ខេត្តបន្ទាយមានជ័យ ឧត្តរមានជ័យ ប៉ៃលិន កំពង់ចាម ៖ លំនៅឋានប្រជាពលរដ្ឋរាប់ទាំងកុដិព្រះសង្ឃផង មានចំនួនរាប់រយខ្នង ខ្លះបានដួលរលំ ខ្លះត្រូវបើុងដំបូល ក្រៅពីនេះ ខ្លោងទ្វារ អង់តែនវិទ្យុ និងដើមឈើជាផលដំណាំ ត្រូវបានបំផ្លាញដោយកម្លាំងខ្យល់កន្ត្រាក់ពេលភ្លៀងចាប់ផ្តើមធ្លាក់កក់ខែជាបន្តបន្ទាប់ ។
ខេត្តបន្ទាយមានជ័យ ឧត្តរមានជ័យ ប៉ៃលិន កំពង់ចាម ៖ លំនៅឋានប្រជាពលរដ្ឋរាប់ទាំងកុដិព្រះសង្ឃផង មានចំនួនរាប់រយខ្នង ខ្លះបានដួលរលំ ខ្លះត្រូវបើុងដំបូល ក្រៅពីនេះ ខ្លោងទ្វារ អង់តែនវិទ្យុ និងដើមឈើជាផលដំណាំ ត្រូវបានបំផ្លាញដោយកម្លាំងខ្យល់កន្ត្រាក់ពេលភ្លៀងចាប់ផ្តើមធ្លាក់កក់ខែជាបន្តបន្ទាប់ ។
ជាមួយគ្នានេះ បាតុភូតរន្ទះក៏បានប្រល័យជីវិតមនុស្ស២នាក់ ក្រៅពីនេះ ក៏មានអ្នករងរបួសច្រើននាក់ដែរ ។ ខាងក្រោមនេះគឺជាសេចក្តីរាយការណ៍ពីភ្នាក់ងារកោះសន្តិភាពនៅតាមខេត្តមួយចំនួនដែលបានជួបនឹងគ្រោះមហន្តរាយនេះ ។
ព្យុះភ្លៀង
ខេត្ដបន្ទាយមានជ័យ ៖ ភ្លៀងបានបង្អុរធ្លាក់យ៉ាងខ្លាំងលាយឡំដោយខ្យល់កន្ដ្រាក់គ្របដណ្ដប់លើស្រុក-ក្រុងចំនួន៣ក្នុងខេត្ដ កាលពីរសៀលនិងយប់ថ្ងៃទី១ មេសា ធ្វើឱ្យលំនៅឋានពលរដ្ឋចំនួន២៥២គ្រួសាររងផលប៉ះពាល់យ៉ាងធ្ងន់ធ្ងរ ក្នុងនោះ៣៦ខ្នងបានដួលរលំ មេគោ១ក្បាលងាប់ដោយរន្ទះបាញ់ និងម៉ូតូចំនួន៣គ្រឿងខូចខាត ។
ស្រុក-ក្រុងដែលរងផលប៉ះពាល់ពីឥទ្ធិពលភ្លៀង និងខ្យល់កន្ដ្រាក់មានស្រុកមង្គលបុរី ស្រុកម៉ាឡៃ និងក្រុងប៉ោយប៉ែត ។ សម្រាប់ផលប៉ះពាល់នៅក្រុងប៉ោយប៉ែតកើតឡើងចាប់ពីម៉ោង៥ល្ងាចរហូតដល់ម៉ោងជិត៨យប់ សូម្បីតែចរន្ដអគ្គិសនីក៏ត្រូវបានកាត់ផ្ដាច់ជិត១ម៉ោងដែរ ដោយសារខ្យល់និងភ្លៀងធ្លាក់ខ្លាំង ។ សង្កាត់ចំនួន៣ក្នុងក្រុងប៉ោយប៉ែត រួមមានសង្កាត់ប៉ោយប៉ែត រងផលប៉ះពាល់ផ្ទះសរុប១៤ខ្នង ក្នុងនោះដួលរលំ២ខ្នង និងប៉ើងដំបូល១២ខ្នង អង់តែនវិទ្យុ FM 98.3MHz មួយក៏បានដួលរលំសង្កត់លើផ្ទះ២ខ្នង ។
