Land Rover ខ្វែងគំនិតនឹងរថយន្ត SUV ប្រើអគ្គិសនីទេ

ថ្ងៃទី ០២ ខែ តុលា ឆ្នាំ ២០១៩

ម៉ោង ១៣:៤៧

ខណៈពេលដែលក្រុមហ៊ុនផលិតរថយន្តធំៗ ស្ទើរតែទាំងអស់កំពុងធ្វើការយ៉ាងស្វាហាប់ក្នុងការយករថយន្តអគ្គិសនីមកលក់នៅលើទីផ្សារ ក្រុមហ៊ុនរថយន្ត Land Rover មិនបានប្រញាប់ប្រញាល់ចាប់យកគំនិតផលិតរថយន្ត SUV ដាក់ម៉ាស៊ីនអគ្គិសនីនោះទេ។

ថ្លែងប្រាប់សារព័ត៌មាន Automotive News Europe ក្រុមហ៊ុន Jaguar Land Rover (JLR) បានបង្ហើបប្រាប់ពីមូលហេតុ ដែលមិនមានការប្រញាប់ប្រញាល់ផលិតរថយន្ត SUV អគ្គិសនីពេញលេញ ដូចជាម៉ូដែល Discovery និង Range Rover ។

យោងតាមប្រធានវិស្វកម្មរបស់ក្រុមហ៊ុន Jaguar Land Rover លោក Nick Rogers បានឱ្យដឹងថា រថយន្ត SUV ធំៗមានបញ្ហាត្រង់ទំហំរបស់វា ដែលពិបាកនឹងដាក់ឱ្យប្រើប្រាស់ម៉ាស៊ីនអគ្គិសនី។

លោក Rogers បានបង្ហើបថា៖ «យានយន្តកាន់តែធំ ចាញ់ខ្យល់កាន់តែខ្លាំង។ ប្រសិនបើយើងដាក់ឱ្យវាប្រើប្រាស់អគ្គិសនី វានឹងទាមទារអាគុយទំហំធំ ដែលមានទម្ងន់ធ្ងន់ បង្កជាផលពិបាកដល់ល្បឿនរបស់រថយន្ត» ។

ទោះបីជាគាត់និយាយត្រឹមត្រូវក៏ដោយ ក៏យើងនៅឃើញមានក្រុមហ៊ុនផ្សេងៗទៀត ផលិតរថយន្ត SUV ធំៗ ប្រើអគ្គិសនីដោយជោគជ័យ។ វាអាចក្លាយទៅជាគូប្រជែងរបស់ក្រុមហ៊ុន Land Rover ព្រោះតែវាអាចបើកបរក្នុងស្ថានភាពផ្លូវពិបាកៗដូចទៅនឹង Range Rover និង Discovery ដែរ។ រថយន្តដែលប្រើប្រាស់អគ្គិសនី បើទោះបីជាមានមាឌធំ មានដូចជា R1T, R1S SUV, B1, B2, Ford Crossover និង Ford F-150។

រថយន្តទាំងនោះ ដែលជារថយន្តអគ្គិសនីប្រភេទ SUV គ្មានមួយណាផលិតសម្រាប់ធ្វើរថយន្តប្រណាំងនោះទេ។ វាផ្តោតទៅលើសមត្ថភាពបើកបរលើផ្លូវពិបាកៗ ជាមួយនឹងគោលបំណងកាត់បន្ថយការបំពុលបរិស្ថាន ដោយសារតែវាគ្មានផ្សែងបំពុល។ ការប្រើប្រាស់ថាមពលឧស្ម័នអ៊ីដ្រូសែនអាចជាអ្វីដែលក្រុមហ៊ុន Land Rover អនុវត្តនៅថ្ងៃមុខ សម្រាប់រថយន្ត SUV របស់ខ្លួន៕

ប្រភព ៖ carbuzz , កែសម្រួលដោយ ៖ សំណាង