ខេត្តកំពង់ឆ្នាំង ៖ ធនាគារអភិវឌ្ឍន៍អាស៊ី (ADB), សហព័ន្ធកីឡាបាល់ទាត់អាស៊ី (AFC), អង្គការសហប្រជាជាតិស្តីពីកម្មវិធីមេរោគអេដស៍ បានយល់ព្រមធ្វើការរួមគ្នានៅលើកម្មវិធីការការពារមេរោគអេដស៍ ដោយយកកីឡាបាល់ទាត់ជាមូលដ្ឋានដើម្បីផ្សព្វផ្សាយ និងជួយដោះស្រាយហានិភ័យនៃការឆ្លងេមរោគអេដស៍ ក្នុងចំណោមមនុស្សវ័យក្មេងនៅក្នុងប្រទេសចំនួន៥ ក្នុងតំបន់អាស៊ីអាគ្នេយ៍រួមមាន កម្ពុជា, ម៉ាឡេស៊ី, មីយ៉ាន់ម៉ា, ថៃ និងហ្វីលីពីន ។
គម្រោងនេះអនុវត្តនៅក្នុងប្រទេសកម្ពុជា ដែលនឹងរួមចំណែកដល់ការរីកចម្រើនច្រើនជាងមុនក្នុងការកាត់បន្ថយការឆ្លងនៃមេរោគអេដស៍។ ក្រៅពីនេះ ក៏បញ្ឈប់ការមើលងាយ និងការរើសអើងចំពោះអ្នកផ្ទុកមេរោគអេដស៍ និងពង្រីកការយល់ដឹងអំពីជំងឺអេដស៍នៅក្នុងប្រទេសកម្ពុជាផងដែរ ។ ជាក់ស្តែង កាលពីរសៀលថ្ងៃទី២ មេសា ឆ្នាំ២០១៤ ដោយមានការចូលរួមសហប្រតិបត្តិការ និងគាំទ្រពីអង្គការសហប្រជាជាតិស្តីពីកម្មវិធីមេរោគអេដស៍នៅកម្ពុជា ដែលផ្តល់នូវការគាំទ្រផ្នែកខ្លឹមសារការផ្សព្វផ្សាយ អង្គការសលត៍, ក្លិបបាល់ទាត់ភ្នំពេញក្រោន, សហព័ន្ធកីឡាបាល់ទាត់កម្ពុជា, ក្រសួងអប់រំ យុវជន និងកីឡា និងអង្គការនារីកម្ពុជាដើម្បីសន្តិភាព បានរៀបចំកម្មវិធីប្រកួតបាល់ទាត់ជាលក្ខណៈមិត្តភាពរវាងគ្រូបង្វឹក និងអាជ្ញាកណ្តាល នៅទីលានបាល់ទាត់ក្រុងកំពង់ឆ្នាំង ដើម្បីផ្សព្វផ្សាយពីជំងឺអេដស៍ ការបង្ការ និងពិនិត្យឈាម ព្រមទាំងរបៀបប្រើប្រាស់ស្រោមអនាម័យដល់កីឡាករ និងប្រជាជនក្នុងតំបន់ផងដែរ ។
កញ្ញាសូដានេ អ្នកសម្របសម្រួលផ្នែកផ្សព្វផ្សាយប្រចាំប្រទេសកម្ពុជាបានឱ្យដឹងថា សម្រាប់ព្រឹត្តិការណ៍នេះ យើងរៀបចំឡើងក្នុងគោលបំណងសំខាន់ៗចំនួន៥ គឺៈ បង្កើន និងពង្រីកការយល់ដឹងពីមេរោគអេដស៍ និងជំងឺអេដស៍ ប្រឆាំងនឹងការរើសអើងលើអ្នកផ្ទុកមេរោគអេដស៍ ។ ការទប់ស្កាត់ការឆ្លងមេរោគអេដស៍ ជាពិសេសក្នុងចំណោមយុវជន ដោយប្រើអំណាចនៃកីឡាបាល់ទាត់នៅប្រទេសកម្ពុជាជាយុទ្ធសាស្ត្រនៃការផ្សាយ ។ បង្កើនកិច្ចខិតខំសហការជាមួយបណ្តាញសង្គមស៊ីវិល អង្គការ និងបណ្តាញយុវជនដើម្បីឆ្លើយតប និងពង្រីកអានុភាពនៃការផ្សព្វផ្សាយប្រយុទ្ធប្រឆាំងនឹងការរីករាលដាលនៃជំងឺអេដស៍។ លើកទឹកចិត្តកីឡាករ-កីឡាការិនីឱ្យទៅធ្វើតេស្តឈាម ប្រសិនបើធ្លាប់ធ្វើទង្វើអ្វីមួយដែលអាចឈានទៅដល់ការឆ្លងនៃមេរោគអេដស៍ ។
ផ្តល់ចំណេះដឹងដល់យុវជនពីការការពារខ្លួនកុំឱ្យឆ្លងមេរោគអេដស៍ ។ លោកសេម ជាគ្រូបង្វឹករបស់ក្លិបបាល់ទាត់ភ្នំពេញក្រោន ដែលបានដឹកនាំក្រុមកីឡារបស់ខ្លួនទៅចូលរួម និងធ្វើជាអាជ្ញាកណ្តាលសម្រាប់ការប្រកួតនាពេលនោះបានប្រាប់ឱ្យដឹងថា ថ្ងៃនេះយើងមានកិត្តិយសណាស់ ដោយមានការចូលរួមពីក្រុមអាជ្ញាកណ្តាល ព្រមទាំងគ្រូបង្វឹកមកពីគ្រប់ប្រភេទកីឡា ដូចជាបាល់ទះ បាល់បោះ បាល់ទាត់ និងអត្តពលកម្ម បានមកចូលរួមព្រឹត្តិការណ៍ប្រកួតបាល់ទាត់ជាលក្ខណៈមិត្តភាពក្នុងខេត្តកំពង់ឆ្នាំង ដែលយើងបានរៀបចំដើម្បីផ្សព្វផ្សាយអំពីជំងឺអេដស៍ ហើយជាពិសេសនោះគឺយើងចង់ផ្សព្វផ្សាយដល់យុវជនតាមរយៈបាល់ទាត់នេះ ។ លោកបន្តថា ចំពោះការប្រកួតជាលក្ខណៈមិត្តភាពនេះឃើញថា ប្រព្រឹត្តទៅបានល្អដោយមានការយកចិត្តទុកដាក់ពីគ្រូបង្វឹក និងអាជ្ញាកណ្តាល ជាពិសេសនោះមានការទស្សនា និងការគាំទ្រពីប្រជាពលរដ្ឋដែលរស់នៅតំបន់នេះយ៉ាងច្រើនកុះករ ។
លោកសេម បានឱ្យដឹងទៀតថា ក្លិបកីឡាបាល់ទាត់ភ្នំពេញក្រោន និងអង្គការសលត៍ ដែលរូបលោកជាប្រធាននោះ បានសហការជាមួយសហព័ន្ធកីឡាបាល់ទាត់អាស៊ី និងប្រទេសដែលមានអ្នកផ្ទុកមេរោគអេដស៍ច្រើនចំនួន៥ ធ្វើការណែនាំអប់រំចង់ឱ្យប្រជាជនកម្ពុជាយល់បន្ថែមទៀតពីបញ្ហាជំងឺអេដស៍នេះ ហើយលោកសង្ឃឹមថា នឹងមានព្រឹត្តិការណ៍នេះជារៀងរាល់ឆ្នាំបន្តទៀត ៕
ចែករំលែកព័តមាននេះ