ខេត្តសៀមរាប៖អ្នកជំនាញអាជ្ញាធរជាតិអប្សរាកំពុងតែដំណើរការជួសជុលខ្លោងទ្វារខាងកើតនៃប្រាសាទតានៃ ។ តាមទំនៀម ក្រុមការងារបានរៀបចំសែនព្រេន នៅមុនពេលចាប់ផ្ដើមការជួសជុលនេះ ។ យោងតាមផេកហ្វេសប៊ុកក្រសួងវប្បធម៌ និងវិចិត្រសិល្បៈផ្សាយថា លោក ស៊ា…
ខេត្តសៀមរាប៖អ្នកជំនាញអាជ្ញាធរជាតិអប្សរាកំពុងតែដំណើរការជួសជុលខ្លោងទ្វារខាងកើតនៃប្រាសាទតានៃ ។ តាមទំនៀម ក្រុមការងារបានរៀបចំសែនព្រេន នៅមុនពេលចាប់ផ្ដើមការជួសជុលនេះ ។
យោងតាមផេកហ្វេសប៊ុកក្រសួងវប្បធម៌ និងវិចិត្រសិល្បៈផ្សាយថា លោក ស៊ា សុភារុន បុរាណវិទូនៃនាយកដ្ឋានអភិរក្សប្រាសាទក្នុងឧទ្យានអង្គរ និងបុរាណវិទ្យាបង្ការ និងជាប្រធានគម្រោងជួសជុលបានឱ្យដឹងថា បញ្ហាប្រឈមខ្លាំងរបស់ខ្លោងទ្វារខាងកើតប្រាសាទតានៃដែលតម្រូវឱ្យមានការជួសជុលមុនទីតាំងផ្សេង គឺបណ្តាលមកពីរចនាសម្ព័ន្ធរបស់ខ្លោងទ្វារបានរំកិលចេញពីទីតាំងដើម ថ្មជញ្ជាំងគ្រប់ជ្រុងប្រេះ ក្រៀកចេញពីគ្នា ដែលប្រឈមនឹងការបាក់រលំ ថ្មដំបូលបានជ្រុះធ្លាក់ស្ទើរទាំងស្រុង ចំណែកថ្មដំបូលដែលនៅសល់ពុំមានស្ថិរភាព ឫស និងដើមឈើចាក់ចូលបំផ្លាញរចនាសម្ព័ន្ធថ្ម រួមនឹងគុណភាពថ្មចុះខ្សោយផង បានបំផ្លាញរចនាសម្ពន្ធគ្រឹះ មិនអាចទ្រលំនឹងតួប្រាសាទបានរឹងមាំដូចមុន។
ប្រាសាទតានៃពុំធ្លាប់មានការជួសជុលមកពីមុនទេ ដោយគ្រាន់តែមានការអភិរក្សទល់ទ្រនៅផ្នែកខ្លះតែប៉ុណ្ណោះ ។ ដូច្នេះហើយ គោលបំណងសំខាន់នៃការជួសជុលខ្លោងទ្វារខាងកើតនេះ គឺដើម្បីអភិរក្ស និងលើកតម្លៃប្រវត្តិស្ថាបត្យកម្មសំណង់បុរាណ ឱ្យមានភាពមាំទាំ គង់វង្ស យូរអង្វែង រួចចាកផុតពីភាពខ្ទេចខ្ទាំ ដើម្បីបន្តរក្សាទុកជាកេរមរតកដល់កូនចៅខ្មែរជំនាន់ក្រោយ ។
