ខេត្តបន្ទាយមានជ័យ ៖ ពស់ថ្លាន់មួយក្បាលមានប្រវែង៣,២ម៉ែត្រ ទម្ងន់៤២គីឡូក្រាម រួមទំាងមានពងធំៗជាង៥០ បានត្រូវអ្នកភូមិប្រទះឃើញនៅក្នុងវត្តទើបសាងសង់ថ្មីឈ្មោះវត្តខេមរាសីមារាម ស្ថិតក្នុងភូមិទំនប់ក៥ សង្កាត់-ក្រុងប៉ោយប៉ែត ជាប់ព្រំដែនខ្មែរ-ថៃ បង្កការភ្ញាក់ផ្អើលនៅព្រឹកថ្ងៃទី០៨ មេសា ២០១៤ ។
បើតាមស្រ្តីចំណាស់ឈ្មោះ ង៉ែត សំា អាយុ៧៤ឆ្នាំបានឲ្យដឹងថា នៅមុនពេលពស់នេះវារលូនចូលវត្ត គាត់បានយល់សប្តិឃើញទេវតាជាច្រើនពាក់សុទ្ឋតែម្កុដនៅក្នុងវត្ត លុះព្រឹកឡើងគាត់ក៏បានឃើញពស់ថ្លាន់មួយក្បាលនេះតែម្តង ។
បើតាមអ្នកឆ្លើយឆ្លងព័ត៌មានកោះសន្តិភាពបានស្រង់សម្តីប្រជាពលរដ្ឋឲ្យដឹងទៀតថា កន្លងមកពស់ថ្លាន់មួយក្បាលនេះ បានត្រូវគេប្រទះឃើញជាញឹកញាប់នៅតាមផ្លូវ រួចក៏ត្រូវក្រុមអ្នកភូមិបា្រប់អាជ្ញាធរចាប់យកទៅលែងនៅភូមិព្រៃគប់ ស្ថិតក្នុងសង្កាត់ផ្សារកណ្តាល ក្រុងប៉ោយប៉ែត តាំងពីថ្ងៃទី៣១មីនា ២០១៤ ប៉ុន្តែមិនដឹងយ៉ាងម៉េចស្រាប់តែពស់ថ្លាន់មួយក្បាលនេះ វារលូនមកចូលក្នុងវត្តខាងលើនេះវិញ ។ ក្រុមអ្នកភូមិដែលមានជំនឿងបានលើកឡើងថា ពស់ថ្លាន់នេះពិតជាមានបារមី ហើយនឹងនំាសេចក្តីសុខមកជូនប្រជាពលរដ្ឋនៅក្នុងក្រុងប៉ោយប៉ែត ក៏ដូចជាប្រជាពលរដ្ឋនៅក្នុងខេត្តបន្ទាយមានជ័យទំាងមូល ។
សេចក្តីរាយការណ៏បានបញ្ជាក់បន្ថែមទៀតថា នៅរសៀលថ្ងៃទី០៨មេសានេះដែរ ក្រុមអ្នកភូមិបាននំាគ្នាមកចោមរោមមើលសុំសេចក្តីសុខ និងចូលបច្ច័យសម្រាប់យកទៅសាងសង់ផ្សេងៗនៅក្នុងព្រះវិហារវត្តខេមរាសីមារាម ដែលទើបសាងសង់រួចបានមួយខែនេះ ៕
ចែករំលែកព័តមាននេះ