សង្កាត់ផ្សារកណ្ដាលរងការខូចខាតផ្ទះ១៤៧ខ្នង ក្នុងនោះរងផលប៉ះពាល់ធ្ងន់១៧ខ្នង និងប៉ើងដំបូល១៣០ខ្នង ។ ស្រ្ដីចំណាស់ម្នាក់ឈ្មោះ ម៉ាសឺត អាយុ៦៨ឆ្នាំ រងរបួសស្រាល ដោយមុតស័ង្កសីធ្លាក់ចំ ។ ចំណែកសង្កាត់និមិត្ដវិញ រងផលប៉ះពាល់កើតមានលើភូមិរស្មីសាមគ្គី សរុប៥៨ខ្នង ផ្ទះខូចខាតធ្ងន់ធ្ងរ៩ខ្នង អគារសិក្សា២ខ្នង ប៉ើងអស់ក្បឿងប្រមាណ៥២សន្លឹក កុដិព្រះសង្ឃវត្ដរស្មីសាមគ្គីសុធារាម ប៉ើងដំបូលចំនួន៣កុដិ ដំណាំចេក ដូង ស្វាយ បាក់ដើមនិងជ្រុះផ្លែរាយប៉ាយក្នុងនោះបុរសម្នាក់ក៏បានស្លាប់ដែរ ។ បុរសចំណាស់ដែលស្លាប់ឈ្មោះ ប៊ុន ផុន អាយុ ៦៨ឆ្នាំ ជាកសិករ មានទីលំនៅក្នុងភូមិកើតហេតុ គឺភូមិរស្មីសាមគ្គី ។
ជុំវិញការស្លាប់របស់បុរសចំណាស់នេះត្រូវបានលោក គង់ ស៊ីវិន ជាមេភូមិប្រាប់ថា ដោយសារបុរសនេះកើតជំងឺក្លនចុក ហើយពេលភ្លៀងនិងខ្យល់ខ្លាំង គាត់ខ្លាចផ្ទះគាត់ដួលរលំសើមអីវ៉ាន់ក្នុងផ្ទះ ក៏ខំប្រឹងឈរទប់ជញ្ជាំងទាំងឈឺ ថែមទាំងហាលភ្លៀងផងដែរ ធ្វើឱ្យអាការៈជំងឺរើឡើងចុកខ្លាំង ហើយពេលបញ្ជូនមិនទាន់ដល់មន្ទីរពេទ្យមង្គលបុរីផងក៏បានស្លាប់ទៅ ។ សម្រាប់ផលប៉ះពាល់នៅស្រុកម៉ាឡៃត្រូវបានលោក សៅ ប៊ុន អធិការនគរបាលស្រុកប្រាប់ថា ផ្ទះដែលរងផលប៉ះពាល់ពីឥទ្ធិពលភ្លៀងនិងខ្យល់នេះមាន៩គ្រួសារក្នុងនោះធ្ងន់៤ខ្នងផ្ទះ ។ ដោយឡែក ក្នុងស្រុកមង្គលបុរី បើតាមប្រភពព័ត៌មានពីសមត្ថកិច្ចបានឱ្យដឹងថា ផលប៉ះពាល់ពីភ្លៀងនិងខ្យល់កន្ដ្រាក់មាន២៤ខ្នងផ្ទះ ក្នុងនោះធ្ងន់៤ខ្នង ដោយក្នុងឃុំស្រះរាំងប៉ើងដំបូល១ខ្នង នៅឃុំអូរប្រាសាទដួលរលំ១ខ្នងប៉ើងដំបូល១ខ្នង នៅឃុំតាឡំ មេគោ១ក្បាលត្រូវរន្ទះបាញ់ងាប់ ។ ក្នុងឃុំរហាត់ទឹក ប៉ះពាល់១៦ខ្នង ផ្ទះ១៣ខ្នងរបើកដំបូល និង៣ខ្នងដួលរលំ ហើយម៉ូតូ៣គ្រឿងរងការខូចខាតដោយសារការដួលរលំផ្ទះសង្កត់ដែរ ។
