រាជធានីភ្នំពេញ ៖ លោកស្រី ងឿន ផល្លីនពោធិតា នាយិកាសាលាអន្តរជាតិសិង្ហបុរី (SIS) រួមជាមួយលោកគ្រូ អ្នកគ្រូ និងសិស្សានុសិស្សមួយចំនួនទៀតបាននាំយកថវិកាមូលនិធិចំនួន៥.៥០០ដុល្លារអាមេរិក ប្រគល់ជូនមន្ទីរពេទ្យគន្ធបុប្ផា ដើម្បីចូលរួមចំណែកក្នុងការជួយដល់កុមារកម្ពុជាជាច្រើននាក់ដែលពឹងផ្អែកលើមន្ទីរពេទ្យនេះ ។ ពិធីប្រគល់ថវិកាជូនមន្ទីរពេទ្យបានធ្វើឡើងកាលពីរសៀលថ្ងៃទី៣ មេសា ២០១៤ នៅមន្ទីរពេទ្យគន្ធបុប្ផាផ្ទាល់តែម្តង ។
លោកស្រី ងឿន ផល្លីនពោធិតា នាយិកាសាលាអន្តរជាតិសិង្ហបុរី បានមានប្រសាសន៍ថា នេះជាលើកទី២ហើយ ដែលសាលាអន្តរជាតិសិង្ហបុរីបានចូលរួមចំណែកទ្រទ្រង់និរន្តរភាពដល់មន្ទីរពេទ្យគន្ធបុប្ផា ដែលកំពុងត្រូវការជាចាំបាច់ក្នុងការចំណាយផ្សេងៗ ។ លើកទី១ ពេលនោះក្នុងនាមជាគណៈគ្រប់គ្រងសាលាអន្តរជាតិសិង្ហបុរី បានធ្វើសេចក្តីអំពាវនាវប្រមែប្រមូលថវិកាពីក្រុមគ្រួសារ មាតាបិតា អាណាព្យាបាល សិស្សានុសិស្ស និងពីបុគ្គលិកគ្រប់ផ្នែករបស់ខ្លួនបានចំនួន១១លានរៀល ដើម្បីផ្តល់ជូនមន្ទីរពេទ្យគន្ធបុប្ផា ។ ដោយឡែកលើកទី២នេះ ថវិកាមានចំនួនលើសមុនពីរដង ព្រោះថា មាតាបិតា អាណាព្យាបាល សិស្សមានទំនុកចិត្តមកលើសាលារៀន ក្នុងការប្រើប្រាស់ថវិកាមូលនិធិរបស់ខ្លួន ដែលកន្លងមកសុទ្ធតែបានប្រើប្រាស់ត្រឹមត្រូវជួយដល់សង្គមជាតិ ដូចជា បានឧបត្ថម្ភដល់កងទ័ពនៅសមរភូមិជួរមុខ ដល់មន្ទីរពេទ្យគន្ធបុប្ផា ដល់មនុស្សចាស់ជរាគ្មានទីពឹង សិស្សក្រីក្រ និងសង់លំនៅដ្ឋានដល់ទុរគតជនជាដើម ។
ចែករំលែកព័តមាននេះ