ខេត្តបន្ទាយមានជ័យ ៖ តាមប្រភពព័ត៌មានពីប្រទេសថៃបានឱ្យដឹងថា កាលពីម៉ោងជិត១រសៀល ថ្ងៃទី២ មេសា ឆ្នាំ២០១៤ នៅតំបន់បាងខេ ក្រុងបាងកក មានស្នូរផ្ទុះដ៏កក្រើកមួយនៅទីតាំងទទួលទិញគ្រឿងអេតចាយដ៍ធំ បានធ្វើឱ្យកម្មករខ្មែរ-ថៃស្លាប់ និងរបួសប្រហែល២០នាក់ ។ ករណីផ្ទុះដ៏កក្រើកនៅក្រុងបាងកកនេះ ដំបូងឡើយគេមិនដឹងថា អ្នករងគ្រោះមានជនជាតិខ្មែរឬអត់នោះទេ ហើយក៏មិនដឹងថាផ្ទុះដោយសារអ្វីនោះដែរ ។
ទោះជាយ៉ាងណា តាមព័ត៌មានដែលកោះសន្តិភាពទទួលបាននៅព្រឹកថ្ងៃទី៣ មេសា ពីគ្រួសារខ្មែរយើងម្នាក់ប្រាប់តាមទូរស័ព្ទថា ការផ្ទុះដ៏កក្រើកនៅកន្លែងមួយក្នុងក្រុងបាងកកនោះ គឺសាច់ញាតិរបស់គាត់៥នាក់ត្រូវស្លាប់មានក្មេងប្រុសស្រី២នាក់ និងមនុស្សធំ៣នាក់ដោយ៤នាក់ជាអ្នកភូមិទម្លាប់ ឃុំប្រាសាទ ស្រុកព្រះនេត្រព្រះ និងម្នាក់ជាអ្នកភូមិសំបួរ ស្រុកក្រឡាញ់ ខេត្តសៀមរាប ។ អ្នកប្រាប់តាមទូរស័ព្ទពីករណីស្លាប់ និងរបួសនៅក្រុងបាងកកនេះឈ្មោះ យឿន សាន ភេទស្រី អាយុ៤៨ឆ្នាំ មានទីលំនៅភូមិទម្លាប់ ឃុំ ប្រាសាទ ។
ស្ត្រីខាងលើនិយាយថា ជនរងគ្រោះទាំង៥រូបមាន ១-ឈ្មោះ មឿត ពក ភេទប្រុស អាយុ២៨ឆ្នាំ ជាកូនរបស់គាត់ ២-ឈ្មោះ ឃឿត នី ភេទប្រុស អាយុ៣០ឆ្នាំ ជាក្មួយ ៣-ឈ្មោះ ឆា បារាំង ភេទប្រុស អាយុ២៣ឆ្នាំ ជាអ្នក ភូមិ តែទៅស្នាក់នៅភូមិសំបួរ ឃុំសំបួរ ស្រុកក្រឡាញ់ ខេត្តសៀមរាប ដែលជាស្រុកប្រពន្ធ ។ ៤-ឈ្មោះ ឡាន់ ឡា ភេទប្រុស អាយុ១០ឆ្នាំ និង៥-ឈ្មោះ ឡាន់ ខាច ភេទស្រី អាយុ៧ឆ្នាំ ។ ស្ត្រីឈ្មោះ យឿន សាន បាននិយាយថា មុនពេលកើតហេតុគាត់បានទូរស័ព្ទទៅសួរសុខទុក្ខកូនប្រុសរបស់គាត់ ហើយក្រោយពីបញ្ចប់ការជួបគ្នាតាមទូរស័ព្ទបានមួយសន្ទុះ គាត់ក៏ទទួលទូរស័ព្ទពីសាច់ញាតិប្រាប់ថា កន្លែងដែលកូន និងសាច់ញាតិគាត់មួយចំនួនធ្វើការនោះមានផ្ទុះគ្រាប់ដ៏ធំមួយ ខណៈដែលកូនរបស់គាត់ត្រូវបានថៅកែអេតចាយនោះប្រើឱ្យទៅផ្សារកាត់ដុំដែកមើល ថាតើជាប្រភេទដែកអ្វីនោះ ស្រាប់តែផ្ទុះកក្រើកដីបង្កឱ្យកម្មករខ្មែរ-ថៃរបួស និងស្លាប់ជាច្រើននាក់តែម្តង ។
តាមប្រភពព័ត៌មានថា គ្រាប់ដ៏ធំនេះត្រូវបានកម្មករសំណង់មួយក្រុមដឹកតាមរថយន្តមកលក់ឱ្យទីតាំងអេតចាយនោះ ដោយគេប្រាប់ថា ប្រទះឃើញក្នុងជម្រៅ៣ម៉ែត្រខណៈពេលជីករណ្តៅដើម្បីបុកគ្រឹះសំណង់មួយកន្លែង ។
គាត់បន្តថា គ្រាប់មួយនោះពេលដឹកមកដល់ត្រូវគេថ្លឹងមានទម្ងន់២៣០គីឡូក្រាម ហើយពេលថៅកែអេតចាយនោះបញ្ជាឱ្យកូនរបស់គាត់កាត់មើល ក៏ផ្ទុះកក្រើកតែម្តង ។ គាត់បន្តថា ក្នុងចំណោមជនរងគ្រោះទាំង៥ នាក់គេរកឃើញតែ២នាក់ទេ គឺក្មេងប្រុសស្រី ហើយពេលនេះឪពុកម្តាយក្មេងទាំង២កំពុងទំនាក់ទំនងយកសពក្មេងៗទាំងនោះត្រឡប់មកស្រុកវិញ ។ ជុំវិញព័ត៌មានខាងលើ លោក នេត សារី អគ្គកុងស៊ុលខ្មែរប្រចាំខេត្តស្រះកែវ ប្រទេសថៃ បានប្រាប់តាមទូរស័ព្ទថា ករណីផ្ទុះនោះពិតជាកើតមានមែន កាលពីម្សិលមិញ (ថ្ងៃទី២ មេសា) ប៉ុន្តែលោកមិនដឹងថា ក្នុងចំណោមជនរងគ្រោះទាំងនោះមានខ្មែរឬក៏អត់នោះទេ ។
លោកប្រាប់ថា ជាការផ្ទុះគ្រាប់បន្សល់ទុកតាំងពីសម័យសង្គ្រាមលោកលើកទី២ ពេលអ្នកស្រុកកាយឃើញក៏នាំគ្នាដឹកយកមកលក់ទើបកើតមានបញ្ហា ។ ទោះជាយា៉ងណា លោកប្រាប់ថា ពេលនេះខាងស្ថានទូតកំពុងបញ្ជូនក្រុមការងារចុះទៅស្រាវជ្រាវរកកន្លែងកើតហេតុហើយ ៕
ចែករំលែកព័តមាននេះ