ក្រៅពីស្រុក-ក្រុងទាំង៣ តាមព័ត៌មានចុងក្រោយបានឱ្យដឹងថា នៅស្រុកព្រះនេត្រព្រះក៏មានផ្ទះ១ខ្នងរងផលប៉ះពាល់ដែរ ដោយសារភ្លៀងនិងខ្យល់ កាលពីរសៀលថ្ងៃទី១ មេសា ។ ស្រុករងគ្រោះដោយធម្មជាតិទាំង៣ខាងលើពុំទាន់មានព័ត៌មានពីការនាំយកអំណោយទៅចែកជូនជនរងគ្រោះនៅឡើយទេ ប៉ុន្ដែសម្រាប់ក្រុងប៉ោយប៉ែត នៅសាលាសង្កាត់ផ្សារកណ្ដាល អាជ្ញាធរក្រុងប៉ោយប៉ែត និងសង្កាត់បាននាំយកអំណោយបន្ទាន់ទៅចែកជូនប្រជាពលរដ្ឋ៤០គ្រួសារ ដោយក្នុងមួយគ្រួសារៗទទួលបាន មី១កេស និងសំពត់តង់១ ក្នុងនោះអាជ្ញាធរកំពុងរកអំណោយចែកជូនជនរងគ្រោះផ្សេងៗទៀត៕
ភ្លៀងកក់ខែមួយមេធំលាយឡំទៅដោយខ្យល់ព្យុះ រលំនិងបើុងដំបូលផ្ទះ6ខ្នង
ខេត្តឧត្តរមានជ័យ ៖ កាលពីវេលាម៉ោង៣និង៣០នាទីរសៀលថ្ងៃទី១ មេសា កន្លងទៅ មានភ្លៀងធ្លាក់មួយមេធំលាយឡំទៅដោយខ្យល់ព្យុះបក់បោកយ៉ាងខ្លាំង បណ្តាលឱ្យលំនៅឋានប្រជាពលរដ្ឋដួលរលំ និងបើុងដំបូលផ្ទះសរុបអស់ចំនួន៦ខ្នង និងមនុស្សរងរបួសស្រាលចំនួន២នាក់ ។ ហេតុការណ៍នេះកើតឡើងនៅក្នុងភូមិរំចេក ឃុំអន្លង់វែង ស្រុកអន្លង់វែង ។
លោកទៀង លីវ អនុប្រធានភូមិរំចេកឱ្យដឹងថា នៅរសៀលថ្ងៃទី១ មេសានោះ ស្រាប់តែមានភ្លៀងធ្លាក់កក់ខែដើមឆ្នាំមួយមេយ៉ាងធំលាយឡំទៅដោយខ្យល់ព្យុះកំបុតត្បូង (ខ្យល់កន្ត្រាក់) បក់បោកមកលើលំនៅឋានប្រជាពលរដ្ឋបណ្តាលឱ្យដួលរលំផ្ទះខូចខាតទាំងស្រុងចំនួន៣ខ្នង ក្នុងនោះមានកុដិព្រះសង្ឃចំនួន១ខ្នងផងដែរ ។ លើសពីនោះ ផ្ទះចំនួន៣ខ្នងទៀតបានបើុងដំបូលអស់គ្មានសល់ ចំណែកព្រះសង្ឃ១អង្គ និងក្មេងម្នាក់រងរបួសស្រាល ។ ក្រោយកើតហេតុ លោកអនុប្រធានភូមិបានធ្វើរបាយការណ៍ដាក់ជូនទៅអាជ្ញាធរឃុំ និងស្រុកដើម្បីស្នើសុំឱ្យសាខាកាកបាទក្រហមកម្ពុជាខេត្ត ជួយឧបត្ថម្ភដល់ក្រុមគ្រួសាររងគ្រោះដោយគ្រោះធម្មជាតិនេះផងដែរ ៕
រន្ទះបាញ់ស្លាប់បុរសម្នាក់មុនពេលភ្លៀងធ្លាក់ ផ្ទះ1ខ្នងត្រូវខ្យល់កន្ត្រាក់ធ្លាក់ពីជើងតាង និងរបួសស្ត្រីម្នាក់
ខេត្តប៉ៃលិន ៖ បុរសម្នាក់បានស្លាប់ភ្លាមៗនៅលើគោយន្តច្នៃក្នុងស្តង់ដំឡូងមីរបស់ថៅកែម្នាក់ឈ្មោះម៉ាប់ ខណៈជនរងគ្រោះ និងកម្មករផ្សេងទៀតកំពុងស៊ីឈ្នួលកាយដំឡូងមីចេញពីទ្រុងគោយន្តច្នៃ ។ ពេលនោះមេឃស្រអាប់ ពពកពណ៌ខ្មៅរកកល់ធ្លាក់ភ្លៀង ក៏មានផ្លេកបន្ទោរចាំងមកចំជនរងគ្រោះ រួចត្រូវរន្ទះបាញ់ចំទូរស័ព្ទដែលដាក់នៅក្នុងហោប៉ៅខាងស្តាំបណ្តាលឱ្យខូចខ្ទេច រងរបួសខ្លោចចង្កេះ និងហូរឈាមចេញពីត្រចៀកស្លាប់ភ្លាមមួយរំពេច ។
