កាលពីថ្ងៃទី២១-២២ ខែតុលា ឆ្នាំ២០២៥ នេះ មន្ត្រីសាខា ក.ប.ប.សាខាខេត្តតាកែវ ខេត្តកំពត ខេត្តកំពង់ធំ ខេត្តកំពត ខេត្តកំពង់ឆ្នាំង…
កាលពីថ្ងៃទី២១-២២ ខែតុលា ឆ្នាំ២០២៥ នេះ មន្ត្រីសាខា ក.ប.ប.សាខាខេត្តតាកែវ ខេត្តកំពត ខេត្តកំពង់ធំ ខេត្តកំពត ខេត្តកំពង់ឆ្នាំង ខេត្តស្វាយរៀង ខេត្តកំពង់ចាម និងខេត្តត្បូងឃ្មុំ បានសហការជាមួយមន្ត្រីនៃមន្ទីរពាណិជ្ជកម្មខេត្ត បន្តចុះត្រួតពិនិត្យគុណភាព សុវត្ថិភាពម្ហូបអាហារ នៅតាមផ្សាររដ្ឋ ផ្សារឯកជន តូបលក់ទំនិញ ម៉ាត សរុបចំនួន ២៤ទីតាំង ។ នេះបើយោងតាមអគ្គ.ការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ CCF ។
ការចុះត្រួតពិនិត្យនេះ ក្នុងគោលបំណងធានាការពារនូវសុខុមាលភាពជូនអ្នកប្រើប្រាស់ ទប់ស្កាត់ផលិតផលទំនិញមិនសមស្រប ពិសេស ផលិតផលម្ហូបអាហារដែលមិនអនុលោមតាមលក្ខខណ្ឌតម្រូវផ្នែកបច្ចេកទេស ឬមានកត្តាជាគ្រោះណាមួយ ធ្វើឱ្យប៉ះពាល់សុខភាពអ្នកប្រើប្រាស់ជាយថាហេតុ។
ជាមួយគ្នានោះផងដែរ មន្ត្រីជំនាញក៏បានយកចិត្តទុកដាក់បំផុតក្នុងការបន្តចុះពិនិត្យ ស្រាវជ្រាវស្វែង ដើម្បីរកផលិតផលប្រេងឆាមិនមានអនុលោមផ្នែកគុណភាព និងក្លែងក្លាយ ដែលបានប្រកាសដោយអាជ្ញាធរសុវត្ថិភាពម្ហូបអាហារវៀតណាម។ សម្រាប់សកម្មភាពនៃប្រតិបត្តិការនេះផងដែរ មន្ត្រីជំនាញបានចុះត្រួតពិនិត្យ ស្រាវជ្រាវ តាមបណ្ដាផ្សាររដ្ឋ ផ្សារឯកជន តូបលក់ទំនិញ ម៉ាត នៅក្នុងបណ្តាខេត្តគោលដៅខាងលើ ដើម្បីបង្ការ ការពារសុខភាព និងផលប្រយោជន៍របស់អ្នកប្រើប្រាស់ ។
ជាលទ្ធផល មន្ត្រី ក.ប.ប. មិនទាន់បានរកឃើញផលិតផលប្រេងឆាក្លែងក្លាយទាំង៥ម៉ាក ដែលប្រកាសដោយអាជ្ញាធរសុវត្ថិភាពម្ហូបអាហារវៀតណាមនៅឡើយ ។ ទន្ទឹមនឹងនេះ អគ្គនាយកដ្ឋាន ក.ប.ប. នៃក្រសួងពាណិជ្ជកម្ម សូមអំពាវនាវដល់ប្រជាពលរដ្ឋបង្កើនការប្រុងប្រយ័ត្ន កុំទិញ លក់ ឬប្រើប្រាស់ផលិតផលប្រេងឆាដែលមានម៉ាកខាងលើ និងក្នុងករណីពើបប្រទះ សូមធ្វើការទំនាក់ទំនងតាមរយៈ CCF Complaint App, លេខទូរសព្ទ ១២៦៦ ដើម្បីមានវិធានការតាមនីតិវិធី ឱ្យបានទាន់ពេលវេលា។
មន្ត្រីជំនាញ ក.ប.ប. នឹងបន្តសហការជាមួយមន្ត្រីនៃអង្គភាពពាក់ព័ន្ធ បន្តស៊ើបអង្កេត ស្រាវជ្រាវស្វែងរក និងមានវិធានការយ៉ាងម៉ឺងម៉ាត់ចំពោះផលិតផលក្លែងក្លាយទាំងនេះ ដើម្បីការពារសុខភាព និងផលប្រយោជន៍អ្នកប្រើប្រាស់ ។
ចែករំលែកព័តមាននេះ