រកួតប្រជែងទីក្រុងស្អាត ទាក់ទាញភ្ញៀវជាតិនិងអន្ដរជាតិ ។ ទោះបីជាមានការកំណត់ឱ្យចាកចេញនៅថ្ងៃទី៨ មេសា ក្ដី ក៏មានសេចក្ដីរាយការណ៍ថា អាជីវករមិនព្រមចាកចេញទេ ហើយអាជ្ញាធរក៏មិនមានសកម្មភាពណាមួយគួរឱ្យកត់សម្គាល់ឡើយ ។
លោក ចក់ សារ៉ុម និងលោក លន់ ថា តំណាងក្រុមហ៊ុន ថូម៉ាក់ បានប្រាប់ថា បើសិនជាលោកអភិបាលខេត្ត លុបចោលគណៈកម្មការចាស់ ហើយគ្រោងបណ្តេញអាជីវករដែលលក់តាមចិញ្ចើមផ្លូវឱ្យទៅលក់នៅផ្សារឯកជនចំនួន២ ដែលគ្មានអ្នកលក់ដូរនោះ តើឱ្យពួកគាត់លក់ឱ្យអ្នកណាទិញ ទើបក្រុមអាជីវករសម្រេចចិត្តមិនទៅ ដោយមានលក្ខខណ្ឌចំនួន២ចំណុច ១-គឺជួយរកផ្សារមេឃដែលធ្លាប់លក់ពីមុន ទើបសុខចិត្ត និង២-សុំដល់ផុតអាណត្តិផ្សារសិរីសោភ័ណ ៕
ចែករំលែកព័តមាននេះ