ទាក់ទងនឹការជួសជុលឡើងវិញ បុរាណវិទូរូបនេះក៏ឱ្យដឹងថា យោងតាមអនុសាសន៍ក្រុមអ្នកជំនាញអាដហុករបស់អង្គការយូណេស្កូ ក្នុងកិច្ចប្រជុំអាយស៊ីស៊ី-អង្គរលើកទី៣២ កាលពីថ្ងៃទី១១ ១២ ខែមិថុនា កន្លងទៅថ្មីៗនេះ ត្រង់ចំណុចទី១១ គឺតម្រូវឱ្យធ្វើការជួសជុលលើខ្លោងទ្វារខាងកើត ដោយរុះរើទាំងស្រុង ធ្វើកំណាយមើលគ្រឹះ និងរៀបផ្គុំឡើងវិញ ។ ចំពោះគម្រោងជួសជុលនេះដែរ គឺអនុវត្តដោយអ្នកជំនាញអាជ្ញាធរជាតិអប្សរា សហការជាមួយវិទ្យាស្ថានជាតិស្រាវជ្រាវមរតកវប្បធម៌នៃទីក្រុងតូក្បូប្រទេសជប៉ុន (ផ្តល់ដំបូន្មានបច្ចេកទេស) និងបញ្ចប់ក្នុងរយៈពេល២ឆ្នាំ (២០១៩-២០២០) មានពីរដំណាក់កាល។
ដំណាក់កាលទី១ នៅឆ្នាំ២០១៩ ក្រុមការងារសិក្សាប្រមូលរាល់ឯកសារពាក់ព័ន្ធ កំណាយស្រាវជ្រាវស្វែងរកថ្ម សម្រង់ប្លង់ ចុះបញ្ជីសារពើភណ្ឌថ្ម ថតរូបថតស្រ៊ីឌីទុកជាឯកសារ សិក្សាជួសជុលថ្ម និងចាប់ផ្តើមរើទាំងស្រុង ដោយរើពីលើមកក្រោម ឈប់ត្រឹមរួតកម្រាល។ ដំណាក់កាលទី២ គឺនៅឆ្នាំ២០២០ ក្រុមការងារនឹងធ្វើការកំណាយសិក្សាពង្រឹងគ្រឹះ និងធ្វើការផ្គុំឡើងវិញ។
ទាក់ទងនឹងការពិនិត្យគុណភាពថ្មវិញ លោកអាត សុខចាន់ មន្ត្រីបច្ចេកទេស ពីក្រុមអភិរក្សជួសជុលចម្លាក់នៃអាជ្ញាធរជាតិអប្សរា បានឱ្យដឹងថា ក្រុមការងារបានសិក្សាអំពីក្បាច់ចម្លាក់ថ្មផ្នែកខាងក្រៅ និងផ្តោតសំខាន់លើការខូចខាតនៃថ្ម បានរកឃើញបញ្ហាប្រឈមចំពោះថ្មដូចជា ភាពពុកផុយ ការរបកផ្ទៃខាងក្រៅ ការប្រេះជាស្នាមតូចៗ និងការខូចខាតដោយស្លែ ។
ពេលនេះក្រុមការងារក៏កំពុងរកមូលហេតុបន្ថែមទៀតលើបញ្ហាថ្ម ដើម្បីឈានដល់ការជួសជុល ដោយការសម្អាត និងការព្យាបាល មុននឹងយកថ្មនេះទៅផ្គុំឡើងវិញ ដើម្បីធានាបានថា ថ្មនឹងមានសុខភាពល្អ ធ្វើឱ្យសំណង់ប្រាសាទរឹងមាំបានយូរអង្វែងតទៅទៀត ។
ប្រាសាទតានៃកសាងឡើងនាចុងស.វ.ទី១២ ក្នុងរជ្ជកាលព្រះបាទជ័យវរ្ម័នទី៧ ឧទ្ទិសដល់ព្រះពុទ្ធសាសនា ។ ឆ្លងកាត់អាយុកាល និងឥទ្ធិពលនៃអាកាសធាតុរាប់រយឆ្នាំ បានធ្វើឱ្យសំណង់ខ្លះនៃប្រាសាទរងនូវការខូចខាត និងដួលរលំ ដែលត្រូវការជួសជុលដើម្បីសង្គ្រោះឱ្យផុតពីហានិភ័យ ៕ (កែសម្រួលដោយ ៖ បុប្ផា)
ចែករំលែកព័តមាននេះ