ក្រោយពីរន្ទះបាញ់ភ្លាម មេឃក៏ចាប់ផ្តើមធ្លាក់ភ្លៀងលាយឡំទៅដោយខ្យល់កន្ត្រាក់បោកបក់យ៉ាងខ្លាំង ហើយផ្ទះប្រជាពលរដ្ឋមួយខ្នងត្រូវខ្យល់កន្ត្រាក់ធ្លាក់ពីលើជើងតាង បណ្តាលឱ្យស្ត្រីម្នាក់ដែលកំពុងជ្រកនៅក្រោមផ្ទះនោះរងរបួសស្រាល ។ ហេតុការណ៍នេះកើតឡើងនៅវេលាម៉ោង២និង៣០នាទីរសៀលថ្ងៃទី១ មេសា ស្ថិតនៅក្នុងភូមិទំនប់ ឃុំស្ទឹងត្រង់ ស្រុកសាលាក្រៅ ។ ជនរងគ្រោះដែលត្រូវរន្ទះបាញ់ស្លាប់ឈ្មោះ ផែង ធី អាយុ៣៥ឆ្នាំ ជាកម្មករ មានស្រុកកំណើតនៅភូមិអូររំចេក ឃុំស្នាមព្រះ ស្រុកបាកាន ខេត្តពោធិ៍សាត់ បច្ចុប្បន្នរស់នៅក្នុងភូមិកូនដំរី ឃុំស្ទឹងត្រង់ ស្រុកសាលាក្រៅ មានប្រពន្ធឈ្មោះ ធី ណា អាយុ២៩ឆ្នាំ និងមានកូន៤នាក់ (ប្រុស២នាក់ ស្រី២នាក់) ។ ចំណែកគ្រួសារដែលត្រូវខ្យល់កន្ត្រាក់បោកចំផ្ទះបើុងធ្លាក់ពីលើជើងតាងឈ្មោះ ជួន ឡា ភេទប្រុស អាយុ២៧ឆ្នាំ ជាកសិករ មានប្រពន្ធឈ្មោះ ស៊ុន សុភា អាយុ២៦ឆ្នាំ រងរបួសស្រាល និងមានកូន២នាក់ (ប្រុសម្នាក់ ស្រីម្នាក់) រស់នៅភូមិកើតហេតុខាងលើ ។
ប្រភពព័ត៌មានពីលោកទូច តឹក អាយុ៥៩ឆ្នាំ ជាអនុប្រធានភូមិទំនប់ រៀបរាប់ឱ្យដឹងថា មានករណីរន្ទះបាញ់បុរសម្នាក់ស្លាប់នៅក្នុងស្តង់ដំឡូងមីរបស់ឈ្មោះម៉ាប់ ខណៈជនរងគ្រោះ និងកម្មករក្មេង ចាស់ ប្រុសស្រីចំនួន៤ទៅ៥នាក់ផ្សេងទៀតកំពុងកាយដំឡូងមីទម្លាក់ពីលើគោយន្តច្នៃ ។ ខណៈពេលរន្ទះបាញ់ជនរងគ្រោះស្លាប់នេះ អត់ទាន់មានភ្លៀងធ្លាក់នៅឡើយទេ ដោយគ្រាន់តែឃើញមេឃស្រអាប់ ហើយមានពពកខ្មៅ១ដុំចំពីលើ ស្រាប់តែជនរងគ្រោះដែលកំពុងឈរកាយដំឡូងមីជាមួយប្រពន្ធ និងកម្មករមួយចំនួនទៀត ដោយអ្នកខ្លះឈរនៅលើគោយន្ត អ្នកខ្លះនៅខាងក្រោម ក៏ត្រូវរន្ទះបាញ់ជនរងគ្រោះដែលឈរនៅខាងលើគោយន្ត បណ្តាលឱ្យរយះខោ ខ្លោចចង្កេះ ព្រមទាំងហូរឈាមតាមរន្ធត្រចៀកស្លាប់នៅលើគោយន្តច្នៃតែម្តង ។ ក្រោយពីរន្ទះបាញ់ជនរងគ្រោះរួចមក ក៏មានភ្លៀងធ្លាក់មួយមេយ៉ាងធំ ។
