រាជធានីភ្នំពេញ ៖ កំលោះក្រមុំ២នាក់ ដែលស្រទ្បាញ់គ្នាយ៉ាងស្មោះស័្មគ្រ និងប្តូរផ្តាច់ទោះបីមានការបំបែកបំបាក់ពីឪពុកម្តាយខាងស្រីយ៉ាងណាក៏ដោយ ក៏ពួកគេនៅតែជម្នះប្រពៃណី នំមិនធំជាងនាទ្បិ ហើយនាំគ្នាទៅកាន់សាលាឃុំវិហារសួគ៌ចុះសំបុត្រអាពាហ៍ពិពាហ៍រួចនាំគ្នាមករៀបចំពិធីមង្គលការនៅរាជធានីភ្នំពេញ និងត្រូវបានឪពុកម្តាយខាងស្រីមករារាំងដើម្បីនាំយកកូនស្រីត្រទ្បប់ទៅផ្ទះវិញ ។
ហេតុការណ៍នេះ បានធ្វើឱ្យមានការភ្ញាក់ផ្អើលកាលពីវេលាម៉ោង៧យប់ថ្ងៃទី៦ មេសា នៅក្នុងភោជនីយដ្ឋានម្លប់ស្បូវត្រជាក់ចិត្ត ដែលស្ថិតនៅតាមបណ្តោយផ្លូវជាតិលេខ៦ ក្នុងភូមិកៀនឃ្លាំង សង្កាត់ជ្រោយចង្វា ខណ្ឌឫស្សីកែវ។ទោះបីជាយ៉ាងណា ការមកតាមហៅកូនឱ្យត្រទ្បប់ទៅវិញ មិនបានសម្រេចដូចបំណងទ្បើយ ព្រោះពួកគេបានស្រទ្បាញ់និងស្មោះស្ម័គ្រនាំគ្នាមករៀបការដោយស្របច្បាប់ ព្រោះវាជាសិទ្ធិដែលមិនអាចបំពានបាន ទោះបីជាមេបាក៏ដោយ ។
តួអង្គសេ្នហានេះ ត្រូវគេដឹងថា ខាងប្រុសឈ្មោះ ចាន់ សេងពិសី អាយុ២៦ឆ្នាំ មានទីលំនៅក្នុងភូមិតាកែវ២ ឃុំវិហារសួគ៌ ស្រុកខ្សាច់កណ្តាល ខេត្តកណ្តាល និងខាងស្រីជាកូនក្រមុំឈ្មោះ ស្រ៊ុន ផល្លី អាយុ២៤ឆ្នាំ មានលំនៅភូមិវិហារសួគ៌ត្បូង ឃុំវិហារសួគ៌ ស្រុកខ្សាច់កណ្តាល ខេត្តកណ្តាល ។
តាមប្រភពព័ត៌មានឱ្យដឹងថា ពួកគេទាំង២នាក់ បានស្រទ្បាញ់គ្នាប្រមាណជាង២ឆ្នាំមកហើយ ខាងប្រុសក៏បានឱ្យឪពុកម្តាយចូលទៅស្តីដណ្តឹងចែចូវតាមប្រពៃណី តែខាងស្រីពុំព្រមលើកកូនឱ្យទេ ។ ទោះបីជាយ៉ាងនេះក្តី ការស្រទ្បាញ់ធំជាងផែនពសុធា និងខ្ពស់ជាងវេហាស៍ បានជំរុញឱ្យពួកគេជម្នះរាល់គ្រប់ឧបសគ្គ ហើយបានទៅចុះសំបុត្រអាពាហ៍ពិពាហ៍នៅសាលាឃុំវិហារសួគ៌នៅថ្ងៃទី៤ មិថុនា ឆ្នាំ២០១៣ ដើម្បីឱ្យក្លាយទៅជាប្តីប្រពន្ធស្របច្បាប់ ។
ប្រភពដដែលបន្តថា បន្ទាប់ពីរស់នៅជាមួយគ្នាជាប្តីប្រពន្ធ ដែលឪពុកម្តាយខាងស្រីមិនទទួលស្គាល់ ពួកគេក៏បានរៀបពិធីមង្គលការ ដែលភ្ជាប់ទៅនឹងថ្ងៃខួបកំណើតកូនក្រមុំ ដើម្បីឱ្យចាស់ៗនិងមិត្តភក្តិដឹងឮថា ពួកគេបានរៀបការតាមប្រពៃណីហើយ ។ ប៉ុន្តែទីបំផុតឪពុកម្តាយបានតាមបំបែកបំបាក់ដដែល ដោយនាំគ្នាមកយកកូនស្រីត្រទ្បប់ទៅវិញ ធ្វើឱ្យមានការភ្ញាក់ផ្អើលពេញភោជនីយដ្ឋាន ។ តាមព័ត៌មានបន្តទៀតថា នៅយប់នោះក៏បានផ្អើលដល់នគរបាលមូលដ្ឋានចុះទៅសម្របសម្រួល និងសួរនាំចៀសវាងមានការប្រើហិង្សា។ការទាមទារនាំកូនស្រីត្រទ្បប់ទៅវិញ មិនបានសម្រេចនោះទេ ហើយនៅវេលាម៉ោងប្រមាណជិត១០យប់ ឪពុកម្តាយក៏បានត្រទ្បប់ទៅវិញ ។
ទោះបីជាយ៉ាងនេះក្តី កោះសន្តិភាពពុំបានទទួលការបំភ្លឺណាមួយពីឪពុកម្តាយ និងកូនកម្លោះកូនក្រមុំបានទ្បើយ ។ ជាការពិត គ្មានឪពុកម្តាយណាមួយចង់ឱ្យកូនអាក្រក់ ចង់ឱ្យកូនវេទនានោះទេ តែក៏ត្រូវយល់ថា ឪពុកម្តាយអាចបង្កើតរូបកាយកូនបានមែន តែមិនអាចបង្កើតចិត្តពួកគេបានទេ ។ រឿងរ៉ាវគូស្រករជារឿងអនាគតកូនចៅ គួរតែសាទរដល់ការស្រទ្បាញ់គ្នាស្មោះស័្មគ្រ ប្រឹងប្រែងកសាងសង្គមគ្រួសារមួយប្រកបដោយសុភមង្គល ទើបកូនចៅមានអនាគតភ្លឺស្វាងត្រចេះត្រចង់ ៕
ចែករំលែកព័តមាននេះ