លោកអនុប្រធានភូមិបន្តថា ក្រោយមកបន្តិចស្រាប់តែមានភ្លៀង និងខ្យល់កន្ត្រាក់បោកបក់យ៉ាងខ្លាំងបណ្តាលឱ្យបាក់ដើមឈើអស់ចំនួន៥ដើម និងបើុងផ្ទះប្រជាពលរដ្ឋអស់១ខ្នងធ្លាក់ពីលើជើងតាងរងការខូចខាតបាក់រនូត បាក់រត បាក់ផ្លាន រយះស័ង្កសី បាក់ជើងតាងអស់ចំនួន៩ បែកពាងអស់១ និងបណ្តាលឱ្យស្ត្រីជាម្ចាស់ផ្ទះដែលកំពុងជ្រកនៅក្រោមផ្ទះរងរបួសស្រាល ។ ប្រភពបន្តទៀតថា ក្រោយពេលកើតហេតុ សពជនរងគ្រោះត្រូវបានក្រុមគ្រួសារជួលរថយន្តដឹកយកទៅកាន់ភូមិកូនដំរី ឃុំស្ទឹងត្រង់ ដើម្បីធ្វើបុណ្យតាមប្រពៃណី ។ នៅព្រឹកថ្ងៃទី២ មេសា ផ្ទះប្រជាពលរដ្ឋដែលត្រូវខ្យល់បើុងធ្លាក់ពីលើជើងតាង ត្រូវម្ចាស់រុះរើចេញដើម្បីសាងសង់ជាថ្មីឡើងវិញ ៕
ភ្លៀងកក់ខែមួយមេធំរលំផ្ទះ35ខ្នង ប៉ើងដំបូល69ខ្នង រន្ទះបាញ់ស្លាប់ម្នាក់និងរបួស4នាក់
ខេត្ដកំពង់ចាម ៖ កាលពីរសៀលថ្ងៃទី១ មេសា ភ្លៀងកក់ខែមួយមេធំបានស្រោចស្រពលើក្រុងកំពង់ចាម ស្រុកកោះសូទិន ស្រុកព្រៃឈរ និងស្រុកកងមាស លាយឡំទៅដោយខ្យល់កន្ដ្រាក់ និងរន្ទះដែលជាបាតុភូតធម្មជាតិគួរឱ្យភ័យខ្លាច ជាហេតុធ្វើឱ្យរលំដើមឈើ រលំផ្ទះអស់ចំនួន៣៥ខ្នង របើកដំបូល៦៩ខ្នង រន្ទះបាញ់ស្លាប់ម្នាក់ សន្លប់ម្នាក់និងរងរបួស៣នាក់ ត្រូវនាំមកសង្គ្រោះនៅមន្ទីរពេទ្យជាបន្ដបន្ទាប់ ។
លោកវរសេនីយ៍ត្រី ម៉ា ចិន្ដា អធិការនគរបាលស្រុកកោះសូទិនបានឱ្យដឹងថា បុរសឈ្មោះ លី ចាន់ហេង អាយុ ៥៧ឆ្នាំ រស់នៅភូមិទ្វារស្រុក ឃុំព្នៅទី២ ស្រុកស៊ីធរកណ្ដាល ខេត្ដព្រៃវែង បានមកសែនផ្នូរដូនតានៅភូមិទី១៣ ឃុំព្រែកតានង់ ស្រុកកោះសូទិន នៅព្រឹកថ្ងៃទី១ មេសា រួមជាមួយនឹងក្រុមគ្រួសារជាច្រើននាក់ ។ លុះពេលរសៀលក៏ជិះម៉ូតូត្រឡប់ទៅផ្ទះវិញជាមួយកូនប្រុសឈ្មោះ លី នារី អាយុ ២៧ឆ្នាំ ។ ខណៈពេលទៅដល់ភូមិទី១៣ ស្រាប់តែមេឃបង្អុរភ្លៀងយ៉ាងខ្លាំង រំពេចនោះរន្ទះក៏បាញ់មកលើបុរសចំណាស់រូបនេះបណ្ដាលឱ្យស្លាប់ភ្លាមៗ ចំណែកកូនប្រុសសន្លប់ ។ ក្រៅពីនេះ ផ្ទះអ្នកភូមិទី១៣ ឃុំព្រែកតានង់ ត្រូវខ្យល់ព្យុះបំប៉ើងឱ្យរលំរាបដល់ដីចំនួន២ខ្នង ដែលមានម្ចាស់ឈ្មោះ ផាន់ ឆេង ភេទប្រុស អាយុ ៤០ឆ្នាំ មានទំហំ៤ម៉ែត្រគុណនឹង៥ម៉ែត្រ និងឈ្មោះ បឹង ញាញ់ ភេទប្រុស អាយុ ៤៦ឆ្នាំ ដែលមានទំហំ៥ម៉ែត្រគុណនឹង៧ម៉ែត្រ ធ្វើពីឈើ ។ ចំណែកផ្ទះរបស់ឈ្មោះ គុយ ធី ភេទប្រុស អាយុ ៥០ឆ្នាំ មានទំហំ៧ម៉ែត្រគុណនឹង៨ម៉ែត្រ ត្រូវខ្យល់បំប៉ើងដំបូលផ្នែកខាងក្រោយអស់តែម្ដង ។
លោក មឿន ផា អភិបាលស្រុកកងមាស ឱ្យដឹងថា នៅវេលាម៉ោង៤និង៤០នាទីរសៀលថ្ងៃទី១ មេសា មេឃបានបង្អុរភ្លៀងយ៉ាងខ្លាំងមកលើភូមិទួលវិហារ ឃុំរាយប៉ាយ ឃុំពាមជីកង និងឃុំអង្គរបាន ស្រុកកងមាស ជាហេតុបណ្ដាលឱ្យរលំផ្ទះអស់ចំនួន៣៣ខ្នង ធ្វើពីឈើប្រក់ស្លឹក និងរបើកដំបូលចំនួន៦៥ខ្នង បណ្ដាលឱ្យរងរបួសបាក់ជើងស្រ្ដីម្នាក់ឈ្មោះ ទូច សារឿន អាយុ ៣៥ឆ្នាំ និងរបួស២នាក់ ។ នាព្រឹកថ្ងៃទី២ មេសា រូបលោកបានចុះទៅផ្ទាល់ដើម្បីពិនិត្យមើលជាក់ស្ដែងធ្វើរបាយការណ៍ទៅកាកបាទក្រហមខេត្ដ ត្រៀមនឹងយកអំណោយទៅចែកជូនដល់ប្រជាជនដែលរងគ្រោះនេះ ។
លោក សៀង សំណាង នាយកសាលាបឋមសិក្សា-អនុវិទ្យាល័យទួលថ្ម ស្ថិតនៅសង្កាត់វាលវង់ ក្រុងកំពង់ចាម ប្រាប់ឱ្យដឹងថា នៅវេលាម៉ោងជាង៤រសៀលថ្ងៃទី១ មេសា សិស្សសាលាកំពុងរត់លេងនៅក្រោមដើមជ្រៃធំ១ ដែលមានអាយុក្រោម១០០ឆ្នាំ ខណៈពេលនោះខ្យល់ព្យុះបោកបក់មកយ៉ាងខ្លាំងជាហេតុធ្វើឱ្យដើមជ្រៃរលំបន្ដិចម្ដងៗ សំណាងក្មេងៗនាំគ្នារត់គេចចេញទាន់ បើពុំនោះទេ អាចនឹងស្លាប់យ៉ាងតិចក៏៥នាក់ដែរ ។
ចំណែកលោកវរសេនីយ៍ត្រី កែវ ស៊ាងហ៊ន់ អធិការនគរបាលស្រុកព្រៃឈរ ប្រាប់ឱ្យដឹងថា នៅវេលាម៉ោង៥និង១០នាទីល្ងាចថ្ងៃទី១ មេសា ភ្លៀងធ្លាក់មកជាខ្លាំងលើភូមិល្វា ឃុំល្វា ស្រុកព្រៃឈរ ជាហេតុបណ្ដាលឱ្យរបើកដំបូលផ្ទះ៣ខ្នង ក្នុងនោះផ្ទះរបស់ឈ្មោះ សេង ឃុន ភេទប្រុស អាយុ ៣៦ឆ្នាំ នៅភូមិល្វា ឃុំល្វា ដែលមានទំហំ៥ម៉ែត្រគុណនឹង១២ម៉ែត្រ ជាផ្ទះតៀមប្រក់ស័ង្កសី ត្រូវរបើកដំបូល៣សន្លឹកប៉ើងបាត់ ខណៈម្ចាស់ផ្ទះមិននៅ ដោយចេញទៅរកស៊ីនៅរាជធានីភ្នំពេញ ៕
ចែករំលែកព័តមាននេះ